އުރުގުއޭ ކަޓުވާލުމަށް ފަހު ޕެރޫ ސެމީ އަށް

ސަލްވަޑޯ، ބްރެޒިލް (ޖޫން 30) - ކޮޕާ އެމެރިކާގެ ތާރީހުގައި އެންމެ ކާމިޔާބު ޓީމު ކަމަށްވާ އުރުގުއޭ އަތުން ޕެނަލްޓީ ޖަހައިގެން 5-4 އިން މޮޅުވެ ޕެރޫ މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.

އަންނަ ބުދަ ދުވަހުގެ ސެމީގައި ޕެރޫ ބައްދަލުކުރާނީ އެންމެ ފަހުގެ ޗެމްޕިއަން ޗިލީއާ އެވެ. ސެމީން ޗިލީ ފުރުސަތު ހޯދީ ކޮލަމްބިއާގެ މައްޗަށް ކުރި ހޯދުމަށް ފަހު އެވެ. އަނެއް ސެމީގައި ބްރެޒިލް ނުކުންނާނީ އާޖެންޓީނާއާ ދެކޮޅަށެވެ.

ގްރޫޕް ސްޓޭޖުގައި މެޗަކުން ބަލިނުވެ ސެމީ އަށް އައި އުރުގުއޭ އިން ރޭގެ މެޗުގައި ޕެރޫ ކޮޅަށް ލަނޑު ޖަހަން ގިނަ ފުރުސަތުތަކެއް ތަނަވަސްކުރި އެވެ. އަނެއްކޮޅުން ގްރޫޕް ސްޓޭޖުގެ ފަހު މެޗުން ބްރެޒިލް އަތުން 5-0 އިން ބަލިވި މެޗަށް ވުރެ ރަނގަޅު ޑިފެންސިވް ކުޅުމެއް ޕެރޫގެ ފަރާތުން ރޭގެ މެޗުގައި ފެނުނެވެ.

ރޭގެ މެޗުގައި އުރުގުއޭގެ އެޑިސަން ކަވާނީ އާއި ލުއިސް ސުއަރޭޒް އަދި ޖިއޯޖިއަން ޑި އަރަސްކައޭޓާ ވަނީ ލަނޑު ޖަހައިފަ އެވެ. އެކަމަކު މި ތިން ގޯލު ވެސް ޖެހީ އޮފްސައިޑްގައި ހުރެ ކަމަށް ވުމުން ރެފްރީ އެ ލަނޑު ގަބޫލެއް ނުކުރި އެވެ.

ލަނޑެއް ނުޖެހި އެއްވަރުވެގެން މި ފަހަރުގެ ކޮޕާ އެމެރިކާގައި ކުއާޓާ ފައިނަލުގެ ތިން މެޗެއްގައި ވަނީ ޕެނަލްޓީ ޖަހައިފަ އެވެ. ރޭގެ މެޗުގައި ނާކާމިޔާބުވީ ސުއަރޭޒް ޖެހި ޕެނަލްޓީ އެވެ. އެ ޕެނަލްޓީ ޕެރޫގެ ގޯލްކީޕަރު ޕެޑްރޯ ގަލެސޭ ވަނީ ހުއްޓުވައިފަ އެވެ. އުރުގުއޭ އިން ޕެނަލްޓީ ކާމިޔާބުކުރީ ކަވާނީ، ކްރިސްޓިއަން ސްޓުއާނީ، ރޮޑްރީގޯ ބެންޓަންކޫރާއި ލޫކަސް ޓޮރޭރާ އެވެ. ޕެރޫން ފަސް ޕެނަލްޓީ ވެސް ކާމިޔާބުކުރިއިރު، އެ ޓީމުގެ ޕެނަލްޓީތައް ޖެހީ ޕައޮލޯ ގަރޭރޯ، މާރިއޯ ރުއިޑިއާޒް، ޔޮޝިމާ ޔޮޓުން، ލުއިސް އެޑްވިންކޫލާ އަދި އެޑިސަން މިކޭލް ފްލޯރެސް އެވެ.

ޕެރޫގެ ކެޕްޓަން ގަރޭރޯ ބުނީ މެޗަށް ނުކުތްއިރު ވެސް ގިނަ ބަޔެއްގެ ނަޒަރުގައި އެ ޓީމު އޮތީ ކަޓާފައި ކަމަށާއި އެކަމަކު އެ އެންމެން ގޯސްކަމަށް ސާބިތުކޮށްދީ ޕެރޫ ކުޅުންތެރިން ދެއްކި ހިތްވަރު ފާހަގަކުރާ ކަމަށެވެ.

އުރުގުއޭގެ ކެޕްޓަން ޑިއޭގޯ ގޮޑިން ބުނީ އެ ޓީމަށް ދިމާވި މައްސަލައަކީ ލަނޑެއް ނުޖެހުން ކަމަށާއި މިއީ ފަސޭހަކޮށްލައިގެން ބަލިވި މެޗެއް ކަމަށް ގަބޫލުނުކުރާކަމަށެވެ.

މީގެ ކުރިން ދެ ފަހަރެއްގެ މަތިން ކޮޕާ އެމެރިކާ ކާމިޔާބު ކޮށްފައިވާ ޕެރޫ މީގެ ހަތަރު އަހަރު ކުރިން ސެމީ ފައިނަލުގައި ވާދަކުރި އެވެ. އެ ފަަހަރު އެ ޓީމު ބަލިވީ ޗިލީ އަތުންނެވެ. އެހެން ކަމުން މި ފަހަރުގެ ސެމީ އަކީ އޭގެ ބަދަލު ހިފަން ޕެރޫ އަށް ލިބޭ ރަނގަޅު ފުރުސަތެކެވެ.