ހޮޓެލް އޭޝިއާ، ތަފާތު ގިނަ އުފެއްދުންތަކާ އެކު ފަށައިފި

ތަފާތު ގިނަ އުފެއްދުންތަކާ އެކު ކޮންމެ އަހަރަކު ބާއްވާ ރާއްޖޭގެ އެންމެ ބޮޑު ވިޔަފާރީގެ މައުރަޒު، ހޮޓެލް އޭޝިއާ އެގްޒިބިޝަން މިއަދު ދަރުބާރުގޭގައި ފަށައިފި އެވެ.

މޯލްޑިވްސް އެގްޒިބިޝަން އެންޑް ކޮންފަރެންސް ސާވިސަސް އިން އިންތިޒާމްކޮށްގެން ދެ ދުވަހުގެ މުއްދަތަށް ކުރިޔަށް ގެންދާ ފެއާގައި ރާއްޖެ އާއި ބޭރުގެ އެކި ގައުމުތަކުގެ 175 ފަރާތަކުން ބައިވެރިވެ އެވެ. މިއީ މި ފެއާ ކުރިޔަށް ގެންދާ 12 ވަނަ އަހަރެވެ.

ޓޫރިޒަމް އިންޑަސްޓްރީއަށް އަމާޒުކޮށްގެން ކުރިޔަށްގެންދާ ފެއާ ހުޅުވައިދެއްވީ ޓޫރިޒަމް މިނިސްޓަރު މޫސާ ޒަމީރެވެ.

އެ ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ މިއީ ޓޫރިޒަމް އިންޑަސްޓްރީއަށް ބޭނުންވާ ތަފާތު އުފެއްދުންތައް ވިއްކަން ރާއްޖޭގެ އެކި ފަރާތްތަކާއި ބޭރުގެ ފަރާތްތަކަށް ލިބޭ ވަރަށް ރަނގަޅު ފުރުސަތެއް ކަމަށެވެ.

"މިފަދަ ފެއާތައް ބޭއްވުމަކީ ވަރަށް މުހިން ކަމެއް. ރާއްޖޭގެ ޓޫރިޒަމް އިންޑަސްޓްރީ ފާހަގަކުރެވިފައި ވަނީ ދުނިޔޭގެ އެންމެ މަތީ ފެންވަރުގެ މަންޒިލެއްގެ ގޮތުގައި. އެހެންކަމުން އިންޑަސްޓްރީގެ ކުރިއެރުމަށް އާ އުފެއްދުންތަކާއި ޓެކްނޮލޮޖީ ވަރަށް ބޮޑަށް ބޭނުންވެފައިވޭ،" ޒަމީރު ވިދާޅުވި އެވެ.

މިނިސްޓަރު ވިދާޅުވީ އެ ފެއާއާ އެކު ކުރިޔަށްގެންދާ ކަލިނަރީ ޗެލެންޖް ފަދަ ބައިނަލްއަގުވާމީ ހަރަކާތްތަކުން ރާއްޖެ ވަރަށް ބޮޑަށް އިސްތިހާރުވެގެންދާނެ ކަމަށެވެ.

"ޓޫރިޒަމް އިންޑަސްޓްރީ މިއަންނަނީ ވަރަށް ބޮޑަށް ބަދަލުވަމުން. އަދި ސަރުކާރުން ވެސް މިދަނީ އިންޑަސްޓްރީ ފުޅާކުރުމަށް މަސައްކަތްކުރަމުން. އެގޮތުން ވައުދާ އެއްގޮތަށް ކޮންމެ އަހަރަކު ވެސް އާ ރިސޯޓްތަކެއް އެބަ ހުޅުވާ،" ޒަމީރު ވިދާޅުވި އެވެ.

މިނިސްޓަރު ވިދާޅުވީ އާ ރިސޯޓްތައް ހުޅުވުމާ އެކު ވަޒީފާގެ ފުރުސަތުތައް ވެސް އިތުރުވެގެންދާނެ ކަމަށެވެ. އަދި އެ ދާއިރާއަށް ހުނަރުވެރި ޒުވާނުން ނެރެން ބޭނުންވާ ކަމަށް ވެސް އޭނާ ވިދާޅުވި އެވެ.

ފެއާ ކުރިޔަށްދާއިރު ކެއްކުމުގެ ތަފާތު ހުނަރު ދައްކައިދޭ މުބާރާތަކާއި ހާއްސަ ސެމިނާތަކެއް ވެސް ކުރިޔަށް ގެންދެ އެވެ. އޭގެ އިތުރުން މައުލޫމާތު ދިނުމަށް ބައިނަލްއަގުވާމީ ފަރާތްތަކާއި ކަމާ ގުޅޭ ތަޖުރިބާކާރުން ހިމެނޭ ހާއްސަ ޕެނަލެއް ވެސް ހަރަކާތްތެރިވެ އެވެ.

މިފަހަރުގެ ހޮޓެލް އޭޝިއާ ފެއާގައި ރިސޯޓްތަކުގެ ކޮޓަރިތަކަށް ބޭނުންވާ ތަފާތު ސާމާނާއި ލޯންޑްރީ، އެއާކަންޑިޝަނިން، ސާފުތާހިރުކޮށް ބެލެހެއްޓުމާ ގުޅޭ ސާމާނާއި ކޭޓަރިންއަށް ބޭނުންވާ ސާމާނު ވެސް ދައްކާލަން ބަހައްޓާފައިވެ އެވެ. އޭގެ އިތުރުން ބަގީޗާ ހެއްދުމާ ގުޅޭ ސާމާނާއި ތަފާތު އެކި ވައްތަރުގެ ފަރުނީޗަރާއި ކުނި ނައްތާލަން ބޭނުންކުރާ ސާމާނާއި ޒަމާނީ ސެކިއުރިޓީ ސިސްޓަމްތައް ވެސް އެބަ ހުއްޓެވެ.

ފެއާގައި ހިމެނޭ ކަލިނަރީ ޗެލެންޖްގައި 75 ތަނަކުން 500 އެއްހާ ކައްކާއިން ވާދަކުރެ އެވެ.

"ކެއްކުމުގެ ހުނަރު ދެއްކުމުގެ ޝޯގެ އެންމެ ބޮޑު ބޭނުމަކީ އިންޑަސްޓްރީއަށް ބޭނުންވާ ތަފާތު ކާބޯތަކެތި ސަޕްލައި ކޮށްދޭ ފަރާތްތަކުގެ މެދުގައި ގުޅުން ބަދަހިކުރުން. އަދި މި ފެއާގެ ވެސް އެންމެ ބޮޑު ބޭނުމަކީ އިންޑަސްޓްރީއަށް ބޭނުންވާ ތަފާތު އެކި ބާވަތްތައް އުފައްދާ އަދި ސަޕްލައިކުރާ ފަރާތްތަކާއި އިންޑަސްޓްރީއާ ގުޅުވައިދިނުން. މިތަނަކީ އެއް ފުރާޅެއްގެ ދަށުން ގިނަ ބާވަތްތައް ލިބޭނެ ތަނެއް،" މޯލްޑިވްސް އެގްޒިބިޝަން އެންޑް ކޮންފަރެންސް ސާވިސަސްގެ ސީއީއޯ އާސިމް މުހުތާރު ވިދާޅުވި އެވެ.

އެ ފެއާގައި މޭވާގެ ބާވަތްތައް ވިއްކާ ސްޓޯލެއްގައި ހުރި މެލޭޝިއާ މީހަކު ބުނީ ރާއްޖެއަށް ތަފާތު އެކި ބާވަތްތަކުގެ މޭވާ އާއި ތަރުކާރީ ގިނަ އަދަދަކަށް އެކްސްޕޯޓްކުރާ ކަމަށެވެ.

"އަޅުގަނޑުމެންނަކީ މެލޭޝިއާގައި ފުޅާ ދާއިރާއެއްގައި މޭވާ އާއި ތަރުކާރީ ހައްދާ ސަޕްލައިކުރާ ބައެއް. މި ފެއާގައި ބައިވެރިވުމުގެ އެންމެ ބޮޑު ބޭނުމަކީ ވެސް އިތުރު މާކެޓްތައް ހޯދުން،" އޭނާ ބުންޏެވެ.

ގިނަ އަދަދެއްގެ ކާބޯތަކެތި އުފައްދައި، ސަޕްލައިކުރާ ސްރީ ލަންކާގެ ކުންފުންޏެއްގެ އޮފިޝަލަކު ބުނީ ރާއްޖެއަކީ އެ ކުންފުނީގެ ވަރަށް ބޮޑު މާކެޓެއް ކަމަށެވެ. އަދި ރާއްޖޭގައި ބާއްވާ މިކަހަލަ ވަރަށް ގިނަ ފެއާތަކުގައި ބައިވެރިވެގެން ވަރަށް ގިނަ ކަސްޓަމަރުން ލިބިފައިވާ ކަމަށް ވެސް އޭނާ ބުންޏެވެ.

"މިއީ އަޅުގަނޑުމެންނަށް ލިބޭ ރަނުގެ ފުރުސަތެއް. މިތަނަށް ޒިޔާރަތްކުރާނެ އެކި ރިސޯޓްތަކުގެ އެކި ޑިޕާޓްމަންޓްތަކުގެ ވެރިން ގިނަ އަދަދަކަށް. އޭގެ ސަބަބުން އަޅުގަނޑުމެން ދޭން ބޭނުންވާ ހުރިހާ މައުލޫމާތެއް ސީދާ ލިބިގެންދާނެ،" އޭނާ ބުންޏެވެ.