ޕައިލެޓް ހައްޔަރު ކުރުން: މަންޒަރުދުށް މީހުންގެ ދުލުން

އިސްލާމްއާބާދު (މާޗް 1) - ޕާކިސްތާނުން ހަމަލާދީ ވައްޓާލި އިންޑިއާގެ ހަނގުރާމަ މަތީ ބޯޓުގެ ޕައިލެޓް އަބިނަންދަން ވަތަމަން ފުރަތަމަ ފެނުނީ ހޮރާން އަވަށުގެ ބަޔަކަށެވެ.

އެ މީހުންނަށް ޕައިލެޓް ފެނުމާ އެކު ވަނީ ގާ އުކަން ފަށައިފަ އެވެ. އެ މީހުން ދުރަށް ފޮނުވާލުމުގެ ގޮތުން ޕައިލެޓް ވަނީ އިންޒާރުގެ ވަޒަންތަކެއް ޖަހާފައި ކަމަށް މަންޒަރުދުށް މީހުން ބުނެފައިވެ އެވެ. ޕާކިސްތާން ސިފައިން އެ ސަރަހައްދަށް ދިޔައީ އޭގެ ފަހުންނެވެ.

ހޮރާން އަވަށުގެ އިސް މީހެއް ކަމަށްވާ މުހައްމަދު ރައްޒާގު ޗައުދަރީ ބުނީ އޭނާގެ ބޭނުމަކަށްވީ ދިރިހުއްޓާ ޕައިލެޓް ހައްޔަރު ކުރުން ކަމަށެވެ.

"އޭނާގެ ވައި ކުޑައިގައި އިންޑިއާގެ ދިދައެއް ޖަހާފައި ހުރުމުން އެނގިއްޖެ އެއީ އިންޑިއާ މީހެއްކަން،" ޗައުދަރީ ބުންޏެވެ.

އުމުރުން 59 އަހަރުގެ ޗައުދަރީ ބުނީ މިގް-21 މަރުކާގެ ބޯޓަށް ހަމަލާ އަރައި އެ ބޯޓު ވެއްޓުނު މަންޒަރު އޭނާ އަށް ފެނުނު ކަމަށެވެ. އަދި ބޯޓު ވެއްޓުނު ތަނަށް އޭނާއާ އެކު އެ އަވަށުގެ ގިނަ ބަޔަކު ދިޔަ ކަމަށް ބުންޏެވެ.

"އެ މީހުން ޕައިލެޓަށް ކަމެއް ކޮށްފާނެތީ ނުވަތަ ޕައިލެޓް އެ މީހުންނަށް ކަމެއް ކޮށްފާނެތީ އަހަރެން ކަންބޮޑުވި،" ބޮޑު ވަޒީރު އިމްރާން ޚާންގެ ޕީޓީއައި އަށް ނިސްބަތްވާ ޗައުދަރީ ބުންޏެވެ.

ޕައިލެޓް ވެއްޓިފައި އޮތް ސަރަހައްދަށް ދެވުމާ އެކު "މިއީ އިންޑިއާގެ ސަރަހައްދެއްތޯ" ޕައިލެޓް ސުވާލު ކުރި އަޑު އިވުނު ކަމަށް ޗައުދަރީ ބުންޏެވެ.

"އަވަށުގެ ކުދިން ބުނި އާއެކޭ. ދެން ޕައިލެޓް ވައިކުޑަ ނައްޓާލުމަށް ފަހު ތެދުވުމުން، އެ ކުދިން ޕާކިސްތާނަށް ތައުރީފްކޮށް އަޑު އުފުލަން ފެށި. އެ ވަގުތު ޕައިލެޓުގެ ބަޑި ނަގައި ވައިގެ ތެރެއަށް އިންޒާރުގެ ވަޒަން ޖަހަން ފެށި،" ޗައުދަރީ ބުންޏެވެ.

އެ ވަގުތު ޕައިލެޓުގެ ކައިރީގައި ތިބި އަވަށުގެ މީހުން ވެސް ރުޅި އައި ކަމަށާއި އެ މީހުން ވެސް ޕައިލެޓް ގަޔަށް ގާ އުކަން ފެށި ކަމަށެވެ. އަދި ޕައިލެޓް ވަނީ އިތުރު ވަޒަން މައްޗަށް ޖަހަމުން ދުވެ ފިލަން މަސައްކަތް ކޮށްފައި ކަމަށް ޗައުދަރީ ބުންޏެވެ.

"އަވަށުގެ ކުދިން ވެސް ޕައިލެޓުގެ ފަހަތުން ދުވަން ފެށި. އެންމެ ފަހުން އޭނާ ފެންގަނޑަކަށް ވެއްޓުމުން، ދެން އަވަށުގެ ކުދިންގެ ތެރޭން އެކެއްގެ އަތުގައި އޮތް ބަޑިއަކުން ޕައިލެޓުގެ ފަޔަށް ވަޒަނެއް ޖެހި. އޭގެ ފަހުން ޕައިލެޓުގެ ފިސްތޯލަ ބިން މައްޗަށް ވައްޓާލަން އެދުނު. އޭނާ އެގޮތަށް ކަންތައް ކުރުމުން، ޕައިލެޓުގެ އަތުގައި ހުރި އިތުރު ހަތިޔާރު ބޭނުން ނުކުރެވޭ ގޮތަށް އޭނާ ބަނދެލި،" ޗައުދަރީ ކިޔައިދިނެވެ.

ޗައުދަރީ ބުނީ އެ ވަގުތު ޕައިލެޓުގެ ޖީބުން ނެގި ކަރުދާސްތަކެއް އަނގަޔަށް އަޅާ ހަލާކުކޮށްލަން މަސައްކަތް ކުރި ކަމަށެވެ. އޭގެ ތެރޭން ބައެއް ކަރުދާސްތައް ވަނީ އަވަށުގެ ކުދިން އަތުލައި ޕާކިސްތާން ސިފައިންނާ ހަވާލުކޮށްފައި ކަމަށް ބުންޏެވެ.

"އަހަރެން ބުނި ސިފައިން އަންނަންދެން ޕައިލެޓަށް އެއްވެސް ކަމެއް ނުކޮށް ތިބުމަށް،" ޗައުދަރީ ބުންޏެވެ.

ޕާކިސްތާން ސިފައިން ވަނީ ޕައިލެޓް އަބީނަންދަން ވެއްޓިފައި އޮތް ވީޑިއޯއެއް ދައްކައިފަ އެވެ. އަދި އޭގެ ފަހުން ކަނުބަނދެފައި ބަހައްޓައިގެން އޭނާއާ ސުވާލުކުރާ ވީޑިއޯއެއް ވެސް ވަނީ އާއްމުކޮށްފަ އެވެ. އެ ވީޑިއޯ އަށް ފާޑުކިޔުން އަމާޒުވާން ފެށުމުން ވަނީ ޕައިލެޓަށް ސައިދޭ މަންޒަރުގެ ވީޑީއޯއެއް ނެރެފަ އެވެ.

ޕާކިސްތާނުން މިހާރު ވަނީ ޕައިލެޓް މިއަދު ދޫކޮށްލަން ނިންމައިފަ އެވެ.