އެޗްއާރް އެކްސްޕޯގެ ޓައިޓަލް ސްޕޮންސަރަކަށް އުރީދޫ

މޯލްޑިވްސް އެސޯސިއޭޝަން ފޮ ހިއުމަން ރިސޯސަސް ޕްރޮފެޝަނަލްސް (އެމްއޭއެޗްއާރްޕީ) އިން ބާއްވާ ހިއުމަން ރިސޯސް ކޮންވެންޝަން އެންޑް އެކްސްޕޯގެ ޓައިޓަލް ސްޕޮންސަރަކަށް އުރީދޫ މޯލްޑިވްސް މިއަދު ހަމަޖައްސައިފި އެވެ.

އޫރީދޫ އޮފީހުގައި ބޭއްވި ރަސްމިއްޔާތެއްގައި އެމްއެޗްއާރްޕީގެ ފަރާތުން މިކަމުގެ އެއްބަސްވުމުގައި އެ ޖަމިއްޔާގެ ރައީސް ހުސެއިން އަފީފު ސޮއިކުރެއްވި އިރު، އުރީދޫގެ ފަރާތުން ސޮއިކުރެއްވީ ޑައިރެކްޓާ އޮފް ހިއުމަން ރިސޯސަސް މުހައްމަދު ޝާހިދެވެ.

އެމްއޭއެޗްއާރްޕީގެ ރައީސް އަފީފް ވިދާޅުވީ އުރީދޫ އަކީ މީހުން ބިނާ ކުރުމަށާއި، އެންމެ ރަނގަޅު ޕްރެކްޓިސްތައް ރާއްޖޭގައި ދެމެހެއްޓުމަށް މަސައްކަތްކުރާ އެއް ކުންފުނި ކަމަށެވެ. އަދި މި އެކްސްޕޯގެ ސްޕޮންސަރަކަށް އުރީދޫ ހަމަޖެއްސީ ރާއްޖޭގައި "ޕްރިފާޑް އެމްޕްލޯޔާ"އަކަށް ވުމަށް އޫރީދޫން ކޮށްފައިވާ މަސައްކަތްތަށް ފާހަގަކުރެވުމުން ކަމަށް ވެސް އޭނާ ވިދާޅުވި އެވެ.

މާޗު 4-5 އަށް ބާއްވާ މި އެކްސްޕޯގައި ހިއުމަން ރިސޯސްގެ ދާއިރާގެ ހާއްސަ ބޭފުޅުންނާއި ކުންފުނިތަކުގެ އިސް ވެރިން މި ދާއިރާއާ ގުޅޭ މައުލޫމާތު ހިއްސާކުރާނެ އެވެ.

އިންސާނީ ވަސީލަތަށް ހާއްސަކޮށްގެން ބާއްވާ މި އެކްސްޕޯގެ ތީމަކީ "ފިއުޗަ އޮފް އެޗް.އާރް އެންޑް ވާކް" އެވެ. މުވައްޒަފުން ކުރިއެރުވުމާއި، މުވައްޒަފުންގެ ދުޅަހެޔޮކަމާއި، މަސައްކަތަށް ޝައުގުވެރިކަން އުފެއްދުމުގެ މުހިއްމުކަމާއި، މަސައްކަތްތައް ޑިޖިޓަލްކުރުމާއި، ވިޔަފާރިގައި އިންސާނީ ވަސީލަތްތަކުގެ މުހިންމުކަމާ ބެހޭ ގޮތުން މި ތީމްގެ ދަށުން ވާހަކަ ދައްކާނެ އެވެ.

"މީގައި ރާއްޖެ އާއި ރާއްޖޭން ބޭރުގެ ވަރަށް ގިނަ ސްޕީކާސް ވާހަކަ ދައްކާނެ. މީގައި ވަރަށް ބޮޑަށް ބަލާލާނެ ރާއްޖޭގެ ފިއުޗާއަށް، ހާއްސަކޮށް އެޗްއާރް ދާއިރާއަށް ކުރެވޭނެ ކަންތައްތަކަށް،" އޭނާ ވިދާޅުވި އެވެ.

ޖުމްލަ 300 ބައިވެރިންނަށް ހުޅުވާލާފައިވާ މި އެކްސްޕޯގައި މިހާރު ވެސް 250 އަށް ވުރެ ގިނަ ބައިވެރިން ރަޖިސްޓްރީވެފައިވާ ކަމަށް އަފީފު ވިދާޅުވި އެވެ. އަދި މި އެކްސްޕޯ، މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ (މަޓީ) އިން އެންޑޯސްކޮށްފައި ވުމުން، ރިޒޯޓުތަކުގައި މަސައްކަތްކުރާ ވަރަށް ގިނަ މުވައްޒަފުން ވެސް ރަޖިސްޓްރީވެފައިވާކަން އޭނާ ފާހަގަކުރި އެވެ.

މިއީ ރާއްޖޭގައި ބާއްވާ މިފަދަ ފުރަތަމަ އެކްސްޕޯ އަށް ވުމުން، މި ރޮނގުން ކުރިއަރަން ބޭނުންވާ ދަރިވަރުންނަށް ހިލޭ ބައިވެރިވުމުގެ ފުރުސަތު އޮންނާނެ ކަމަށް އޭނާ ވިދާޅުވި އެވެ. މީގެ އިތުރުން ގްރޭޑް 11، 12 އަށް ކިޔަވައިދޭ ސްކޫލްތަކާއި މަތީ ތައުލީމު ފޯރުކޮށްދޭ އިންސްޓިޓިއުޝަންތަކާ މަޝްވަރާކޮށް، އެ ޖާގަތައް ފުރުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

އެކްސްޕޯގައި ބައިވެރިވުމުގެ ފުރުސަތު، އަންނަ ބުރާސްފަތި ދުވަހުގެ ނިޔަލަށް އޮންނާނެ އެވެ.