މަޖިލިސް އިންތިޚާބުގައި ވާދަކުރަން މިހާތަނަށް 193 ފޯމު ހުށަހަޅައިފި

އަންނަ އޭޕްރީލް މަހު އޮންނަ ރައްޔިތުންގެ މަޖިލިހުގެ އިންތިޚާބުގައި ވާދަކުރުމަށް މިހާތަނަށް 193 ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.

އެ ކޮމިޝަންގެ މެމްބަރު އަހުމަދު އަކްރަމް "މިހާރު" އަށް ވިދާޅުވީ، އެންމެ ގިނަ އަދަދަކަށް މިހާތަނަށް ފޯމު ހުށަހެޅީ އެމްޑީޕީން ކަމަށެވެ. މި ސަރުކާރު ހިންގާ ކޯލިޝަންގެ އެންމެ ބޮޑު ޕާޓީ އެމްޑީޕީން 86 ކެންޑިޑޭޓެއްގެ ފޯމު ހުށަހެޅި އިރު، އެ ހުރިހާ ފޯމެއް ބަލައިގެންފައިވާ ކަމަށް އޭނާ ވިދާޅުވި އެވެ.

އަކްރަމް ވިދާޅުވި ގޮތުގައި ދެން އެންމެ ގިނަ އަދަދަކަށް ފޯމު ހުށަހެޅީ އަމިއްލަ ގޮތުން އިންތިޚާބުގައި ވާދަކުރައްވާ ކެންޑިޑޭޓުންނެވެ. އަމިއްލަ ގޮތުން ވާދަކުރުމަށް 64 ކެންޑިޑޭޓެއްގެ ފޯމުހުށަހެޅި އެވެ.

މީގެ އިތުރުން، އިދިކޮޅު ޕާޓީ ޕީޕީއެމުން 16 ކެންޑިޑޭޓުން، އަދާލަތު ޕާޓީން ހަތް ކެންޑިޑޭޓުން، އެމްޑީއޭ އިން އަށް ކެންޑިޑޭޓުން، ޖުމްހޫރީ ޕާޓީންނާއި ކޮންގްރެސް ޕާޓީން ހަ ކެންޑިޑޭޓުންގެ ފޯމު ވަނީ ހުށަހަޅައިފަ އެވެ.

އޭޕްރީލް މަހުގެ ހަ ވަނަ ދުވަހު އޮންނަ އިންތިޚާބަށް އާންމުންގެ ބޮޑު ސަމާލު ކަމެއް ލިބިފައިވާ އިރު، ކެމްޕެއިންގެ ފޯރި ވަނީ ވަރަށް ބޮޑަށް ގަދަވެފަ އެވެ. އިންތިޚާބުގައި ވާދަކުރުމުގެ ފުރުސަތު އަންނަ ބުރާސްފަތި ދުވަހު ހަމަވާއިރު، އަކްރަމް ވަނީ އިންތިޚާބަށް ކުރިމަތިލުމުގެ މުއްދަތު ހަމަވުމުގެ ވީހާ ވެސް ކުރިން އިލެކްޝަންސް ކޮމިޝަނަށް ފޯމު ހުށަހެޅުމަށް އެދިވަޑައިގެންފަ އެވެ.

މި ފަހަރުގެ އާންމު އިންތިޚާބަށް އާންމުންގެ ސަމާލުކަން ހުއްޓިފައިވާއިރު، ސިޔާސީ ގިނަ ޕާޓީތަކުން އިންތިޚާބުގައި ވާދަކުރާނެ ކަމަށް ވަރަށް ބޮޑަށް ބެލެވެ އެވެ. އެގޮތުން އެމްޑީޕީން ފ. ނިލަންދޫ ދާއިރާ ފިޔަވައި ހުރިހާ ދާއިރާއަކަށް ވާދަކުރެ އެވެ. ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީން މިހާތަނަށް 44 ދާއިރާއަކަށް ވާދަ ކުރަން ނިންމައި ކެންޑިޑޭޓުންނަށް ވަނީ ޓިކެޓު ހަވާލުކޮށްފަ އެވެ.

ކުރީގެ ރައީސް މައުމޫން އަބްދުލްގައްޔޫމްގެ ތާއީދާއެކު އެމްއާރުއެމުން މިހާތަނަށް 24 ދާއިރާއަކަށް ވާދަކުރާއިރު، އަދާލަތު ޕާޓީން ނުކުންނަނީ ހަތް ދާއިރާ އަކަށް އެކަންޏެވެ.

ޕީޕީއެމް އަދި ޕީއެންސީ ގުޅިގެން މިހާތަނަށް 60 އަށް ވުރެ ގިނަ މީހުންނަށް ޓިކެޓު ދިނަސް، މި އިންތިޚާބުގައި ޖުމްހޫރީ ޕާޓީން ވާދަކުރާ ބައެއް ދާއިރާތަކަށް ޕީޕީއެމުން ކުރިމަތިނުލާން އަދި ޕީޕީއެމުން ވާދަކުރާ ބައެއް ދާއިރާތަކަށް ޖުމްހޫރީ ޕާޓީން ނުނިކުންނަން އެ ދެ ޕާޓީން އެއްބަސްވެފައިވާ ކަމަށް ވެ އެވެ. އަދި ޕީޕީއެމާއި ކޮންގްރެސް ޕާޓީން ދަނީ ބައެއް ކެންޑިޑޭޓުންނަށް ދިން ޓިކެޓު އަތުލަމުންނެވެ.

އެމްޑީއޭ އިން އާންމު އިންތިޚާބުގައި ވާދަކުރަނީ އަށް ދާއިރާ އަށް އެކަންޏެވެ. ޑީއާރުޕީ އާއި ލޭބާ ޕާޓީ އާއި އެމްޓީޑީން އިންތިޚާބުގައި ވާދަކުރަން ނިންމި ނަމަވެސް، ކެންޑިޑޭޓުންގެ ފޯމު އަދި ހުށަހެއް ނާޅަ އެވެ.