ނޫސްވެރިޔާ މަރާލި ކަމަށް ބުނުމަކީ ބޮޑު ދޮގެއް: ސައުދީ

ރިޔާޒް (އޮކްޓޯބަރު 13) - ތުރުކީގެ އިސްތަންބޫލްގައި ހުންނަ ސައުދީ ކޮންސިއުލޭޓް ތެރޭގައި ނޫސްވެރިޔާ ޖަމާލް ޚާޝޮގްޖީ މަރާލި ކަމަށް ބުނެ ދައްކަމުންދާ ވާހަކަތަކުގައި އެއްވެސް ހަގީގަތެއް ނެތް ކަމަށާއި އެއީ ކަނޑައެޅިގެން ބޮޑު ދޮގެއް ކަމަށް ސައުދީ އަރަބިއާ އިން ބުނެފި އެވެ.

ދާޚިލީ ވަޒީރު ޕްރިންސް އަބްދުލް އަޒީޒް ބިން ސައުދު ބިން ނާއިފް ބިން އަބްދުލްއަޒީޒް ވިދާޅުވީ ނޫސްވެރިޔާ ގެއްލުމުގެ ހަގީގަތް ހޯދަން ސައުދީން ވެސް ވަރަށް ޝައުގުވެރިވާ ކަމަށެވެ. ސައުދީ ދާޚިލީ ވަޒީރު މިހެން ވިދާޅުވެފައި ވަނީ މި މަހު 2 ވަނަ ދުވަހު ނޫސްވެރިޔާ ކޮންސިއުލޭޓަށް ވަތް ފަހުން ޚަބަރެއް ނުވެގެން އުޅޭތާ 11 ދުވަސް ފަހުންނެވެ. ތުރުކީން ބުނެފައި ވަނީ ކޮންސިއުލޭޓް ތެރޭ ނޫސްވެރިޔާ މަރާލީ ކަމަށެވެ. ސައުދީ ވަނީ އަސްލެއް ނެތް ތުހުމަތު ނުކުރަން އަންގައިފަ އެވެ.

ތުރުކީން ބުނެފައި ވަނީ ކޮންސިއުލޭޓް ތެރޭގައި ނޫސްވެރިޔާ މަރާލި ކަމުގެ އޯޑިއޯ އަދި ވީޑިއޯ ހެކި ލިބިފައިވާ ކަމަށެވެ.

ނޫސްވެރިޔާ ގެއްލުނު މައްސަލަ ތަހުގީގު ކުރަން ތުރުކީ އަށް އެއްބާރުލުން ދިނުމަށް ސައުދީ ޓީމެއް ހުކުރު ދުވަހު ވަނީ އިސްތަންބޫލް އަށް ޒިޔާރަތް ކޮށްފަ އެވެ.

ހާޝޮގްޖީ ކޮންސިއުލޭޓަށް ދިޔައީ ތުރުކީގެ ރައްޔިތެއް ކަމަށްވާ ޚަދީޖާއާ ކައިވެނި ކުރަން ބޭނުންވާ ލިޔެކިޔުންތަކެއް ފުރިހަމަ ކުރުމަށެވެ.