ދެ ޖިންސުގެ ހަމަހަމަކަމާއި ނިދުމާ ވެސް ގުޅުން އެބަހުރި

ދެ ޖިންސްގެ ހަމަހަމަކަން ގާއިމުކުރަން މަސައްކަތްކުރާ ގައުމުތަކުގައި، ނިދަން އުނދަގޫވާ މައްސަލަތައް ކުޑަ ކަމަށް ދިރާސާއެއްގައި ބުނެފި އެވެ.

ދުނިޔޭގެ އެކި ހިސާބުތަކުން 23 ގައުމެއްގެ 14،000 އަށް ވުރެ ގިނަ މީހުންގެ މައުލޫމާތު އެއްކޮށްގެން އޮސްޓްރޭލިއާގެ މެލްބަން ޔުނިވަސީޓި އާއި އެމެރިކާގެ ސިންސިނަޓީ ޔުނިވަސިޓީގެ ޓީމަކުން ހެދި ދިރާސާގައި ފާހަގަކޮށްފައިވާ ގޮތުގައި އަންހެނުންގެ ނިދުން މަދުވާ މައިގަނޑު އެއް ސަބަބަކީ ދަރިންނެވެ. އަދި ފިރިހެނުންނަށް ހަމަ ނިދި ނުލިބޭ އެއް ސަބަބަކީ މާލީ ދަތިކަމެވެ.

ނަމަވެސް އަންހެނުންނާއި ފިރިހެނުންގެ ހަމަހަމަކަށް މަސައްކަތްކުރާ ގައުމުތަކުގެ ރައްޔިތުންގެ މެދުުގައި ނިދަން އުނދަގޫވާ މައްސަލަތައް ކުޑަ ކަމަށް ދިރާސާގައި ބުންޏެވެ. އެގޮތުން އެންމެ އަރާމުކޮށް ރައްޔިތުން ނިދާ ގައުމަކީ ނޯވޭ ކަމަށް ބުނެފައިވާ އިރު، ނިދީގެ މައްސަލަ އެންމެ ބޮޑު ގައުމުތަކުގެ ކުރީގައި އުޅެނީ ޔުކްރެއިނެވެ.

މެރިޖް އެންޑް ފެމިލީ ޖާނަލްގައި ޝާއިއުކޮށްފައިވާ ދިރާސާގައި ބުނި ގޮތުގައި އަންހެނުން ބާރުވެރި ކުރުވަން މަސައްކަތްކުރާ ގައުމުތަކުގެ ދިރިއުޅުގެ ވައްޓަފާޅި އަށް ބަލާއިރު، ސިއްހީ ގޮތުން ދިމާވާ އެކި ކަހަލަ މައްސަލަތައް މަދެވެ. އެގޮތުން ފިރިހެނުންނާ އެއް ސަފެއްގައި އެކި ދާއިރާތަކުން ކުރިއަށް ދާން އަންހެނުންނަށް ފުރުސަތުތައް ހޯދައި ދޭން ފެށުމުން ފަރުދީ ގޮތުން ކުރިމަތިލާން ޖެހޭ ކަންކަން "ޕޮޒިޓިވް" ކަމަށް ދައްކަ އެވެ. މިކަމުގެ ސަބަބުން ހާސްކަމާއި ނުތަނަވަސްކަމާއި ފިކުރުތަކުން ދުރުކޮށްދީ، ދެ ޖިންސްގެ މެދުގައި އޯގާތެރިކަމާއި އުފާވެރިކަން އާލާކޮށް ދޭނެ އެވެ.

ދިރާސާ ޓީމުގައި ހިމެނޭ ލިއާ ރުޕެނާ ވިދާޅުވި ގޮތުގައި އޭނާގެ އަމިއްލަ ތަޖުރިބާއަކީ ވެސް ދެ ޖިންސްގެ މީހުން ހަމަހަމަ ކުރާ ނަމަ ލިބޭ އުފާވެރިކަން ބޮޑު ކަމެވެ.

"އޭގެ ތެރޭގައި ޖިސްމާނީ ގޮތުންނާއި ނަފުސާނީ ގޮތުން ވެސް މީހާ ދުޅަހެކޮށް ދޭން ބާރު އަޅާ،" އޭނާ ވިދާޅުވި އެވެ.

ދިރާސާގައި ބުނި ގޮތުގައި އަންހެނުން ބާރުވެރިކޮށް، ދެ ޖިންސްގެ ހަމަހަމަކަން ގާއިމުކުރުމަށް ގައުމުތަކުން މިހާރު ކުރަމުން އަންނަ މަސައްކަތްތައް އިތުރަށް ފުޅާ ކުރުމަކީ މުހިއްމު ކަމެކެވެ. ވަކިން ހާއްސަކޮށް ގައުމީ ފެންވަރުގައި ކުރެވޭ މަސައްކަތްތައް މިހާރަށް ވުރެ ބޮޑަށް ހަރުދަނާ ކުރަން ޖެހޭ ކަމަށް ބުންޏެވެ.