ކަރަން ޖޯހަރްގެ ހުވަފެނެއް 20 އަހަރު ފަހުން ހަގީގަތަކަށްވެއްޖެ

ކަރަން ޖޯހަރްގެ 20 އަހަރުވީ ހުވަފެނެއް އެންމެ ފަހުން ހަގީގަތަކަށްވެއްޖެ އެވެ.

އޭނާގެ އަލަތު ޑައިރެކްޝަން ކަމަށްވާ، 1998 ގައި ރިލީޒްކުރި ފިލްމު "ކުޗް ކުޗް ހޯތާ ހޭ" ގެ އެއް ބަތަލާގެ ރޯލް، ގާތް އެކުވެރިޔާ ޓްވިންކަލް ކަންނާ އަށް ހުށަހެޅުމުން އޭނާ ވަނީ އެ ފިލްމު ނުކުޅެ ދޫކޮށްލައިފަ އެވެ. އެހެންވެ ޓްވިކަލް ކެމެރާގެ ކުރިމައްޗަށް ގެނެސް ކަރަންގެ އިރުޝާދުގެ ދަށުން ޑައިރެކްޓް ކުރަން ކުރަމުން އައި އުންމީދު އޮތީ ފުރިހަމަ ނުވެ އެވެ.

ނަމަވެސް ކަރަން މިހާރު ވަނީ ފުރަތަމަ ފަހަރަށް ޓީވީ އިޝްތިހާރެއްގައި ޓްވިންކަލްއާ އެކު މަސައްކަތްކޮށްފަ އެވެ. ކަރަން ޑައިރެކްޓް ކުރި އެ އިޝްތިހާރު ޓްވިންކަލް ކުޅުނީ ފިރިމީހާ އަކްޝޭ ކުމާރާ އެކުގަ އެވެ. މި ފުރުސަތު އެހާ ޒަމާންކޮށްފައި ވެސް ފަހިވުމުން ކަރަން ވަނީ އެކަން ޓްވިޓާގައި އޭނާގެ ފޭނުންނާ ހިއްސާކޮށްފަ އެވެ.

ޝާހްރުކް ހާނާއި ކާޖޮލް އަދި ރާނީ މުކަރްޖީ ލީޑް ރޯލް ކުޅުނު ކާމިޔާބު ފިލްމް "ކުޗް ކުޗް ހޯތާ ހޭ" ގައި ރާނީ ކުޅުނު ޓީނާގެ ރޯލަކީ ޓްވިންކަލް އަށް ހާއްސަކޮށްގެން ކަރަން ލިޔުނު ވަރަށް ލޯބި ކެރެކްޓާއެކެވެ. އެ ކެރެކްޓާ އަށް ނަން ވެސް ދީފައި ވަނީ ޓްވިންކަލް އަށް އާންމުކޮށް ކިޔާ ނަމުންނެވެ.

"ކުޗް ކުޗް ހޯތާ ހޭ" ނުކުޅެ ޓްވިންކަލް ފިލްމް ދޫކޮށްލީ ޝާހްރުކާއި ކާޖޮލްގެ ފަދަ މަޝްހޫރު ތަރިންތަކެއް ހިމެނޭ ފިލްމަކުން އޭނާ އަށް ލިބޭނެ މާ ކުރިއެރުމެއް ނެތް ކަމަށް ބުނެފަ އެވެ. މިކަމާ ބެހޭ ގޮތުން ކަރަންގެ ޗެޓް ޝޯ "ކޮފީ ވިތު ކަރަން" ގެ ފަސް ވަނަ ސީޒަނުގައި ޓްވިންކަލް ބުނީ އެ ފިލްމް ނުކުޅެވުނީތީ އުފާ ވެސް ކުރާ ކަމަށެވެ.

"އެހެންވީމަ ރާނީގެ ކެރިއާ ބިނާކޮށް ދިން މީހަކަށް ވާނީ އަހަރެން. އަހަރެން އެ ފިލްމް ދޫކޮށްލީމަ އޭނަ އަށް ފުރުސަތު ލިބުނީ،" ސަމާސާއަކަށް ހަދާފައި ޓްވިންކަލް ބުނެފައިވެ އެވެ.

އޭނާ "ކުޗް ކުޗް ހޯތާ ހޭ" އެއްބަސް ނުވުމުން ފަހުން ކަރަން އެ ރޯލް އައިޝްވާރިޔާ ރާއީ އަށް ވެސް ހުށަހެޅި އެވެ. އެކަމަކު ވަގުތު ދެވެން ނެތިގެން އޭނާ ވެސް ފިލްމް ދޫކޮށްލީ އެވެ. ރާނީއާ ހަމައަށް ޓީނާގެ ރޯލް ދިޔައީ، އޭނާގެ މިހާރުގެ ފިރިމީހާ އަދި ކަރަންގެ ގާތް އެކުވެރިޔާ އަދިތިޔާ ޗޯޕްޅާ ދިން ލަފައެއްގެ ދަށުންނެވެ.

"ކުޗް ކުޗް ހޯތާ ހޭ" ވެގެން ގޮސްފައި ރާނީގެ އެންމެ ކާމިޔާބު އެއް ފިލްމަށެވެ. އަދި އެ ފިލްމް ކުޅެގެން އޭނާ ވަރަށް ބޮޑު މަޝްހޫރު ކަމެއް ލިބުނެވެ.

ކަރަން މިހާރު އަންނަނީ "ތަހުތު" ކިޔާ ތާރީހީ ލޯބީގެ ފިލްމެއް ޑައިރެކްޓް ކުރަން ތައްޔާރުވަމުންނެވެ. ބޮޑު ކާސްޓެއް ހިމެނޭ ފިލްމް ސިނަމާތަކަށް އަންނާނީ 2020 ގަ އެވެ.