ތަރައްގީގެ މަޝްރޫއުތަކަށް ކުޑަ އިންޓަރެސްޓް ރޭޓްގެ ލޯނު ހޯދަން އޭޑީބީއާއެކު މަޝްވަރާކޮށްފި

ރާއްޖޭގެ ތަރައްގީގެ މަޝްރޫއުތަކަށް ކުޑަ އިންޓަރެސްޓް ރޭޓްގެ ލޯނު ހޯދަން ފިނޭންސް މިނިސްޓްރީން އޭޝިއަން ޑިވެލޮޕްމަންޓް ބޭންކް (އޭޑީބީ)އާއެކު މަޝްވަރާކޮށްފި އެވެ.

އޭޑީބީ ރައީސް ޓެކެހީކޯ ނަކައޯއާއެކު މަޝްވަރާކުރުން އޮތީ އޭޑީބީގެ 51 ވަނަ އަހަރީ ޖަލްސާގައި ބައިވެރިވެވަޑައިގަތުމަށް ފިލިޕިންސްގެ މެނީލާ އަށް ފިނޭންސް މިނިސްޓަރު އަހުމަދު މުނައްވަރު މިހާރު ކުރައްވަމުންގެންދަވާ ދަތުރުގަ އެވެ.

އެ ބައްދަލުވުމަށް ފަހު ފިނޭންސް މިނިސްޓްރީން ބުނެފައި ވަނީ އޭޑީބީއާ އެކު ކުރި މަޝްވަރާތަކުގައި ރާއްޖޭގައި ހިންގާ ތަރައްގީގެ މަޝްރޫއުތަކަށް ފައިނޭންސް ކޮށްދިނުމުގައި ކުޑަ އިންޓަރެސްޓް ރޭޓުގެ ލޯނު ހޯދުމާ ބެހޭ މަޝްވަރާ ހިމެނޭ ކަމަށެވެ. ނަމަވެސް އެ މަޝްވަރާތަކުގެ އިތުރު ތަފުސީލެއް އެ މިނިސްޓްރީން ނުދެ އެވެ.

އެ ބައްދަލުވުމަށް ފަހު އޭޑީބީގެ ނައިބު ރައީސް ވެންކައި ޒަން އާއި ޑިރެކްޓަރު ޖެނެރަލް ހުން ކިމް އާއެކު ވެސް މިނިސްޓަރު ބައްދަލުކުރެއްވި ކަމަށް މިނިސްޓްރީން ބުނެ އެވެ. އެ ބައްދަލުވުމުގައި ރާއްޖެ ފަދަ ކުދި ގައުމުތަކުގެ އިގްތިސާދު ކުރިއަރުވަން އިތުރު ފަންޑު ދެއްވާނެ ކަމަށް ވެސް އެ ބޭފުޅުން ވިދާޅުވި ކަމަށް ފިނޭންސް މިނިސްޓްރީން ބުންޏެވެ.

އޭޑީބީއަކީ ރާއްޖޭގައި ހިންގާ ތަރައްގީގެ އެކި އެކި މަޝްރޫއުތަކަށް ވަރަށް ގިނަ އަދަދެއްގެ ހިލޭ އެހީ އާއި ކުޑަ އިންޓަރެސްޓެއްގައި ލޯނުތަކެއްދީފައިވާ ބޭންކެކެވެ.