ސައުތު ކޮރެއާ އަށް އެތެރެވި ވަގުތު ޖަޒުބާތުން ފުރުނު: ކިމް

ޕަންމުންޖޮމް (އެޕްރީލް 27) - ދެ ކޮރެއާ ގުޅޭ ބޯޑަރު ހުރަސް ކުރުމަށް ފަހު ސައުތު ކޮރެއާއާވީ ފަޅިއަށް ވަދެވަޑައިގެންނެވި ވަގުތު ޖަޒުބާތުން ފުރުނު ކަމަށް ނޯތު ކޮރެއާގެ ލީޑަރު ކިމް ޖޮން-އުން ވިދާޅުވެއްޖެ އެވެ.

ކިމް އަކީ 1953 ވަނަ އަހަރު ކޮރެއާ ހަނގުރާމަ ނިމުނު ފަހުން ސައުތު ކޮރެއާ އަށް އެތެރެވެވަޑައިގެންނެވި ނޯތު ކޮރެއާގެ ފުރަތަމަ ލީޑަރެވެ.

ކިމް ވިދާޅުވީ ކޮރެއާ ވަކިކުރަން ގާއިމްކޮށްފައިވާ ސިމެންތި ބްލޮކްތައް ހުރަސް ކުރުމަކީ ފަސޭހަ ކަމެއް ކަމަށެވެ. އެކަމަކު އެކަން ކުރަން 11 އަހަރު ހޭދަވީ ކީއްވެތޯ އޭނާ ވަނީ ސުވާލު ކުރައްވައިފަ އެވެ. ދެ ކޮރެއާގެ ވެރިންގެ ސަމިޓް ޕިއޮންޔޮންގައި އެންމެ ފަހުން ބާއްވާފައި ވަނީ 2007 ވަނަ އަހަރު އެވެ.

ދެ ކޮރެއާގެ ވެރިންގެ ސަމިޓް ބޭއްވި ދެ ގައުމު ގުޅޭ ޑިމިލިޓަރައިޒް ޒޯން (ޑީއެމްޒެޑް) ގައިވާ ޕަންމުންޖޮމްގެ ޕީސް ހައުސްގައި ކިމް ވިދާޅުވީ ކޮރެއާ ބޯޑަރު ހުރަސް ކުރަން 200 މީޓަރަށް އޭނާ ހިންގަވައިފައި ވަޑައިގެންނެވި ކަމަށާއި އެ ވަގުތުކޮޅު ހުންނެވީ ޖަޒުބާތުން ފުރިފައި ކަމަށެވެ.

ބޯޑަރު ހުރަސް ކުރަން ހިންގަވާފައި ވަޑައިގެންނެވުމަކީ ކިމް ނިންމެވި ވަރަށް ހިތްވަރުގަދަ ނިންމެވުމެއް ކަމަށް ސައުތު ކޮރެއާގެ ރައީސް މޫން ޖައި-އިން ވިދާޅުވި އެވެ.

"ދެ ކޮރެއާގެ ގުޅުމުގައި އާ ސަފްހާއެއް މި ވަނީ ފެށިފައި،" ރައީސް މޫން ޖައި-އިން ވިދާޅުވި އެވެ.

ކުރިން 2000 އަދި 2007 ވަނަ އަހަރު ބޭއްވި ދެ ކޮރެއާގެ ވެރިންގެ ސަމިޓުގައި ކިމްގެ ބައްޕާފުޅު ކިމް ޖޮން-އިލް ވަނީ ސައުތު ކޮރެއާގެ އޭރުގެ ވެރިންނާ ބައްދަލު ކުރައްވައިފަ އެވެ.

ކިމް ވިދާޅުވީ ދެ ކޮރެއާ ބައިކުރާ ޕަންމުންޖޮމްގެ ޕީސް ހައުސް ދެން ވެގެންދާނީ ދެ ކޮރެއާ ބައިކުރާ ރަމްޒަކަށް ނޫން ކަމަށާއި އެއީ ދެ ކޮރެއާގެ ސުލްހައިގެ ރަމްޒެއް ކަމަށެވެ.