ޓްރަމްޕުގެ ވަކީލްގެ އޮފީސް އެފްބީއައި އިން ފާސްކޮށްފި

ވޮޝިންޓަން (އެޕްރީލް 10) - އެމެރިކާގެ ރައީސް ޑޮނަލްޑް ޓްރަމްޕުގެ އަމިއްލަ ވަކީލް މައިކަލް ކޯއެންގެ އޮފީސް އެފްބީއައި އިން ބަލާ ފާސްކޮށްފި އެވެ.

ނިއު ޔޯކް ޓައިމްސް އިން ބުނީ އެފްބީއައިގެ އެޖެންޓުން ވަނީ ޓްރަމްޕާ އެކު ގުޅުންތަކެއް ހިންގި ކަމަށް ބުނާ ކަސްބީ އަންހެނެއް ކަމަށްވާ ސްޓޯމީ ޑެނިއަލްސް އަށް ކޯއެން ފައިސާ ދެއްކި ކަމަށް ބުނާ ލިޔުންތައް ހޯދައިފައި ކަމަށެވެ. ކޯއެން އަކީ ޓްރަމްޕުގެ އަމިއްލަ ވަކީލަކަށް ވުރެ ގާތް ބޭފުޅެކެވެ. އެއީ ޒަމާނުއްސުރެ ދެ ރަހުމަތްތެރިންނެވެ.

ސްޓޯމީ ޑެނިއަލްސް އަށް ކޯއެން 130،000 ޑޮލަރު ދައްކާފައި ވަނީ ޓްރަމްޕާ އެކު ބޭއްވި ގުޅުންތަކުގެ ވާހަކަތައް ރިޔާސީ އިންތިޚާބުގެ ދުވަސްވަރު ނުދައްކާ މަތިންނެވެ. ކޯއެން ވިދާޅުވެފައި ވަނީ ސްޓޯމީ ޑެނިއަލްސް އަށް ދީފައި ވަނީ އޭނާގެ އަމިއްލަ ފައިސާ ކަމަށެވެ. ޑެނިއަލްސް މިދިޔަ މަހު ވަނީ ޓްރަމްޕާ އެކު ބޭއްވި ގުޅުންތައް ޓީވީ ޗެނަލަކަށް ކިޔައިދީފަ އެވެ.

ކޯއެންގެ އޮފީސް ފާސްކުރުމުން ރައީސް ޓްރަމްޕް ވަނީ އެކަމާ ހިތްހަމަޖެހިވަޑައިނުގެން އެއީ ގައުމަށް ދިން ހަމަލާއެއް ކަމަށް ވިދާޅުވެފަ އެވެ.