އޭ ލެވެލްގައި ދުނިޔެ އިން 1 ވަނަ ދިވެހި 6 ދަރިވަރަކު ހޯދައިފި

މިދިޔަ އަހަރުގެ އޭ ލެވެލް އިމްތިހާނުގައި މުޅި ދުނިޔެ އިން 1 ވަނަ ދިވެހި 6 ދަރިވަރަކު ހޯދައިފި އެވެ.

މެއި/ޖޫންގައި ބޭއްވި އިމްތިހާނުގައި، މުޅި ދުނިޔެ އިން އެއް ވަނަ ހޯދީ، އެކައުންޓުން 100 މާކްސް ހޯދި ފަސް ދަރިވަރުންނާއި ބިޒްނަސް ސްޓަޑީޒް އިން 100 މާކްސް ހޯދި ދަރިވަރެވެ.

ދަރުބާރުގޭގައި މިރޭ ބޭއްވި ރަސްމިއްޔާތުގައި މި ދަރިވަރުންނަށް، ރައީސުލްޖުމްހޫރިއްޔާގެ ޚާއްސަ އިނާމާއި އެޑިއުކޭޝަން މިނިސްޓްރީން ދޭ އިނާމު ވަނީ ހަވާލުކޮށްފަ އެވެ.

މިދިޔަ އަހަރުގެ އޭ ލެވެލް އިމްތިހާނުގައި އެކި މާއްދާތަކުން ރާއްޖޭގެ އެއް ވަނަ 13 ދަރިވަރަކު ހޯދި އެވެ.

ފަސް މާއްދާއިން އޭ ފާސް ހޯދައިގެން، ރާއްޖޭގެ ގަދަ 10ގެ އެއް ވަނައިގައި ރިކޯޑު އަދަދަކަށް މިދިޔަ އަހަރު ދަރިވަރުން ހިމެނިފައި ވެ އެވެ. އެއީ 44 ދަރިވަރުންނެވެ. މިއީ، ފާއިތުވި ތިން އަހަރުގެ ތެރޭގައި އެންމެ ގިނަ އަދަދަކަށް އޭ ލެވެލްގެ އެއް ވަނައިގައި ދަރިވަރުން ހިމެނުނު އަހަރެވެ.

އެ އިމްތިހާނުގެ ގަދަ 10ގައި 186 ދަރިވަރުން ހިމެނުނެވެ.

ދެހާސްސޯޅަ ވަނަ އަހަރުގެ އިމްތިހާނުން ރާއްޖެއިން އެއް ވަނަ ހޯދީ 38 ދަރިވަރަކެވެ. އަދި 2015 ވަނަ އަހަރު އެ އަދަދު އުޅުނީ 28 ގަ އެވެ.

މިރޭގެ ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން އެޑިއުކޭޝަން މިނިސްޓަރު ޑރ. އާއިޝަތު ޝިހާމް ވިދާޅުވީ 2013 ވަނަ އަހަރު އޭ ލެވެލްގެ އެއް ވަނަ ހޯދީ 11 ދަރިވަރުން ކަމަށެވެ. މިދިޔަ އަހަރު ދަރިވަރުން ހޯދި ނަތީޖާ އަށް ބަލައި، ތައުލީމީ ދާއިރާއަށް އައިސްފައިވާ ބޮޑު ބަދަލު ފެނިފައިވާ ކަން ފާހަގަކުރެއްވި އެވެ.

މިނިސްޓަރު ވިދާޅުވި ގޮތުގައި ފާއިތުވި ހަތަރު އަހަރުގެ ތެރޭގައި ތައުލީމީ ނިޒާމަށް ބޮޑެތި ބަދަލުތަކެއް ވަނީ އައިސްފަ އެވެ. އެގޮތުން އެ މަސައްކަތްތަކުގައި ޓީޗަރުންނާއި ބެލެނިވެރިން އަދި ސްކޫލުތަކުގެ މުވައްޒަފުން ކޮށްފައިވާ ބުރަ މަސައްކަތް ފާހަގަކުރައްވައި މިނިސްޓަރު ވަނީ ޝުކުރު އަދާކުރައްވައިފަ އެވެ.

މިދިޔަ އަހަރުގެ މެއި ޖޫންގެ އޭ ލެވެލް ގަދަ 10އެއް ހޮވީ ކުރީގައި ވެސް އޮންނަ އުސޫލަށެވެ. ނަމަވެސް ސްކޮލަޝިޕް ދީފައި ވަނީ އަލަށް އަމަލުކުރަން ފެށި އުސޫލުގެ ދަށުންނެވެ. އެއީ ފަސް މާއްދާއިން އޭ ހޯދާފައިވާ ދަރިވަރުންނަށް ހައި އެޗީވާސް ސްކޮލަޝިޕް އަދި ފަސް މާއްދާއިން އޭ ސްޓާ ހޯދާފައިވާ ދަރިވަރުންނަށް ރައީސްގެ ސްކޮލަޝިޕެވެ.

އޭޝިޔާގެ 11 ގައުމަކުން ކިޔެވޭ ހައި އެޗީވާސް ސްކޮލަޝިޕް 41 ދަރިވަރަކަށް ލިބިފައިވާއިރު ދުނިޔޭގެ ކޮންމެ ގައުމަކުން ވެސް ކިޔެވޭ ރައީސްގެ ސްކޮލަޝިޕް މި އަހަރު ލިބިފައިވަނީ އެންމެ ތިން ދަރިވަރުންނަށެވެ. އެއީ ސީއެޗްއެސްއީގެ ތިން ދަރިވަރުން ކަމަށްވާ މަރިޔަމް މަލްސާ ލިޝާމް، ފާތިމަތު ސައީދު އަދި އައިޝަތު އަޒްމާ އެވެ.