ތެޔޮ ބޯޓުގެ މުއާމަލާތަކީ އިދިކޮޅުގެ ރޭވުމަކަށް ވެދާނެ: ތޯރިގު

އުތުރު ކޮރެއާގެ ތެޔޮ ޓޭންކަރަކާ އެކު މަނާ މުއާމަލާތްތަކެއް ހިންގި ކަމަށް ޖަޕާނުގެ ފޮރިން މިނިސްޓްރީން ބުނާ ރާއްޖޭގެ ތެޔޮ ޓޭންކަރަކީ ސިޔާސީ އިދިކޮޅު ފަރާތްތަކުގެ ރޭވުމެއް ކަމަށް ޕީޕީއެމުން މިއަދު ތުހުމަތުކޮށްފި އެވެ.

ޕީޕީއެމުން ބޭއްވި ނޫސްވެރިންގެ ބައްދަލުވުމެއްގައި، ރާއްޖެ ހުރީ އުތުރު ކޮރެއާއާ އެއް މިސްރާބަކަށް ކަމަށް އިންޑިއާގެ ބޮޑުވަޒީރު ނަރެންދްރާ މޯދީ ވިދާޅުވި ވިދާޅުވުމަށް އިޝާރާތް ކުރައްވައި އެންވަޔަރަމެންޓް މިނިސްޓަރު ތޯރިގު އިބްރާހިމް ވިދާޅުވީ ތެޔޮ ޓޭންކަރުގެ މުއާމަލާތަކީ އިދިކޮޅު ފަރާތްތަކެއްގެ ރޭވުމަކަށް ވުން ގާތް ކަމަށެވެ.

"މި ކަންކަމަކީ އިދިކޮޅު ފަރާތްތަކުން ރާއްޖޭގެ ނަން ހަޑިކޮށްލުމަށް ކޮށްގެން އުޅޭ ކަމަކަށް ވުން ވެސް އެކަށީގެންވޭ،" ތޯރިގް ވިދާޅުވި އެވެ.

ޖަޕާނުގެ ފޮރިން މިނިސްޓްރީގެ ވެބްސައިޓުގައި އިއްޔެ ބުނެފައި ވަނީ ރާއްޖޭގައި ރަޖިސްޓްރީކޮށްފައިވާ ތެޔޮ ޓޭންކަރެއް ކަމަށްވާ "ޝިން ޔުއާން 18" އާއި އުތުރު ކޮރެއާގެ ތެޔޮ ޓޭންކަރެއް ކަމަށްވާ "ޗޮން މާން ސަން" ފެނުނީ މި މަހުގެ 24 ވަނަ ދުވަހުގެ ރޭ ދަންވަރު، ޝަންހާއީގެ އިރުން 250 ކިލޯމީޓަރު ބޭރުން އުތުރު ޗައިނާ ކަނޑުގެ ސަރަހައްދުން ކަމަށެވެ.

ނަމަވެސް ދިވެހި ސަރުކާރުން ވަނީ އެއީ ރާއްޖޭގައި ރަޖިސްޓްރީ ކޮށްފައިވާ ބޯޓެއް ނޫން ކަމަށް ބުނެފަ އެވެ.

ޑިފެންސް މިނިސްޓްރީން ބުނީ އެ ބޯޓުގައި ދިވެހި ދިދަ ނަގާފައިވާ މައްސަލަ ވަރަށް ސީރިއަސްކޮށް ބަލައި ތަހުގީގު ކުރަމުން އަންނަ ކަމަށެވެ.

އެ ތެޔޮ ބޯޓުގައި ދިވެހި ދިދަ ޖަހާފައި ހުރީ ރާއްޖެ އާއި އުތުރު ކޮރެއާއާ ގުޅުން އޮތް ކަން ދައްކަންވެގެން ކަމަށް ވެދާނެ ކަމަށް ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ވަނީ ވިދާޅުވެފަ އެވެ.

ނިއުކްލިއަ ބޮން އުފައްދާތީ އެމެރިކާ އާއި އދ. އިން ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅުތައް އަޅައިފަ އެވެ. އޭގެ ތެރޭގައި އެ ގައުމަށް ތެޔޮ ވިއްކުން ވެސް މަނަ އެވެ.