އެެންމެ ބޮޑު ނުތަނަވަސް ކަމަކީ އެތައް ބަޔަކު ނުހައްގުން ޖަލުގައި ތިބުން: އިމްރާން

ނުހައްގު އަނިޔާއެއްގައި ޖަލުގައި ހުންނަވާތާ 1،000 ދުވަސްވީއިރު، އޭނާގެ ހިތަށާއި ސިކުނޑިއަށް ލިބޭ އެންމެ ބޮޑު ނުތަނަވަސް ކަމަކީ، މޭ ޑޭގެ މުޒާހަރާގައި ބައިވެރިވި މީހުންގެ ތެރެއިން އެތައް ބަޔަކަށް އިންސާފު ނުލިބި ޖަލުގެ އަނިޔާވެރިކަން ތަހައްމަލު ކުރަން ޖެހުން ކަމަށް އަދާލަތު ޕާޓީގެ ރައީސް އިމްރާން އަބްދުﷲ މިރޭ ވިދާޅުވެއްޖެ އެވެ.

ރައީސް އަބްދުﷲ ޔާމީންގެ ސަރުކާރާ ދެކޮޅަށް މިހާތަނަށް ބޭއްވި އެންމެ ބޮޑު މުޒާހަރާއާ ގުޅިގެން، އިމްރާން ހައްޔަރުކޮށްފައިވާ ހުންނަތާ 1،000 ދުވަސް ފުރުން ފާހަގަކުރުމަށް ބޭއްވި ޖަލްސާގައި އޭނާގެ ފަރާތުން އިއްވި ބަޔާނުގައި ވިދާޅުވީ، މޭޑޭގެ މުޒަހާރާގެ އަދަބެއްގެ ގޮތުން، ފަސް އަހަރުގެ ޖަލު ހުކުމެއް ތަންފީޒު ކުރަމުން ދިޔަ ރައްޔިތެއްގެ ފުރާނަ ގެއްލިގެން ދިއުމަކީ ވެސް ވަރަށް ބޮޑު ހިތާމައެއް ކަމަށެވެ.

އޭނާ އެ ވިދާޅުވީ މީގެ ދެ އަހަރު ކުރިން މޭ 1، 2015 ގައި އިދިކޮޅު ފަރާތްތަކުން މާލޭގައި ބޭއްވި މުޒާހަރާގައި ހިންގި ހަމަނުޖެހުންތަކާ ގުޅިގެން، ފަސް އަހަރަށް ޖަލަށް ލި އަބްދުﷲ ރަޝީދު 51، އަށެވެ. އޭނާ މަރުވީ އެތެރެހަށީގެ ބައްޔަކަށް އައިޖީއެމްއެޗުގައި ފަރުވާ ދެމުން އަންނަނިކޮށް މިދިޔަ އަހަރުގެ އޮކްޓޯބަރު މަހު އެވެ.

އަބްދުﷲ ގެ އާއިލާއިން ތުހުމަތުކުރާ ގޮތުގައި އޭނާ މަރުވީ ޖަލުގައި ހުރިއިރު، ބޭސްފަރުވާއިން މަހުރޫމްކޮށް، ކަމާ ގުޅޭ އިދާރާތަކުން އަޅާނުލުމުންނެވެ.

މޭ ޑޭގެ މުޒާހަރާއާ ގުޅިގެން 12 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ އިމްރާންގެ ފަރާތުން އިއްވި ބަޔާނުގައި ވިދާޅުވީ، އެ ދުވަހުގެ ހަރަކާތުގައި ބައިވެރިވި މީހުންނާއި އެމީހުންގެ އާއިލާތަކުން ދިވެހި ގައުމުގެ ހައްގުގައި މަތިވެރި ގުރުބާނީއެއް ވަމުން އަންނަ ކަމަށެވެ. އަދި އެއީ ދިވެހި ތާރީޚުގައި ކުލަގަދަކޮށް ލިޔެވޭނެ ގައުމީ ޚިދުމަތެއް ކަން ހިތުގެ ފުންމިނުން ގަބޫލު ކުރައްވާ ކަމަށް އިމްރާން ވިދާޅުވި އެވެ.

އިދިކޮޅު ހަރަކާތުގެ މައި ޖަގަހަ މ. ކުނޫޒްގައި ބޭއްވި ޖަލްސާގައި އިމްރާން ވަނީ މޭ ޑޭގެ މުޒާހަރާ ނިމުނު ފަހުން، އެ ހަރަކާތުގެ ބައިވެރިންގެ ތެރެއަށް ބަޔަކު ވަދެ ހިންގި ހަމަނުޖެހުންތަކާއެކު ފްރޭމްކޮށް، ޖަލަށް ލި އެންމެން ވަގުތުން ވަގުތަށް ދޫކޮށްލުމަށް ވެސް ގޮވާލައްވައިފަ އެވެ.

އޭނާ ވިދާޅުވި ގޮތުގައި އެ މުޒާހަރާއާ ގުޅިގެން އެމްޑީޕީގެ ކުރީގެ ޗެއާޕާސަން އަލީ ވަހީދާއި ޖުމްހޫރީ ޕާޓީގެ ނައިބް ލީޑަރު އަމީން އިބްރާހީމާއި އެ ޕާޓީގެ ފޮރިން ސެކްރެޓަރީ ސޮބާހް ރަޝީދަށް ކުރިމަތިވެވަޑައިގެންނެވި ފިއްތުންތަކާ ހެދި އެ ބޭފުޅުން އަމިއްލައަށް އަރުވާލެވިގެން ރާއްޖޭން ބޭރުގައި ދިރިއުޅުއްވަން މަޖުބޫރުވެފައި ވުމަކީ ކަންބޮޑުވާ ކަމެއް ކަމަށެވެ.

އިމްރާން ވިދާޅުވީ، މި އަނިޔާވެރިކަމާއެކު ވެސް ރައްޔިތުންނަށް ކަށަވަރުކޮށް ދެއްވަން ބޭނުންވާ ކަމަކީ މީގެ 1،000 ދުވަސް ކުރިން ވެސް އޭނާ ދެއްކެވި ވާހަކަތަކުގެ މަތީގައި ސާބިތުވެ ހުންނެވިކަން ކަމަށެވެ.

"އަދި މާތް ﷲ ގެ ތަނަވަސް ރަހުމަތްފުޅާއި މަދަދާއެކު ކުރިއަށް އޮތް ތަނުގައި ވެސް ހަމަ މި ގޮތުގައި ދެމިހުންނާނެ ކަމުގެ ޔަގީންކަން އަޅުގަނޑު އަރުވަން،" ބައްޕަ އާއި އަނބިކަނބަލުން ވެސް ބައިވެރިވެވަޑައިގެންނެވި ޖަލްސާގައި އިއްވި ބަޔާނުގައި އިމްރާން ވިދާޅުވި އެވެ.

"...އިސްލާހީ ހަރަކާތުގައި ދިވެހި ރައްޔިތުން ދައްކަވަމުން ގެންދަވާ ސާބިތު ކަމަކީ އިސްލާހީ ހަރަކާތުގައި އަޅުގަނޑަށް ލިބޭ ވަރަށް ބޮޑު ހިތްވަރަކާއި ހިތްހަމަޖެހުމެއް."

އިމްރާން ވިދާޅުވީ އޭނާ ޖަލުގައި ހުންނަވަން ޖެހިވަޑައިގަތަސް ކުރީގެ ރައީސުން ކަމަށްވާ މައުމޫން އަބްދުލް ގައްޔޫމާއި މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ގިޔާދަތުގައި ހިކުމަތްތެރިކަމާއެކު، ފިސާރި ހިތްވަރާއެކު އިސްލާހީ މަސައްކަތް ކުރިއަށް ދާ ކަމުގެ ފުރިހަމަ ޔަގީންކަން ވެސް އޮތް ކަމަށެވެ.

އަދި ވިދާޅުވީ ޖަލުގައި ހުންނަވަން ޖެހިވަޑައިގަތަސް ހިތްވަރަކަށް، އަޒުމަކަށް އެއްވެސް ބަދަލެއް ނާންނާނެ ކަމަށެވެ.

"ރައީސުލްޖުމްހުރިއްޔާ ހީފުޅުކުރެއްވީ އަޅުގަނޑު ޖަލު ގޮޅީގައި ބަންދު ކުރުމުން އެ ހިސާބުން ދިވެހި ރައްޔިތުން ހައްގުގެ މަގުގައި ކުރާ މަސައްކަތް ހުއްޓާލުމަށް ފަހު، ފަހަތަށް ޖެހިދާނެ ކަމަށް،" އޭނާ ވިދާޅުވި އެވެ.