އިމްރާންގެ ފުރަތަމަ ބައްދަލުވުން އަބްދުﷲގެ އާއިލާއާ އެކު

ޓެރަރިޒަމް ތުހުމަތުގައި 12 އަހަރަށް ޖަލަށް ލާފައިވާ، އަދާލަތު ޕާޓީގެ ރައީސް ޝައިހް އިމްރާން އަބްދުﷲ ގެ ހުކުމް ތަންފީޒުކުރުން ފަސްކުރުމަށް ސުޕްރީމް ކޯޓުން އިއްޔެ ކުރި އަމުރާ އެކު، މިވަގުތަށް މިނިވަންވުމާ ގުޅިގެން، އޭނާގެ ފުރަތަމަ ބައްދަލުވުން ހާއްސަ ކުރެއްވީ ހަމަ އެފަދަ ވޭނާއި ހިތާމައެއް ތަހައްމަލް ކުރަމުންދާ އާއިލާ އަކަށެވެ. އެއީ އިމްރާން އިސްވެ ހުންނަވައިގެން މޭ 1، 2015 ގައި ބޭއްވި މޭ ޑޭގެ މުޒާހަރާއާ ގުޅިގެން މާފުށީ ޖަލުގައި ހުކުމް ތަންފީޒު ކުރަމުން ދަނިކޮށް މަރުވި އަބްދުﷲ ރަޝީދުގެ އާއިލާ އެވެ.

އިމްރާނަށް ވެސް ޖަލު ހުކުމެއް އައީ ރައީސް އަބްދުﷲ ޔާމީނާ ދެކޮޅަށް މިހާތަނަށް ބޭއްވި އެންމެ ބޮޑު އެ އެއްވުމުގައި ދެއްކެވި ވާހަކަތަކަކާ ގުޅިގެންނެވެ. އެ މުޒާހަރާ އަށް ފަހު އަބްދުﷲ ޖަލަށް ލީ، މުޒާހަރާގެ ތެރެއިން ހިނގި ހަމަނުޖެހުން ތަކެއްގައި ފުލުހަކަށް ހަމަލާދިން މައްސަލައެއްގަ އެވެ.

ފަސް ކުދިންގެ ބައްޕަ އަބްދުﷲ ގެ އަންހެނުން ޝެހެނާޒް އަބްދުއްރަހީމާއި އޭނާގެ ކުދިންނާ، އިމްރާންގެ ދެކަނބަލުން ބައްދަލުކުރެއްވީ މިއަދު ހެނދުނެވެ. އެ ގެއަށް ވަޑައިގެން އިމްރާނާއި އަނބިކަނބަލުން ވަނީ އަބްދުﷲގެ އަންހެނުންނާއި ދަރިންނާ އެކު ވަގުތު ހޭދަ ކުރައްވައިފަ އެވެ.

މިއީ އިމްރާން، މި ވަގުތަށް މިނިވަން ވި ފަހުން އާއިލާ އަކާ ބައްދަލު ކުރެއްވި ފުރަތަމަ ފަހަރު ކަމަށް އަދާލަތު ޕާޓީން ބުނެ އެވެ.

އިދިކޮޅު ކޯލިޝަންގެ އެހެން ބައެއް އިސް ބޭފުޅުން ވެސް މީގެ ކުރިން ވަނީ އަބްދުﷲގެ އާއިލާއާ ބައްދަލުކުރައްވައި ހިތްވަރު ދެއްވައިފަ އެވެ. އަދި ރައީސް ޔާމީނަށް ރިޔާސީ އިންތިޚާބު ނާކާމިޔާބުވެ ސިޔާސީ ކުށްވެރިން މިނިވަން ވުމުގެ އުފަލުގައި އަބްދުﷲ ގެ އާއިލާ ވަނީ ބައިވެރިވެފަ އެވެ.

ޖަލު ބަންދުގައި ހުއްޓައި އަބްދުﷲ 51، މަރުވީ އެތެރެހަށީގެ ބައްޔަކަށް އައިޖީއެމްއެޗުގައި ފަރުވާ ދެމުން ދަނިކޮށް މިދިޔަ އަހަރުގެ އޮކްޓޫބަރު 10 ގަ އެވެ. އޭނާ ހޮސްޕިޓަލަށް ގެންދިޔައީ ބަލިވެ އުޅޭތާ އެތައް ދުވަހެއް ވީ ފަހުންނެވެ. އެހެންކަމުން އާއިލާ އިން ތުހުމަތު ކުރަނީ އަބްދުﷲ މަރުވުމުގެ ސަބަބަކީ އެކަށީގެންވާ ފަރުވާ ނުލިބި، ޖަލުގައި ބޭއްވުން ކަމަށެވެ.

އެ ދުވަސްވަރު، މާފުށީ ޖަލުގައި ހުރި ގައިދީ އަކު އެހެން މީހަކަށް ފޮނުވި މެސެޖެއްގައި ބުނެފައި ވަނީ އަބްދުﷲ މަރުވީ ޖަލު ގޮޅީގައި ވޭންތަކެއް ތަހައްމަލް ކުރަމުން ގޮސް ކަމަށެވެ. އޭނާ އަށް އެކަށީގެންވާ ފަރުވާ ދިނުމުގައި ކަރެކްޝަނަލް ސާވިސް އިން އިހުމާލު ވެފައިވާ ކަމަށް، އަބްދުﷲގެ ހާލަތަށް އަންނަމުން ދިޔަ ބަދަލުތަކުން އެނގޭ ކަމަށް ވެސް އެ ގައިދީ ބުނެފައިވެ އެވެ. ނަމަވެސް، އެ ވާހަކަތައް ކަރެކްޝަނަލް ސާވިސް އިން ދޮގުކުރެ އެވެ.