ގިނިހިލައެއް ކަމަށް ހީކުރި އެއްޗަކީ މަތިންދާބޯޓަކުން ވައްޓާލި ނަޖިސްގަނޑެއް

މަތިން އެއްޗެއް ވެއްޓުމުން އެއީ ގިނިހިލައެއް ކަމަށް ހީކޮށް ބެލި އިރު އެއީ މަތިންދާބޯޓަކުން ވައްޓާލި ނަޖިސްގަނޑެއްކަން އެނގިއްޖެ އެވެ. މި ނަޖިސްގަނޑު ފެނުނީ އިންޑިޔާގެ ގުރުގައޮންގެ ފަޒިލްޕޫރް ބަދްލީ އަވަށުންނެވެ.

ބާރު އަޑުފައްގަނޑަކާއެކު ބޮޑު އެތިގަނޑެއް އެ އަވަށުގެ ދަނޑެއްގެ ތެރެއަށް ވެއްޓުމުން އެހިސާބުގަނޑުގައި ދިރިއުޅޭ މީހުންތައް އެތަނަށް ޖަމާވި އެވެ. "އުޑުން ވެއްޓުނު" އެއްޗަށް ވާތީ އެމީހުން ހީކުރީ އެއީ ގިނިހިލައެއް ކަމަށެވެ. އެހެންވެ ސައިންސްވެރިންގެ ޓީމަކަށް އަންގައިގެން އެމީހުން ގެނެސް ޓެސްޓްކުރިއިރު އެ އެއްޗަކީ މަތިންދާބޯޓަކުން ވައްޓާލި ބޮޑު ނަޖިސްގަނޑެކެވެ.

މިކަން ހިނގާފައި މިވަނީ ނެޝަނަލް ގްރީން ޓްރައިބިއުނަލް (އެންޖީޓީ) އިން ޑައިރެކްޓޮރޭޓް ޖެނެރަލް އޮފް ސިވިލް އޭވިއޭޝަން އަށް މިކަމާ ގުޅޭ ސާކިއުލާއެއް ފޮނުވިތާ 10 ދުވަސް ފަހުންނެވެ. މިއީ ޑިސެމްބަރު 20، 2016 ގައި ފޮނުވި ސާކިއުލާއެއް އަލުން ހަނދާންކޮށްދިނުމުގެ ގޮތުން ފޮނުވި ސާކިއުލާއެކެވެ.

މަތިންދާބޯޓު ދަތުރުކުރާ ވަގުތު ފާޚާނާ ޓޭންކް ހުސްކޮށްފައި އޭގައި ހުރި ހުރިހާ ނަޖިސް ބޭރުކޮށްލައިފި ނަމަ 50،000 ރުޕީސް އިން އެ އެއާލައިނެއް ޖޫރިމަނާ ކުރާނެކަމަށް އެ ސާކިއުލާގައި ވެއެވެ.

މި ސާކިއުލާ ނެރުނީ ދިއްލީގައި ދިރިއުޅޭ މީހަކު ކުރި ޝަކުވާއަކާ ގުޅިގެންނެވެ. އޭނާގެ ޝަކުވާގައި ބުނެފައިވަނީ ދިއްލީ އެއާޕޯޓަށް ޖައްސަން ދިޔަ އެއާކްރާފްޓަކުން އުކާލި ނަޖިސްތަކެއް އޭނާގެ ގޭތެރެއަށް ބުރައިގެން ދިޔަ ކަމަށެވެ.