އޮސްޓްރޭލިއާ ސްކޮލަޝިޕުން ކިޔެވޭނެ ދާއިރާތައް އިތުރުކޮށްފި

ރާއްޖެއަށް ކޮންމެ އަހަރަކު ވެސް އޮސްޓްރޭލިއާ އިން ދޭ ސްކޮލަޝިޕްތަކުގައި ކިޔެވޭ ދާއިރާތައް އިތުރުކޮށްފި އެވެ.

ކުރިން ހަމަޖައްސާފައި އޮންނަ ގޮތުން، އޮސްޓްރޭލިއާގެ ފުލް ސްކޮލަޝިޕެއްގައި ކިޔެވޭނީ މައިގަނޑު ހަތަރު ދާއިރާ އިން ކުރެ ކޮންމެ ދާއިރާއަކުން ވެސް ކަނޑައަޅާ ވަކި ކޯސްތަކެކެވެ. ނަމަވެސް މި ފަހުން ގެނައި ބަދަލުގައި ވަނީ، މައިގަނޑު ހަތަރު ދާއިރާގެ ތެރެއަށް ފެތޭ ނަމަ އެ ދަރިވަރު ބޭނުން ކޮންމެ ކޯހެއްގައި ވެސް ކިޔެވޭނެ އެވެ.

މިސާލަކަށް ތައުލީމްގެ ދާއިރާއިން ކުރިއަށް ދާން ބޭނުންވާ ދަރިވަރަކަށް، އެއާ ގުޅޭ ކޮންމެ އޭރިޔާއަކުން ވެސް ކިޔެވޭ ގޮތަށް ވަނީ ހަމަޖައްސައިފަ އެވެ. އެހެންކަމުން ސްކޫލް މެނޭޖްމަންޓާއި ޓީޗިން ކިޔަވަން ބޭނުން ދަރިވަރަކަށް، އެ ފުރުސަތު މިހާރު ވަނީ ފަހިކޮށްދީފަ އެވެ.

ކުރިން ހަމަޖައްސާފައި އޮތް ގޮތުން ނަމަ އޮސްޓްރޭލިއާ ސްކޮލަޝިޕްތަކުގައި ކިޔެވޭނީ، ތައުލީމީ ދާއިރާގެ ތެރެއިން ކަނޑައަޅާފައި ހުންނަ ވަކި އޭރިޔާތަކުންނެވެ. އެހެންކަމުން އެ ދަރިވަރު ކުރިއަށް ދާން ބޭނުންވާ ސީދާ ދާއިރާއަކުން ފުރުސަތު ހޯދަން އުނދަގޫވެ އެވެ.

ބޭރު ގައުމަކުން ރާއްޖެއަށް މިހާތަނަށް އެންމެ ގިނަ ދުވަސް ވަންދެން ދެމުން އަންނަ މަތީ ތައުލީމުގެ މި ފުރުސަތު އޮސްޓްރޭލިޔާ ސަރުކާރުން ދެނީ ތައުލީމް، ގުޑް ގަވަނެންސް، އިކޮނޮމިކް ޑިވެލޮޕްމަންޓް އަދި އެންވަޔަރްމަންޓް މެނޭޖްމަންޓްގެ ދާއިރާ އިންނެވެ.

އޮސްޓްރޭލިޔާ ސަރުކާރުން ރާއްޖެއަށް ސްކޮލަޝިޕް ދެމުން އަންނަތާ މިހާރު 54 އަހަރު ވެއްޖެ އެވެ. އެ ފުރުސަތުގެ ދަށުން މިހާތަނަށް 600 އަށް ވުރެ ގިނަ ދިވެހިން ވަނީ މަތީ ތައުލީމް ހާސިލްކޮށްފަ އެވެ.

އަންނަ އަހަރުގެ ފެބްރުއަރީ 1 ގައި އޮސްޓްރޭލިއާ ސްކޮލަޝިޕްތަކަށް ހުޅުވާލާނެ އެވެ. މުއްދަތު ހަމަވާނީ އޭޕްރީލް މަހަށެވެ.