މިލަންދު އަށް ނަގޫރޯޅިއެއް އަރައި ދެ ގެއަކަށް ގެއްލުންވެއްޖެ

ށ. މިލަންދު އަށް ނަގޫރޯޅިއެއް އަރައި، ދެ ގެއަކަށް ބޮޑެތި ގެއްލުންތަކެއް މިއަދު ވެއްޖެ އެވެ.

މިލަންދޫ ކައުންސިލްގެ ނައިބު ރައީސް އަހުމަދު ޝިޔާމް ވިދާޅުވީ ހެނދުނު 11:50 ހާއިރު އެ ރަށަށް އެރި ނަގޫރޯޅީގައި ދެ ގެއެއްގެ ފުރާޅު އެއްލާލާފައިވާ ކަމަށެވެ. އަދި ރަށުގެ ރައްޔިތުންނާއި ފުލުހުންނާއި އެމްއެންޑީފުން ކުރި މަސައްކަތުން އެ ގޭގައި މީހުން އުޅެވޭ ހާލަތަކަށް މިހާރު ގެނެސްފައިވާ ކަމަށް އޭނާ ވިދާޅުވި އެވެ.

"ނަގޫރޯޅި އެރި ވަގުތު ވާރޭ ރަށަށް ވެހެމުން ދިޔައީ. އެކަމަކު މިހާރު މޫސުން ވަރަށް ބޮޑަށް ރަނގަޅު،" ޝިޔާމް ވިދާޅުވި އެވެ.

ނަގޫރޯޅީގައި ގެއްލުން ލިބުނު ގޭގޭގައި ދިރިއުޅޭ އެއްވެސް ބަޔަކަށް އަނިޔާއެއް ނުވެ އެވެ.

ނަމަވެސް އެ ދެ ގޭގެ ފުރާޅާއި ސީލިން ހަލާކުވިއިރު، ގޭތެރެ އަށް ވަނީ ފެން ވަދެފަ އެވެ. އަދި ގޭގައި ހުރި ކަރަންޓު ސާމާނާއި ބައެއް ފަރުނީޗަރު ވެސް ވަނީ ހަލާކުވެފަ އެވެ.

ފ. ނިލަންދު އަށް ވެސް މިދިޔަ ޖޫން މަހު ނަގޫރޯޅިއެއް އަރައި، 10 ގެއެއްގެ ފުރާޅު އެއްލާލައި ބޮޑެތި ގެއްލުންތަކެއް ވަނީ ލިބިފަ އެވެ. އަދި ސ. ހިތަދު އަށް މިދިޔަ މޭ މަހު އެރި ނަގޫރޯޅީގައި އެ ރަށުގެ 29 ގެއަކަށް އެކި ވަރުގެ ގެއްލުންވިއިރު، 12 ގެއަކަށް ބޮޑެތި ގެއްލުންތަކެއް ލިބިފައިވެ އެވެ.

ދާދި ފަހުން، އިންޑިއާ އާއި ސްރީ ލަންކާ އަށް އެރި ތޫފާން "އޮކްޝީ" ގެ އަސަރު ރާއްޖެއަށް ކޮށްފައިވާއިރު، ވިއްސާރައިގައި ރާއްޖޭގެ 57 ރަށަކަށް ވަނީ ގެއްލުން ލިބިފަ އެވެ.