ތިމާވެއްޓަކީ ގެއްލުންދޭން އަހަރުމެންގެ އަމިއްލަ އެއްޗެއް ނޫން: މައުމޫން

ތިމާވެއްޓަކީ ގެއްލުން ދޭން އަޅުގަނޑުމެންގެ އަމިއްލަ އެއްޗެއް ނޫން ކަމަށް ވިދާޅުވެ، ހދ. ކުޅުދުއްފުށީގެ ކުޅި ހިއްކައިގެން އެއާޕޯޓު އެޅުމަށް ސަރުކާރުން ކުރަމުން އަންނަ މަސައްކަތަށް، ކުރީގެ ރައީސް މައުމޫން އަބްދުލްގައްޔޫމު ފާޑުވިދާޅުވެއްޖެ އެވެ.

ކުޅުދުއްފުށީގެ އެހެން ދިމާތައް ހިއްކައިގެން އެއާޕޯޓް ހެދެން އޮތް ނަމަވެސް، ކުޅި ހިއްކައިގެން އެކަން ކުރާތީ އެތައް ބަޔަކު ކަންބޮޑުވުން ފާޅުކުރަމުން އަންނަ މި ދަނޑިވަޅު މައުމޫން މިއަދު ކުރެއްވި ޓްވީޓެއްގައި ވިދާޅުވީ ގެއްލުން ދިނުމުގެ ބަދަލުގައި ތިމާވެއްޓަކީ އަންނަން އޮތް ޖީލުތަކަށް ހިމާޔަތް ކުރަން ޖެހޭ އެއްޗެއް ކަމަށެވެ.

ކުޅުދުއްފުށީ ކުޅި ހިއްކައިގެން މި އަހަރު އެއާޕޯޓު އަޅާނެ ކަމަށް ރައީސް އަބްދުﷲ ޔާމީން ވިދާޅުވެފައިވާއިރު، އެ ކުޅި ހިއްކުމާ ދެކޮޅަށް ކުރީގެ ރައީސް މުހައްމަދު ނަޝީދު ވެސް ވަނީ ވާހަކަ ދައްކަވާފަ އެވެ.

އެ މަނިކުފާނު ވިދާޅުވި ގޮތުގައި ކުޅުދުއްފުށީގެ ކުޅި ނައްތާލައިފި ނަމަ އެއީ "އެހެން ރަށެކެ"ވެ. އަދި ކުޅި ހިއްކައިގެން އެއާޕޯޓެއް އެޅުމަށް ވުރެ އެ ރަށަށް މުހިންމީ ރަނގަޅު ދަތުރުފަތުރުގެ ނިޒާމެއް ކަމަށް ވެސް ނަޝީދު ވަނީ ވިދާޅުވެފަ އެވެ.

ކުޅި ހިއްކުމާ ދެކޮޅަށް ބައެއް މީހުން ފާޑުކީ ނަމަވެސް، އަންނަ ހަފުތާގައި އެ މަސައްކަތް ފަށާނެ ކަމަށް އެމްޓީސީސީން ވަނީ ބުނެފަ އެވެ. ކުޅި ހިއްކުމަށް، އެ ކުންފުނީގެ ބިޔަ ކޮންނަބޯޓު، މަހާޖައްރާފު ވެސް މިހާރު ވަނީ ކުޅުދުއްފުއްޓަށް ގޮސްފަ އެވެ.

އެންވަޔަރުމެންޓް ޕްރޮޓެކްޝަން އެޖެންސީ (އީޕީއޭ) އިން އަމިއްލަ މީހަކާ ހަވާލުކޮށްގެން ހެދި އީއައިއޭ އިން ދައްކާގޮތުން ކުޅި ހިއްކައިފި ނަމަ މި ރަށުގައި ފެންބޮޑުވުން ފަދަ ބޮޑެތި ތިމާވެށީގެ މައްސަލަތައް ދިމާވާނެ އެވެ. އަދި ކުރިއަށް އޮތް ދުވަސްތަކުގައި އެފަދަ މައްސަލަތައް ބޮޑުވާނެ ކަމަށް ލަފާކޮށްފައިވެ އެވެ.

ކުޅުދުއްފުށީ މަށިކުޅި އަކީ ރާއްޖޭގެ އުތުރުގައި އޮންނަ މިފަދަ އެންމެ ބޮޑު އަދި ދިރުންތައް އެންމެ ގިނަ ކުޅި އެވެ. އެ ތަނުގައި ތަފާތު އަށް ބާވަތެއްގެ ޓްރޫ މެންގްރޫވް (ކަނޑޫފަލުގައި ހެދޭ ގަސް) ހުންނައިރު، މިއީ ރާއްޖޭން ވަރަށް ނުފެންނަ ބާވަތްތަކެވެ. އޭގެ އިތުރުން އަހަރުގެ އެކި ދުވަސްވަރު އެ ކުޅިއަށް އެކި ވައްތަރުގެ ދޫނި ވެސް ހިޖުރަކުރެ އެވެ. ކުޅުދުއްފުށީ ކުޅިއަކީ ޔޫއެންޑީޕީންނާއި އީޕީއޭއިން "ސެންސިޓިވް އޭރިއާ"އެއްގެ ގޮތުގައި ކަނޑައަޅާފައިވާ ތަނެކެވެ.