ރޮހިންޖާ އަށް އެހީވާން ބޭއްވި ޓެލެތޯނުން 11 މިލިއަން ރުފިޔާ ލިބިއްޖެ

ރޮހިންޖާގެ ހާލުގައި ޖެހިފައިވާ މުސްލިމުންނަށް އެހީވުމަށް ސަރުކާރުގެ އިސް ނެގުމަކަށް މީޑިއާތަކުން ބޭއްވި ޓެލެތޯން ރޭ ނިންމައިލި އިރު، 11 މިލިއަނަށް ވުރެ ގިނަ ރުފިޔާ ލިބިފައިވާ ކަމަށް އެ ޓެލެތޯން ބޭއްވި ކޮމެޓީން ބުނެފި އެވެ.

ރާއްޖޭގެ ގިނަ މީޑިއާތަކަކުން ދެ ދުވަހުގެ މުއްދަތަށް ކުރިއަށް ގެންދިޔަ މި ޓެލެތޯން ރޭ ނިންމައިލި އިރު، ރޮހިންޖާ ފަންޑަށް ސަރުކާރުގެ ގިނަ ކުންފުނިތަކާއި އަމިއްލަ ފަރާތްތަކުން ގިނަ އަދަދެއްގެ ފައިސާ ވަނީ ހަދިޔާ ކޮށްފަ އެވެ. ފަންޑަށް މިހާތަނަށް ލިބުނު ފައިސާގެ އަދަދު 11 މިލިއަނަށް އަރާއިރު، ރާއްޖޭގެ ގިނަ ރަށްރަށުން ލިބުނު ފައިސާ އަދި ނުގުނާ ކަމަށް އެކަން އިންތިޒާމް ކުރި ކޮމެޓީން ބުންޏެވެ.

އެ ކޮމެޓީގެ ފަރާތުން ވާހަކަ ދެއްކެވި އަދި ފަތުވާ މަޖިލީހުގެ ސެކްރެޓަރީ ޖެނެރަލް މުހައްމަދު ރިޒާ މިއަދު ވިދާޅުވީ ރަށްރަށުން އެއްކޮށްފައިވާ ފައިސާ ޖަމާކުރުމަށާއި އެކަމާ ގުޅޭ އިތުރު ހަރަކާތްތައް ބޭއްވުމަށް، އެ ފަންޑު މި މަހު 30ގެ ނިޔަލަށް ހުޅުވާފައި ބަހައްޓާނެ ކަމަށެވެ.

"30 ވަނަ ދުވަހު އަޅުގަނޑުމެން އިއުލާން ކުރާނަން ލިބިފައިވާ ފައިސާގެ ޖުމްލަ އަދަދު،" އޭނާ ވިދާޅުވި އެވެ.

މި ފަންޑަށް ސަރުކާރުގެ އެކި މިނިސްޓްރީތަކާއި އެކި ކުންފުުނިތަކުން ފައިސާ ހަދިޔާކޮށްފައިވާ އިރު މިހާތަނަށް އެންމެ ގިނަ އަދަދެއްގެ ފައިސާ ދީފައިވަނީ އެމްޕީއެލުންނެވެ. އެތަނުން 1.3 މިލިޔަން ރުފިޔާ ހަދިޔާ ކުރި އިރު މޯލްޑިވްސް އެއާޕޯޓް ކޮމްޕެނީ (އެމްއޭސީލް) އިން 1.1 މިލިޔަން ރުފިޔާ އަދި އެސްޓީއޯ އިން އެއް މިލިޔަން ރުފިޔާ ހަދިޔާކޮށްފައި ވެ އެވެ.

ރިޒާ ވިދާޅުވީ ސަރުކާރުން ހީކުރި ވަރަށް ވުރެ ބޮޑު ތަރުހީބެއް ޓެލެތޯނަށް ލިބިފައިވާ ކަމަށެވެ.

ރޮހިންޖާގެ މުސްލިމުންނަށް މި ފައިސާ ހަވާލު ކުރާނެ ގޮތެއް އަދި ސަރުކާރުން ނުނިންމަ އެވެ.

ރިޒާ ވިދާޅުވީ އާއްމުކޮށް މި ފަދަ ފައިސާ ހަވާލު ކުރަނީ އެ ގައުމެއްގެ ސަރުކާރު ނުވަތަ ބައިނަލްއަގްވާމީ ޖަމާއަތެއް މެދުވެރިކޮށްގެން ކަމަށާއި އެކަމަކު މި ހާލަތުގައި އެ ފައިސާ ހަވާލު ކުރަން ޖެހޭނީ ވަރަށް ބޮޑަށް ސަމާލުވެގެން ކަމަށެވެ. އެހެންވެ، އެކަމާ ގުޅޭ ގޮތުން ސަރުކާރުން މަޝްވަރާތައް ކުރަމުން އަންނައިރު، 30 ވަނަ ދުވަހު އެ މައުލޫމާތު ވެސް އާއްމު ކުރާނެ ކަމަށް ވިދާޅުވި އެވެ.

ރޮހިންޖާ ފަންޑަށް ފައިސާ ހޯދުމަށް، ހުކުރު ދުވަހުގެ ރޭ ފުޓުބޯޅަ މެޗުތަކަކާއި ޖޯޒީ ވިއްކުން ފަދަ ހަރަކާތްތައް ހިމެނޭ ފެސްޓިވަލެއް ބޭއްވުމަށް ވަނީ ހަމަޖައްސާފަ އެވެ.

ރޮހިންޖާގެ މުސްލިމުންނަށް އެހީވުމަށް ރާއްޖެ ޓީވީން ކުރިއަށް ގެންދިޔަ ދެ ދުވަހުގެ ޓެލެތޯނަށް ފަސް މިލިޔަނަށް ވުރެ ގިނަ ރުފިޔާ ލިބިފައިވާއިރު، އެ ފައިސާ މިހާރު ވަނީ ރެޑްކްރެސެންޓް މޯލްޑިވްސްއާ ހަވާލުކޮށްފަ އެވެ.

ހުރިހާ މީޑިއާތަކެއް ގުޅިގެން، އެންމެ ފަހުން މި ފަދަ ޓެލެތޯނެއް ކުރިއަށް ގެންގޮސްފައިވަނީ މީގެ ތިން އަހަރު ކުރިން ފަލަސްތީނުގެ ގާޒާގެ މުސްލިމުންނަށް އެހީވުމަށެވެ. ތިން ދުވަހުގެ މުއްދަތަށް ކުރިއަށް ގެންދިޔަ އެ ޓެލެތޯނަށް 20 މިލިޔަނަށް ވުރެ ގިނަ ރުފިޔާ ވަނީ ލިބިފަ އެވެ.