ޓްރަމްޕުގެ މުސްލިމުން މަނާކުރުމުގެ އަމުރަށް އަނެއްކާވެސް ލުޔެއް

ވޮޝިންޓަން (ޖުލައި 20) - އެމެރިކާ އަށް އެތެރެވާ މުސްލިމުން މަނާކުރުމަށް ރައީސް ޑޮނަލްޑް ޓްރަމްޕް ނެރުއްވި އަމުރުގެ ދަށުން މުސްލިމުންނަށް އިތުރު ލުޔެއް ސުޕްރީމް ކޯޓުން ދީފި އެވެ.

މުސްލިމް ހަ ގައުމަކުން އެމެރިކާ އަށް މީހުން ދިއުން މަނާކުރަން ރައީސް ޑޮނަލްޑް ޓްރަމްޕް މާޗް 6 ވަނަ ދުވަހު ނެރުއްވި ދެ ވަނަ އަމުރަށް މިދިޔަ މަހު 30 ވަނަ ދުވަހުން ފެށިގެން ވަނީ އަމަލު ކުރަން ފަށައިފަ އެވެ. އަމުރުގައި ޓްރަމްޕް ވަނީ އެމެރިކާގައި ދިރިއުޅޭ މީހުންގެ ތެރޭން މުސްލިމް ހަ ގައުމަށް ނިސްބަތްވާ މީހުންގެ މާމައިންނާއި ކާފައިން އަދި ތިމާގެ މީހުން ވެސް އެމެރިކާ އަށް ވަނުން މަނާކުރުމަށް ހިމަނައިފަ އެވެ. އެކަމަކު ސުޕްރީމް ކޯޓުން އެބައި މިހާރު ވަނީ އުނިކޮށްފަ އެވެ. އެހެންކަމުން އަމުރު ތަންފީޒު ކުރަން ފެށުމާ އެކު މުސްލިމް ހަ ގައުމުގެ މީހުންގެ ތެރޭން އެމެރިކާގައި ދިރިއުޅޭ މީހުންނާ އާއިލާ ގޮތުން ގާތް މީހުންނަށް ވިސާ ލިބޭނެ އެވެ.

މުސްލިމުން މަނާކުރުމުގެ މައްސަލާގައި ސުޕްރީމް ކޯޓުން ނެރެފައި ވަނީ ވަގުތީ އަމުރެކެވެ. މި މައްސަލައިގެ ފަހުގެ ހުކުމް އިއްވާނީ އޮކްޓޯބަރު މަހު އެވެ. ނަމަވެސް އެހާތަނަށް އަމުރުގެ މުއްދަތު ހަމަވާނެ އެވެ.

ޓްރަމްޕުގެ އަމުރުގައި ތިމާގެ މީހުންގެ ގޮތުގައި ބަލާފައި ވަނީ ފިރިން/އަނބިން، މައިންބަފައިން، ދަރިން، އެއްބަނޑު އެއްބަފާ މީހުންނެވެ. ފަހުން ވަނީ ލޯބިވެރިން ވެސް ތިމާގެ މީހުންގެ މާނައިގެ ތެރޭގައި ހިމަނައިފަ އެވެ. ނަމަވެސް މާމައިންނާއި ކާފައިން، ބޮޑުދައިތަ، ބޮޑުބޭބެ އަދި އެއްބަނޑު އެއްބަފާ މީހުންގެ ދަރިން ތިމާގެ މީހުންގެ ގޮތުގައި ނުހިމެނޭ ކަމަށް ޓްރަމްޕުގެ އަމުރުގައި ވަނީ ބުނެފަ އެވެ. އެކަމަކު ސުޕްރީމް ކޯޓުން ވަނީ އެބައި އުނިކޮށްފަ އެވެ.

މި އަމުރު ހިނގާނީ އީރާން، ލީބިއާ، ސީރިއާ، ސޯމާލިއާ، ސޫދާން އަދި ޔަމަނުގެ މީހުންނަށެވެ. އަމުރުގައި ވަނީ މި ގައުމުތަކުގެ މީހުން އެމެރިކާ އަށް އެތެރެވުން 90 ދުވަހަށް މަނާކޮށްފަ އެވެ. ޖެނުއަރީ މަހު ޓްރަމްޕް ނެރުއްވި ފުރަތަމަ އަމުރުގައި އިރާގު ހިމެނި ނަމަވެސް ފަހުގެ އަމުރުން އެ ގައުމު ވަނީ އުނިކޮށްފަ އެވެ.

އެމެރިކާގެ ދަށު ދެ ކޯޓަކުން ވަނީ ޓްރަމްޕް ޖެނުއަރީ މަހު ނެރުއްވި އަމުރާއި އޭގެ ފަހުން ބައެއް އިސްލާހުތަކާ އެކު މާޗު މަހު ނެރުއްވި އަމުރު ވެސް ވަގުތީ ގޮތުން ހިފަހައްޓައިފަ އެވެ.