ރެއިންބޯއިން ހިންގާ ތިން ޕްރޮޖެކްޓެއްގެ 237 އެޕާޓްމަންޓް ވިއްކައިފި

ރެއިންބޯ ކޮންސްޓްރަކްޝަން އިން މާލެ އާއި ހުޅުމާލޭގައި ހިންގާ ތިން ޕްރޮޖެކްޓެއްގެ 237 އެޕާޓްމަންޓް ވިއްކައިފި އެވެ.

ރާއްޖޭގައި ފުޅާ ދާއިރާއެއްގައި ގެދޮރު އިމާރާތްކުރުމުގެ މަސައްކަތްކުރާ ކުންފުނިން ހުޅުމާލޭގައި އަންނަނީ "އޯޝަން ފްރަންޓް"ގެ ނަމުގައި 145 އެޕާޓްމަންޓް ހިމެނޭ މަތީ ފެންވަރުގެ ކޮންޑޮމީނިއަމްއަކާއި "ރެއިން ކްރެސްޓް"ގެ ނަމުގައި 136 އެޕާޓްމަންޓް ހިމެނޭ ކޮންޑޮމީނިއަމްއަކާއި މާލޭގައި މއ. މަނާގޭގައި 37 އެޕާޓްމަންޓް ހިމެނޭ 15 ބުރީގެ އިމާރާތެއް ހެދުމުގެ މަސައްކަތްކުރަމުންނެވެ.

މިހާރު ދަރުބާރުގޭގައި ކުރިޔަށްދާ މޯލްޑިވްސް ފައިނޭންޝަލް އެކްސްޕޯގައި އެ ކުންފުނީގެ ސްޓޯލުން އަންނަނީ އެ ތިން ޕްރޮޖެކްޓާ ބެހޭ މައުލޫމާތު ކަސްޓަމަރުންނަށް ދެމުންނެވެ. އެގޮތުން އެ އެޕާޓްމަންޓްތަކުގެ ފްލޯ ޕްލޭނާއި އަގުތަކާއި އަދި އެތަން ނިމޭއިރު ހުންނާނެ ގޮތުގެ ތަފުސީލް މައުލޫމާތު ބޭނުންވާ ފަރާތްތަކަށް ދެއެވެ.

ރެއިންބޯގެ އިސް އޮފިޝަލަކު ވިދާޅުވީ މިހާތަނަށް ރެއިން ކްރެސްޓުން 90 އެޕާޓްމަންޓް، އޯޝަން ފްރަންޓުން ރެއިން 110 އެޕާޓްމަންޓް އަދި މަނާގޭ ހުރިހާ އެޕާޓްމަންޓެއް ވިކިފައިވާ ކަމަށެވެ.

"އަޅުގަނޑުމެންގެ މި ތިން ޕްރޮޖެކްޓަށް ހީނުކުރާވަރުގެ ބޮޑު ތަރުހީބެއް ދަނީ ލިބެމުން. އަދި އެކްސްޕޯގެ ސްޓޯލަށް ޒިޔާރަތްކުރި މީހުންނަށް އެ ޕްރޮޖެކްޓްގެ މައުލޫމާތު ދިނުމުން ވަރަށް ގިނަ ބަޔަކު ވަނީ ޝައުގުވެރިކަން ފާޅުކޮށް އަދި ބައެއް ފަރާތްތަކުން ވަނީ އެޕާޓްމަންޓް ގަންނަން ބުކިން ހަދާފައި،" އޭނާ ވިދާޅުވި އެވެ.

އެ ކުންފުނިން ވަނީ އެ ސްޓޯލަށް ޒިޔާރަތްކުރާ ފަރާތްތަކަށް ވައުޗަރެއް ދޫކުރަމުންނެވެ. އެޕާޓްމަންޓް ގަތުމަށް ބުކްކުރާ މީހުންނަށް ދޫކުރާ ވައުޗަރު ލިބޭ ފަރާތްތަކުގެ މެދުގައި ނެގޭ ގުރުއަތަކުން ހޮވޭ ފަރާތަކަށް މުޅި އެޕާޓްމަންޓަށް ބޭނުންވާ ފަރުނީޗަރު ހިލޭ ލިބޭނެ ކަމަށް ރެއިންބޯ އިން ބުންޏެވެ. އެ އޮފާ މިމަހުގެ ނިޔަލަށް ކުރިޔަށް ގެންދަން ވަނީ ނިންމައިފަ އެވެ.