މިހާރު ބަދަލުތައް އަންނަނީ ޕީޕީއެމްގެ ތެރެއިން: ފާރިސް

"ސަރުކާރުން ބޭނުންވި ގޮތަށް"، މަޖިލީހުގެ ރައީސްގެ އިތުބާރު ނެތް ކަމަށް ބޭނުންވާ އަދަދަށް ވޯޓު އިދިކޮޅު ފަރާތްތަކުން ވޯޓު ހަމަކޮށްފި ކަމަށާއި އޭގެ އެންމެ ބޮޑު ގުރުބާނީއެއްވި އެއް ބަޔަކީ ޕީޕީއެމްގެ ބައެއް މެމްބަރު ކަމަށް ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ވިދާޅުވެއްޖެ އެވެ.

"އަޅުގަނޑުމެން މި ހަމަކުރީ 45 ވޯޓު. މިއީ ސަރުކާރުން ބޭނުންވި އަދަދު،" މަޖިލީހުގެ ރައީސް އަބްދުﷲ މަސީހު މުހަންމަދު މަގާމުން ވަކިކުރުމަށް 45 މެމްބަރުންގެ ސޮޔާ އެކު މައްސަލަ ހުށަހެޅުމަށް ފަހު އިދިކޮޅު ފަރާތްތަކުން ބޭއްވި ނިއުސް ކޮންފަރެންސްގައި ފާރިސް ވިދާޅުވި އެވެ.

މަޖިލީހުގެ ރައީސް މަގާމުން ވަކިކުރަން ބޭނުން ނަމަ އެ މައްސަލަ ހުށަހެޅުމަށް 42 މެމްބަރުންގެ ސޮއި ބޭނުންވާނެ ކަމަށް މަޖިލީހުގެ ގަވައިދަށް ދާދިފަހުން ވަނީ ބަދަލު ގެނެސްފަ އެވެ. އެހެންވެ، އެ އަދަދަށް ވޯޓު ހޯދަން އިދިކޮޅު ފަރާތްތަކުން ވަނީ ވަރަށް ބުރަ މަސައްކަތްތަކެއް ކޮށްފަ އެވެ.

ފާރިސް ވިދާޅުވީ އެމްޑީޕީ އާއި ޖޭޕީ އާއި އިދިކޮޅު މެމްބަރުން ވަރަށް މަސައްކަތްތަކެއް ކޮށް، ވަރަށް ބޮޑު ގުރުބާނީއެއް ވެއްޖެ ކަމަށާއި އެކަމަކު މިހާރު އެކަމަށް އެ ގުރުބާނީއެއް ވަމުންް އަންނަނީ ޕީޕީއެމްގެ އެތެރެއިން ކަމަށެވެ.

"ކުރިން ތަރުތީބުވެގެން ދިޔަގޮތުން މަޖިލީހުގައި 30 ވަރަކަށް މެމްބަރުން ތިބީ އިދިކޮޅު މެމްބަރުންގެ ގޮތުގައި. މިހާރު ސަރުކާރާ ދެކޮޅަށް ވޯޓު ދޭން މިތިބީ 45 މެމްބަރުން،" އޭނާ ވިދާޅުވި އެވެ. "ޕީޕީއެމްގެ މެމްބަރުން އަޅުގަނޑުމެންނާ ވާހަކަ އެބަ ދައްކަވާ."

ފާރިސް މިއަދު ވެސް ގޮވާލެއްވީ، ގާނޫނުތައް ނުސީދާކޮށް ބޭނުން ކުރުން ސަރުކާރުން ހުއްޓާލުމަށެވެ. އަދި ނުހައްގުން މީހުންނަށް އަދަބު ދިނުމާއި ނުހައްގު ތަހުގީގުތައް ހުއްޓާލުމަށް ވެސް އޭނާ ގޮވާލެއްވި އެވެ.

"އަޅުގަނޑުމެންނަށް އެނގޭ ދެން އޮތީ ވެސް އަޅުގަނޑުމެންނަށް ދަތި ދުވަސްތަކެއް ކަން،" އޭނާ ވިދާޅުވި އެވެ.