ސައުތު ކޮރެޔާގެ ރައީސްގެ ބޮޑީގާޑް ގިނަ ބަޔަކަށް ރީތިވެއްޖެ

ޕާކިސްތާނުގެ މަގެއް މަތީގައި ސައި ވިއްކަން އުޅުނު އަރްޝަދު ޚާން ކިޔާ ޒުވާނެއްގެ ފޮޓޯއިން އިންޓަނެޓުގައި ތޫފާނެއް އުފެއްދިތާ މާ ގިނަ ދުވަހެއް އަދި ނުވެ އެވެ. އޭނާގެ ފޮޓޯ ސޯޝަލް މީޑިއާގައި ދައުރުވެ އެތައް ހާސް ބަޔަކު އޭގެ ޖާދޫގައި ޖެހުމުގެ ސަބަބުން ލިބުނު މަޝްހޫރު ކަމެއްގެ ސަބަބުން މިހާރު އޭނާ އަކީ އާއްމު ބަހުން ނަމަ ޗައިވާލާ (ސައިވިއްކާ މީހާ) އެއް ނޫނެވެ. މޮޑެލްކުރުމާއި މިއުޒިކް ވީޑިއޯތައް ކުޅުމުގެ ފުރުސަތު ލިބި އަރްޝަދުގެ ދިރިއުޅުން ވަނީ މުޅިން ބަދަލުވެފަ އެވެ.

އޭގެ ފަހުން ނޭޕާލްގައި ތަރުކާރީ ވިއްކަން އުޅުނު އަންހެން ކުއްޖެއްގެ ފޮޓޯއެއް ވެސް ސޯޝަލް މީޑިއާގައި ހަމަ މިގޮތަށް ދައުރުވެ އެ ކުއްޖާއަށް ވެސް ބޮޑު މަޝްހޫރު ކަމެއް ލިބުނެވެ.

މިހާރު އަނެއްކާ އެހެން ފިރިހެނަކަށް ދުނިޔޭގެ ގިނަ ބައެއްގެ ލޯ އަމާޒުވެއްޖެ އެވެ. އޭނާގެ ޖާދުލެއް ފަދަ ދެ ލޮލާއި ކޯތާފަތް ވަރަށް ރީތިކަމަށް ގިނަ މީހުން އެއްބަސްވެ އެވެ. މިއީ ސައުތު ކޮރެއާގެ ރައީސްގެ ބޮޑީގާޑަކަށް އުޅޭ ޒުވާނެކެވެ. އިންޓަނެޓް ބޭނުންކުރާ ގިނަ ބަޔަކަށް އެންމެ ކަމުދާ އެންމެ ރީތި ފިރިހެނާ އަކީ މި ވަގުތު ޗޮއި ޔަންގް ޖައެ އެވެ.

އަރްޝަދަށް ދިމާވި ގޮތަށް ޖައެ ވެސް ކެމެރާއާ ދިމާލަށް ބަލައިލި ވަގުތު ނަގާފައިވާ މި ފޮޓޯގެ ފުރިހަމަކަމުން ގިނަ ބަޔަކު ތިބީ ހައިރާންވެފަ އެވެ.