ކޮޅުވެއްޓި ފެނިއްޖެ، އެންމެން ވެސް ތިބީ ސަލާމަތުން

ކ. ތުލުސްދޫން ފުރައިގެން ލ. ގަމަށް ދަތުރުކުރަނިކޮށް ހަ މީހުންނާ އެކު އަންގާރަ ދުވަހު ގެއްލުނު ކޮޅުވެއްޓި ފެނިއްޖެ ކަމަށް އެމްއެންޑީއއެފުން ބުނެފި އެވެ.

އެމްއެންޑީއެފުން ބުނީ ދިވެހި ދެމަފިރިއަކު ވެސް ދަތުރުކުރި "މާރިޔާ 3" ކޮޅުވެއްޓި ފެނުނީ ލ. އިސްދޫގެ އިރު އުތުރުން 120 މޭލު ދުރުން ކަމަށެވެ. އެއިން ދަތުރުކުރި ހަ މީހުންގެ ހާލު ވެސް ރަނގަޅު ކަމަށް އެމްއެންޑީއެފްގެ ކޯސްޓްގާޑުން ބުންޏެވެ.

ސްރީ ލަންކާގެ ކުންފުންޏެއް ކަމަށްވާ ސެނޯކުގެ "މާރިޔާ-3" ތުލުސްދު އަށް ގޮސް، އެ ރަށުން ބަނދަރު ހަދާ ސާމާނުތަކެއް އަރުވައިގެން ލ. ގަމު ތުނޑީ އަވަށަށް ދިޔުމަށް ފުރީ އަންގާރަ ދުވަހު ހަވީރު އެވެ. ކޮޅުވެއްޓީގެ ހަބަރެއް އެންމެ ފަހުން ވެފައި ވަނީ އަންގާރަ ދުވަހުގެ ރޭ 9 ޖަހާކަން ހާއިރެވެ.

ކޯސްޓް ކާޑުން ބުނީ ކޮޅުވެއްޓި ފެނުނީ އެ އުޅަނދު ހޯދުމަށް ޓަކައި ހަރަކާތްތެރިވާ އިންޑިއާގެ އެއާ ކްރާފްޓަށް ކަމަށެވެ. ކޮޅުވެއްޓި އަށް ދަތުރު ނުކުރެވި އޮތީ އޭގެ ކުރީކޮޅުގެ ރޭމްޕް ވެއްޓިފައި އޮތުމުގެ ސަބަބުން ކަމަށް ވެސް ކޯސްޓް ގާޑުން ބުންޏެވެ.

ކޮޅުވެއްޓި ހޯދުމަށް ޓަކައި ވޭތުވެދިޔަ ތިން ދުވަހުގެ ތެރޭގައި ވަރަށް ފުޅާ ދާއިރާއެއްގައި ވަނީ އޮޕަރޭޝަން ހިންގައިފަ އެވެ. މި ކޮޅުވެއްޓިން ދަތުރުކުރީ ތ. ވިލުފުށީ ދެމަފިރިންގެ އިތުރުން ހަތަރު ބިދޭސީންނެވެ.