ޗައިނާގައި އުފެއްދި ފުރަތަމަ ޕަސިންޖާ ބޯޓުގެ ދަތުރެއް ކޮށްފި

ބެއިޖިން (މެއި 5) - ޗައިނާ އިން އަމިއްލަ އަށް އުފެއްދި ފުރަތަމަ ބޮޑު ޕަސިންޖާ މަތިންދާ ބޯޓުގެ ފުރަތަމަ ދަތުރު މިއަދު ބާއްވައިފި އެވެ.

ގާތްގަނޑަކަށް 90 މިނިޓްވަންދެން ދަތުރު ކުރުމަށް ފަހު ބޯޓު ވަނީ ޝަންހާއީގެ ޕުޑޮން އެއާޕޯޓަށް ޖައްސައިފަ އެވެ. ބޯޓުގެ ފުރަތަމަ ދަތުރުގައި ބައިވެރިވީ ފަސް ޕައިލެޓުންނާއި އިންޖިނޭރުންނެވެ. ބޯޓު ނައްޓާލުމުގެ ކުރިން ޗައިނާގެ ރަސްމީ ޓީވީން ބުނީ ބޯޓު ދަތުރު ކުރާނީ 3،000 މީޓަރު (9،800 ފޫޓު) އުހުން ކަމަށެވެ. މިއީ ބޯޓުތައް ދަތުރު ކުރާ އާދައިގެ އުސްމިނަށް ވުރެ 7،000 މީޓަރު ތިރި އެވެ. އަދި ބޯޓު ދަތުރު ކުރާނީ ގަޑިއަކު 300 ކިލޯމީޓަރުގެ ސްޕީޑުގައި ކަމަށެވެ.

މިއީ ދުނިޔޭގެ އޭވިއޭޝަން މާކެޓަށް ވަނުމަށް ޗައިނާ އިން ކުރަމުންދާ މަސައްކަތުގައި ކުރިއަށް އެޅި މުހިންމު ފިޔަވަޅެކެވެ. ޗައިނާގެ ކުންފުނި ކޯމެކް އިން 2008 އިން ފެށިގެން މަސައްކަތް ފެށި މަޝްރޫ އަށް އެކި މަރުހަލާތަކުގައި ވަނީ ހުރަސްތައް ކުރިމަތިވެފަ އެވެ. ބޯޓު ޓެކްސީ ކުރުމުގެ ޓެސްޓެއް މިދިޔަ އަހަރު ވަނީ ކޮށްފަ އެވެ. އެ ދަތުރުގައި ވަނީ ބްރޭކް މައްސަލައެއް ދިމާވެފަ އެވެ. ސީ919 ގެ ބޯޓު ޑިޒައިންކޮށްފައި ވަނީ ބޮއިން 737 އަދި އެއާބަސް އޭ320 ގެ ބޯޓުތަކާ އެއްހަމައެއްގައި ވާދަކުރެވޭ ގޮތަށެވެ.

ޗައިނާގައި އުފެއްދީ 168 މީހުންގެ ޖާގައިގެ ބޯޓެކެވެ. ބޯޓު އުފެއްދުމަށް ހޭދަވި ކަމަށް ޗައިނާގެ މީޑިއާތަކުން ބުނެފައި ވަނީ 50 މިލިއަން ޑޮލަރެވެ. މިއީ ބޯއިން 737 އަދި އެއާބަސް އޭ320 ގެ ބޯޓަކަށް ވުރެ ދެބައިކުޅަ އެއްބައި ހެޔޮ އަގެކެވެ. ޗައިނާގެ އުފައްދާ ބޯޓަށް 23 ކަސްޓަމަރެއްގެ ފަރާތުން 500 ބޯޓަށް މިހާރު ވެސް އޯޑަރު ލިބިފައިވާ ކަމަށްވެ އެވެ. ގިނައީ ޗައިނާގެ އެއާލައިންތަކެވެ. އެންމެ ބޮޑު ކަސްޓަމަރަކީ ޗައިނާ އީސްޓަން އެއާލައިންސް އެވެ.

ޗައިނާ އިން އަމިއްލަ އަށް މަތިންދާ ބޯޓެއް އުފެއްދުމަކީ 1970 ގެ އަހަރުތަކުން ފެށިގެން އެ ގައުމުން ކުރަމުން ދިޔަ އުއްމީދެކެވެ. އެ ދުވަސްވަރު އުފެއްދި ވައި-10 ގެ ބޯޓު މާ ބަރުވުމުން އެ މަޝްރޫއު ކާމިޔާބުވާ ގޮތެއް ނުވި އެވެ.

ޗައިނާ އިން ދާދި ފަހުން ވަނީ އެ ގައުމުން އަމިއްލަ އަށް އުފެއްދި މަތިންދާ ބޯޓު އުފުލާ މަނަވަރެއް ވެސް ދައްކާލައިފަ އެވެ.