އަނބިމީހާގެ އެކަނިވެރިކަން ފިލުވުމުގައި ފިރިއެއްގެ ނަމޫނާ

ކެލިފޯނިއާގައި އުޅޭ، އުމުރުން 17 އަހަރުގެ މެކެނާ ނިއުމަން ގަބޫލުކުރާ ގޮތުގައި އޭނާގެ ބައްޕަ އަކީ މުޅި ދުނިޔޭގައި ވެސް ހުރި އެންމެ ރަނގަޅު ބައްޕަ އެވެ.

މެކެނާގެ މަންމަ މާސީ އަށް ތައިރޮއިޑް ކެންސަރު ޖެހުނުކަން އެނގުނީ މިދިޔަ އަހަރުގެ އޮކްޓޯބަރު މަހު އެވެ. މިދިޔަ ހަފުތާގައި އޭނާއަށް ރޭޑިއޭޝަން ދޭން ޖެހުމުގެ ސަބަބުން އެއްވެސް މީހަކު އޭނާގެ ކޮޓަރިއެއް ވަނުމުގެ ހުއްދައެއް ނެތެވެ. މިދިޔަ ހުކުރު ދުވަހު މެކެނާ ޓުވީޓް ކުރި ފޮޓޯއެއްގައި އޭނާގެ ބައްޕަ، މަންމަ އެކަހެރި ނުކުރަން ކޮޓަރީގެ ބޭރުގައި ގޮނޑިއެއް ބަހައްޓައިގެން އިން މަންޒަރު ފެނެ އެވެ.

"އަހަރެންގެ މަންމައަށް ރޭޑިއޭޝަން ދީފައިވާތީ ކޮޓަރީގައި އޮންނަން ޖެހުނީ އެކަންޏެވެ. އެހެންވެ ބައްޕަ ކޮޓަރީގެ ދޮރު ކައިރީގައި މޭޒެއް ބަހައްޓައިގެން މަންމަގެ އެކަނިވެރިކަން ފިލުވައިދޭން އިނީ އެވެ."

މެކެނާ ބުނި ގޮތުގައި މަންމަ އެ ކޮޓަރީގައި އެކަނި އޮތް ހުރިހާ ވަގުތެއްގައި އޭނާގެ ބައްޕަ އިނީ ކޮޓަރީގެ ދޮރު ކައިރީގަ އެވެ. އެންމެ ވަގުތުކޮޅަކަށް ވެސް އެތަނުން ދުރަކަށް ނުދެ އެވެ. މެކެނާ ބުނި ގޮތުގައި ބައްޕަ ޖޮން މިގޮތަށް ކަންތައް ކުރާ މިއީ ފުރަތަމަ ފަހަރެއް ނޫނެވެ.

"ޑޮކްޓަރަކުގެ ކޮންމެ އެޕޮއިންޓްމަންޓަކަށް ވެސް ބައްޕަ ދާނެ. ލޭގެ ޓެސްޓެއް ހެދިޔަސް ދާނެ. ކޮންމެ ފަހަރަކު ސާޖަރީ ހަދާއިރު އާއި ރޭޑިއޭޝަން ދޭއިރު ވެސް ބައްޕަ ހުރޭ. އަދި މަންމައާ އެންމެ ގާތުގައި ނުހުރެވޭ ފަހަރު ވެސް މިގޮތަށް ވީ އެންމެ ކައިރިއަކު ހުންނާނެ،" މެކެނާ ބުންޏެވެ.

މެކެނާ މި ފޮޓޯ ޓުވީޓްކުރުމުގެ މަގްސަދަކީ އޭނާގެ މަންމަ އާއި ބައްޕަގެ އޮތް ގާތް ގުޅުން ފާހަގަ ކުރުމެވެ. ގިނަ ބަޔަކު ވަނީ މި ޓުވީޓުން ވަރަށް އަސަރުކޮށްފި ކަމަށް ބުނެ ތަފާތު މެސެޖުތައް ލިޔެފަ އެވެ. އަދި މެކެނާގެ މަންމައަށް އަވަސް ޝިފާ އަކަށް އެދިފައިވެ އެވެ.

މެކެނާ ބުނި ގޮތުގައި ބައްޕަގެ މި އަމަލުން އޭނާގެ މަންމަ އަށް ބައްޕަގެ ހިތުގައިވާ ލޯބި ވަރަށް ބޮޑަށް ހާމަވެ އެވެ. އަދި އޭނާގެ ޓުވީޓަށް ގިނަ ބަޔަކު ދިން ސަމާލުކަމުން ވަރަށް އުފާވެއްޖެ ކަމަށް ބުންޏެވެ.