އެސްޓީއޯގެ ކާޑު ގުދަން އިންޑަސްޓްރިއަލް ވިލެޖަށް ބަދަލުކުރަން ބިން ހަވާލުކޮށްފި

އެސްޓީއޯގެ ކާޑު ގުދަން މާލޭ އިންޑަސްޓްރިއަލް ވިލެޖަށް ބަދަލު ކުރުމަށް ބޭނުންވާ ބިން ހައުސިން މިނިސްޓްރީން އެ ކުންފުންޏާ މިއަދު ހަވާލުކޮށްފި އެވެ.

އެ މިނިސްޓްރީގައި ބޭއްވި ރަސްމިއްޔާތެއްގައި ބިން ހަވާލުކުރުމުގެ އެއްބަސްވުމުގައި ހައުސިން މިނިސްޓްރީގެ ފަރާތުން ސޮއި ކުރެއްވީ މިނިސްޓަރު މުހައްމަދު މުއިއްޒެވެ. އަދި އެސްޓީއޯ އިން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ޝަހީރެވެ.

އެސްޓީއޯ އިން ބުނީ މާލެތެރޭގައި ހުރި ސްޓޯރޭޖް ޔުނިޓްތައް އެއްތަނަކަށް ބަދަލުކުރުމަށް ހާއްސަ ސަމާލުކަމެއް ދޭތީ، މިކަމުގައި އެ ކުންފުނީގެ ފަރާތުން ފުރިހަމަ އެއްބާރުލުން ދެމުން އަންނަ ކަމަށެވެ.

އަދި ބުނީ އެ ބަދަލުގެ އެންމެ ބޮޑު މަގުސަދަކީ އެސްޓީއޯގެ ގުދަންތައް އެއްތަނަކަށް ބަދަލުކޮށް، ވީހާ ފުރިހަމަކޮށް، ލޮޖިސްޓިކްސްގެ ކަންކަން ކުރިއަށް ގެންދިއުން ކަމަށެވެ.

އިންޑަސްޓްރިއަލް ވިލެޖްހައި ގާއިމް ކުރާ ކާޑު ގުދަނުގެ އިމާރާތަކީ އެންމެ ޒަމާނީ ވަސީލަތްތައް ހިމެނިގެން ހަދާ، މަލްޓިސްޓޯރީ ވެއާހައުސްއެއް ކަމަށް ވެސް އެސްޓީއޯ އިން ބުންޏެވެ.

ކާޑު ގުދަން ބަދަލު ކުރަނީ އިންޑަސްޓްރިއަލް ވިލެޖްގެ ފަސް ނަމްބަރު ކޮށްޓަށެވެ. އެސްޓީއޯ ބްލޮކް 393 ވެއަހައުސްގައި މިހާރު ގުދަންކޮށްފައި ހުންނަނީ ކާޑެވެ.