އަރިދަފުސް ރޯގާގެ ހާލަތު އަންނަނީ ރަނގަޅުވަމުން، އެކަމަކު ވެސް ސަމާލުވާން ޖެހޭ: އެޗްޕީއޭ

ރާއްޖޭގެ އެކި ސަރަހައްދުތަކުގައި ފެތުރެމުންދާ އަރިދަފުސް ރޯގާ އާއި އިންފުލުއެންޒާގެ ހާލަތު ވެސް ރަނގަޅު ވަމުން އަންނަ ކަމަށް ހެލްތު ޕޮރޮޓެކްޝަން އެޖެންސީ (އެޗްޕީއޭ) އިން މިރޭ ބުނެފި އެވެ.

މިހާރު ފެތުރިފައިވާ ރޯގާ ކޮންޓްރޯލް ނުވެ ބާރު ސްޕީޑުގައި މައްޗަށް ދާ ކަމަށް އެޗްޕީއޭ އިން ނެރޭ ތަފާސް ހިސާބުތަކުން ދެއްކި ނަމަވެސް މިރޭ އެތަނުން ނެރުނު ބަޔާނުގައި ބުނީ މާލޭގައި އެޑްމިޓްކޮށްގެން ރޯގާ އަށް ފަރުވާ ހޯދާ މީހުންގެ ތެރެއިން އެޗްވަންއެންވަން އަށް ޕޮޒިޓިވްވެފައި ވަނީ 26 މީހުންގެ ކަމަށެވެ. އަތޮޅުތަކުގައި އެޑްމިޓްކޮށްގެން ފަރުވާ ހޯދާ މީހުންގެ ތެރެއިން އެޗްވަންއެންވަން އަށް ޕޮޒިޓިވްވެފައި ވަނީ ފަސް މީހުން ކަމަށް ވެސް ބަޔާނުގައިވެ އެވެ.

އެޗްޕީއޭ އިން އެޗްވަންއެންވަންގެ ތަފާސް ހިސާބުތައް ކޮންމެ ދުވަހަކު އާއްމުކުރަމުން އަޔަސް މިއަދު އެ ހިސާބުތަކެއް ނުނެރެ އެވެ. ހަމައެކަނި ހާމަކޮށްފައި މިވަނީ، އެޑްމިޓްކޮށްގެން ފަރުވާ ހޯދާ މީހުންގެ އަދަދެވެ. މިއަދުގެ ނިޔަލަށް ޕޮޒިޓިވްވީ ސީދާ އަދަދު އަދި ހާމައެއް ނުކުރެ އެވެ.

އެޗްޕީއޭ އިން ބުނިގޮތުގައި ރޯގާ ކޮންޓްރޯލްކުރުމަށް އަޅަން ޖެހޭ ހުރިހާ ފިޔަވަޅުތަކެއް އަންނަނީ އަޅަމުންނެވެ. އޭގެ ނަތީޖާއެއްގެ ގޮތުން ބަލި ޖެހޭ މީހުންގެ އަދަދު ވެސް މަދުވަމުން އަންނަ ކަމަށް އެތަނުން ބުންޏެވެ. ފްލޫ ކްލިނިކަށް ދައްކާ މީހުންގެ އަދަދު ވެސް މަދުވެ، ބައެއް ކްލިނިކްތައް ބަންދުކޮށްފައިވާ ކަން ވެސް ބަޔާނުގައި ފާހަގަކޮށްފައިވެ އެވެ.

މިގޮތަށް ހާލަތު ބަދަލުވި ނަމަވެސް އާއްމު ސާފުތާހިރުކަން ދަމަހައްޓައި ރޯގާ ޖެހިފައިވާ މީހުންނާއި ކުދިން ބޭރަށް ނުކުމެ އުޅުން މަދުކުރުމަށް އެޗްޕީއޭ އިން ވަނީ އިލްތިމާސްކޮށްފަ އެވެ.

"މާލޭގައި ފުރަތަމަ ރޯގާ ފެތުރެން ފެށި ދުވަސްވަރު ދުވާލަކު 1098 މީހުން ޑޮކްޓަރަށް ދައްކާފައިވީ ނަމަވެސް 24 މާޗް 2017 ގައި ޑޮކްޓަރަށް ދައްކާފައި ވަނީ 257 މީހުންނެވެ،" ބަޔާނުގައިވެ އެވެ.

އެޗްޕީއޭ އިން ބުނިގޮތުގައި އެޗްވަންއެންވަން ފަދަ ވައިރަލް ރޯގާ ކޮންޓްރޯލްކޮށް އިތުރަށް ފެތުރުނަ ނުދިނުމަށް ދުނިޔޭގެ ސިއްހަތު ޖަމިއްޔާ އިން، ސިއްހީ ހިދުމަތް ދޭ ތަންތަނުގެ މަސައްކަތްތައް ތަރުތީބުކުރުމަށް ތަފާތު ލެވެލްތަކެއް ކަނޑައަޅާފައިވެ އެވެ.

"ރާއްޖޭގައި މިހާރު މަސައްކަތް ކުރެވެމުންދާ ލެވެލް 3 އަކީ އެގޮތުން މިނިސްޓްރީ އާއި މިނިސްޓްރީގެ ދަށުން ހިންގާ އެކި އެކި މުއައްސަސާތަކުން ރޯގާ ފެތުރުން މަދުކުރުމުގެ މަސައްކަތް ހިންގަން ކަނޑައަޅާފައިވާ މިންގަނޑެއް ކަމަށެވެ. އަދި އެއީ ސްކޫލް ހިންގުން ބަންދުކުރުމާ ގުޅުން އޮތް ކަމެއް ނޫނެވެ،" އެޗްޕީއޭގެ ބަޔާނުގައިވެ އެވެ.

އެޗްވަންއެންވަންގައި މިހާތަނަށް ފަސް މީހަކު ވަނީ މަރުވެފަ އެވެ.

އެޗްޕީއޭ އިން އާންމު ކުރި ތަފާސް ހިސާބުތައް ދައްކާ ގޮތުން އިއްޔެގެ ނިޔަލަށް 185 މީހަކު ވަނީ އެޗްވަންއެންވަން އަށް ޕޮޒިޓިވް ވެފަ އެވެ. ހޮސްޕިޓަލުގައި އެޑްމިޓްކޮށްގެން 31 މީހަކަށް އަންނަނީ ފަރުވާދެމުންނެވެ.

މި ހާލަތުގައި ސްކޫލްތަކުގެ ކިޔެވުން މިއަދު ފެށި ނަމަވެސް އެކަމާ ދެކޮޅު ހަދައި ގިނަ ބެލެނިވެރިން ސްކޫލްތަކަށް ދަރިވަރުން ނުފޮނުވަ އެވެ.