މީޑިއާ ބިލް ފާސްކުރުމުގެ ކުރިން ފުޅާ ދާއިރާއެއްގައި މަޝްވަރާ ކުރަންޖެހޭ: ބާ ކައުންސިލް

ނޫސްވެރިކަމުގެ މިނިވަން ކަމަށް ހުރަސް އެޅޭ ގޮތަށް އެކުލަވާލައި މިއަދު ރައްޔިތުންގެ މަޖިލީހުގެ ކޮމެޓީން ފާސްކުރި މީޑިއާ ބިލުގައި ބަދަލު ގެންނަން ޖެހޭ ކަންކަން ހުރި ކަމަށް ބާ ކައުންސިލުން ބުނެފި އެވެ.

ބާ ކައުންސިލުން އެކްސްގައި ކުރި ޕޯސްޓެއްގައި ބުނީ މީޑިއާތައް ރެގިއުލޭޓުކުރާ ބިލާ ގުޅޭގޮތުން ރައްޔިތުންގެ މަޖިލީހަށް އެ ކައުންސިލުގެ ހިޔާލު ހުށަހަޅާފައިވާ ކަމަށެވެ.

ލީގަލް ރިފޯމް އެންޑް ރިސާޗް ކޮމިޝަން (އެލްއާރްއާރްސީ) ގެ ހުށަހެޅުންތަކާ އެއްގޮތަށް، ބާ ކައުންސިލުން ބުނީ އެ ކައުންސިލުން ދެކޭގޮތުގައި އެ ބިލަކީ ގާނޫނުއަސާސީގެ އުސޫލުތަކާއި ބައިނަލްއަގުވާމީ އެންމެ ރަނގަޅު އުސޫލުތަކާ އެއްގޮތަށް ބޮޑެތި އިސްލާހުތަކެއް ގެންނަންޖެހޭ ބިލެއް ކަމަށެވެ.

ބާ ކައުންސިލުން ވަނީ އެ ބިލު ގާނޫނަކަށް ހެދުމުގެ ކުރިން، މަޖިލީހުން މަސްލަހަތު އޮތް މީހުންނާ މަޝްވަރާކޮށް އާންމުންގެ ހިޔާލު ހޯދުމަށް އެކަށީގެންވާ ވަގުތު ދިނުމަށް ވެސް ގޮވާލައިފަ އެވެ.

މީޑިއާ ރެގިއުލޭޝަން ބިލު އޮތީ ނޫސްވެރިކަމުގެ މިނިވަން ކަމަށް ވަރަށް ބޮޑަށް ހުރަސް އެޅޭ ގޮތަށް ކަމަށް ވާތީ ނޫސްވެރިން ގެންދަނީ އެ ބިލު ފާސްކުރުމާ ދެކޮޅަށް ސިލްސިލާކޮށް އިހުތިޖާޖް ކުރަމުންނެވެ. އެ ކަންބޮޑުވުންތަކާ އެކު އެޓާނީ ޖެނެރަލް އެ ބިލަށް ގިނަ އިސްލާހުތަކެއް ހުށަހެޅުއްވި އެވެ

ވަކިވަކި ނޫސްވެރިންނާއި މީޑިއާތަކުގައި މަސައްކަތްކުރާ މީހުންނާ ދެކޮޅަށް ފިޔަވަޅު އަޅާ ގޮތަށް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލްގައި އޮތް މާއްދާ އުނިކުރުން އޭގެ ތެރޭގައި ހިމެނެ އެވެ.

އެ ބިލަށް ހުށަހެޅި ކަމަށް އޭޖީ އޮފީހުން ބުނި އިސްލާހުތަކުގެ ލިސްޓުގައި ހިމެނޭ އެއް ކަމަކީ ބިލުގެ 67 ވަނަ މާއްދާގެ ދަށުން ވަކިވަކި ނޫސްވެެރިންނާއި މީޑިއާތަކުގައި މަސައްކަތްކުރާ މީހުންނާ ދެކޮޅަށް ފިޔަވަޅު އަޅާ ގޮތަށް އޮތް ބައި އުނިކުރުމެވެ.

އޭޖީގެ އެ އިސްލާހުތަކާ މެދު ކޮމިޓީން ގޮތް ނިންމި ބައްދަލުވުން ކުރިން ސިއްރުކޮށްފައި ވާތީ އޭގެ ތެރެއިން ބިލުގައި ހިމަނަން ނިންމީ ކޮންކޮން އިސްލާހުތަކެއް ކަމެއް މިހާތަނަކަށް ނޭނގެ އެވެ. ކޮމިޓީ މަރުހަލާގައި ކަންބޮޑުވުން ހިއްސާކުރަމުންދިޔަ ނޫސްވެރިން ކޮމިޓީގައި ތިއްބާ ނޫސްވެރިންގެ ހަޅޭކުގެ ތެރެއިން ބިލަށް ވޯޓަށް އެހުުމުން، ޕީއެންސީ މެންބަރުންގެ އިއްތިފާގުން ވަނީ ކޮމެޓީން ބިލު ފާސްކޮށްފަ އެވެ.