ދުވުންތެރިންގެ ދުވެލި 30 އަހަރު ފަހަތަށް އޮބާލައިފި: ނަސީރު

މިދިޔަ ހޮނިހިރު ދުވަހު ނިންމާލި، ގައުމީ އެތުލެޓިކްސް މުބާރާތުގެ ބައެއް އިވެންޓްތަކުގައި ވަނަތައް ހޯދި ދުވުންތެރިންންގެ ދުވެލި ހުރީ މީގެ 30 އަހަރު ކުރިން އޭރުގެ ދުވުންތެރިން ދުވި ސްޕީޑްގައި ކަމަށް އެތުލެޓިކްސް ކޯޗު ނަސީރު އިސްމާއީލް ބުނެފި އެވެ.

ރާއްޖޭގެ ފިރިހެން، 800 މީޓަރު ރެކޯޑް އަދިވެސް އޭނާގެ ނަމުގައި އޮތް ނަސީރު ބުނީ މީޑްލް ޑިސްޓެންސް ރޭސްތަކާއި ސްޕްރިންޓް ބައެއް އިވެންޓްތަކުން ގައުމީ މުބާރާތުގައި ވަނަ ހޯދި ދުވުންތެރިންގެ ނަތީޖާ, 1990 ގެ އަހަރުތަކުގައި އޭރުގެ ދުވުންތެރިން ރޭސް ނިންމި ވަގުތަށް ވުރެ ލަސް ކަމަށެވެ.

އޭނާ ބުނީ 1999 ގައި ޝަމްހާ އަހްމަދު ސްޕރިންޓް އިވެންޓްތަކުގައި ރޭސް ނިންމި، ވަގުތަށް ވުރެ ދަށްކޮށް، ގައުމީ މުބާރާތުގައި ވަނަ ހޯދި އެތުލީޓުން ރޭސް ނިންމި ކަމަށެވެ.

މިޑްލް ޑިސްޓެންސް ރޭސްތަކުގައި ވާދަކުރި ފިރިހެން ދުވުންތެރިންގެ ސްޕީޑް ވެސް ދަށަށް ގޮސްފައިވާ ކަމަށް ކުރިން އެ އިވެންޓްގެ ރާއްޖޭގެ އެއްވަނަ ނަސީރު ބުންޏެވެ.

އޭނާ ބުނި ގޮތުގައި ސަރުކާރުން ކުޅިވަރަށް ބޮޑު ހޭދައެއްކޮށް، ގައުމީ ޓީމަށް ހޮވޭ އެތުލީޓުންނަށް ކޮންމެ މަހަކު އެލެވެންސް ދޭ އިރު ވެސް ދުވުންތެރިންގެ ދުވެލި މަޑުޖެހިފައި އޮތުމަކީ ކަންބޮޑުވުމެކެވެ.

"މިއީ 90 ގެ އަހަރުތަކެއް ނޫން. އެސޯސިއޭޝަނުން ވެސް ހުރިހާ އިސްކަމެއް އަދި އިންވެސްޓެއް މި ދެނީ ދުވުންތެރިންނަށް. އެކަމަކު އަހަރެންގެ ސުވާލަކީ ކީއްވެހޭ ކުރިއެރުން ނުފެންނަނީ،" ސޯޝަލް މީޑިއާގައި އެތުލެޓިކްސްގެ މައްސަލަތަކުގައި ކަންބޮޑުވުން ފާޅުކުރާ ނަސީރު ބުންޏެވެ.

"ގައުމީ ޓީމަށް ހޮވޭ ކޮންމެ އެތުލީޓަކަށް ވެސް 5،000ރ. ގެ މުސާރައެއް [އެލެވެންސެއް] ކޮންމެ މަހަކު އެބަދޭ. އެކަމަކު ގައުމީ ޓީމު އެތުލީޓުންވެސް ޓައިމިންތައް ވެސް ވަރަށް ދަށް. ގިނަ ކުދިން އިމްޕްރޫވެއް ނުވޭ."

އޭނާ ބުނިގޮތުގައި މިކަންބޮޑުވުމާ މެދު އެތުލެޓިކްސް އެސޯސިއޭޝަނުން އަޅާނުލާ ތިބެއްޖެނަމަ އެ ކުޅިވަރުން ހޯދި ކުރިއެރުން ދާނީ ފަހަތަށެވެ.

"މިއީ ކަންބޮޑުވާން ޖެހޭ ކަމެއް. [އެތުލެޓިކްސް] އެސޯސިއޭޝަނާއި އެތުލެޓިކްސް ކޮމިޔުނިޓީ ގުޅިގެން މިކަންކަމަށް މަސައްކަތް ކުރަން އެބަޖެހޭ،" އަމިލަ ނަމުގައި ހިންގާ "ނަސީރު ސްޕޯޓްސް އެކަޑަމީ" އިސް ކޯޗު ބުންޏެވެ.

"ހަމަ ކޮންމެ އަހަރަކު ތިން ހަތަރު މުބާރާތް ބޭއްވިޔަކަސް އަދި ކޮންމެ އަހަރަކު ތިން ފަހަރު ޓައިމް ޓްރެއަލް ބޭއްވިޔަކަސް މިކަމަށް ހައްލެއް ނުވާނެ. މިކަމަށް ސީދާ ފޯކަސްކޮށްގެން އެންމެން ގުޅިގެން އެބަޖެހޭ މަސައްކަތް ކުރަން."