އދ. އަތޮޅުގެ ފަރަކަށް އެރި ޔޮޓެއް 4.8 މިލިއަން ރުފިޔާއިން ޖޫރިމަނާކޮށްފި

އދ. އަތޮޅުގެ ފަރަކަށް އެރި ޔޮޓެއްގެ ސަބަބުން އެ ފަރަށް ލިބުނު ގެއްލުންތަކާ ގުޅިގެން 4.8 މިލިއަން ރުފިޔާ އިން ޖޫރިމަނާކޮށްފި އެވެ.

އެންވަޔަރްމެންޓަލް ޕްރޮޓެކްޝަން އެޖެންސީ (އީޕީއޭ) އިން މިއަދު ބުނީ، ސީލް މޯލްޑިވްސް ޔޮޓް ސަޕޯޓުގެ ލޯކަލް އެޖެންޓުގެ ގޮތުގައި ރާއްޖެ އައި ޓެމްޕަލް މެރިން އެލްޓީޑީގެ "އެމްވައި ބިގް ފިޝް" މިދިޔަ އޭޕްރީލް 28 ގައި ފަރަށް އެރުމުން ޖެހިގެން އައި ދުވަހު އެ އުޅަނދު ފުންކޮށްފައިވާ ކަމަށެވެ.

އެ ތަނަށް ލިބުނު ގެއްލުންތައް ބެލުމަށް އެ އުޅަނދުގެ ވެރިފަރާތުން ހަމަޖެއްސި ސާވެޔަރުންނާ އެކު، ފަރަށް އެރި ސަރަޙައްދުގައި ޖޮއިންޓު ސާވޭއެއް މިދިޔަ ޖޫން 4 ގައި ވަނީ ހަދައިފަ އެވެ. އެ ސަރަހައްދު ބެލިއިރު ފަރުގެ 187 އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބި، ހަލާކުވެފައިވާ ކަމަށް އީޕީއޭ އިން ބުންޏެވެ.

އެހެންވެ، ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވައިދުގެ ދަށުން 4.8 މިލިއަން ރުފިޔާ އިން އެ އުޅަނދުގެ ވެރިފަރާތް މިދިޔަ ހޯމަ ދުވަހު ވަނީ ޖޫރިމަނާކޮށްފަ އެވެ.

އެ ޖޫރިމަނާ ފައިސާ ދެއްކުމަށް ޓެމްޕަލް މެެރިން ކުންފުންޏަށް ދިނީ 30 ދުވަހުގެ މުއްދަތެކެވެ.