ހުޅުމާލެއަށް 52 މޭލުގެ ބާރުމިނުގައި ވައި ޖެހި، ބޮޑެތި ގެއްލުންތަކެއް!

ފަތިހުން ފެށިގެން ހުޅުމާލެއަށް އައި ވިލާގަނޑުގައި ބޮޑެތި ގެއްލުންތަކެއް ވެއްޖެ އެވެ.

މޫސުމާބެހޭ ގައުމީ އިދާރާ، މެޓް އޮފީހުގެ އޮފިޝަލަކު "މިހާރު" އަށް ވިދާޅުވީ ފަތިހުން ފެށިގެން ހެދުނާއެކު ހުޅުމާލެއަށް އައި ވިލާގަނޑުގައި 52 މޭލު ބާރުމިނުގައި ވައި ޖެހުނު ކަމަށެވެ.

އެ ވަގުތު ހުޅުމާލޭގެ އެކި ސަރަހައްދުތަކުގައި ވަނީ ހާދިސާތައް ހިނގައިފަ އެވެ.

އެގޮތުން ހުޅުމާލެ ފިތުރޯނު މަގުގައި، ވަން އެވެނިއު ކުރިމައްޗަށް އަދި އޯޝަން ފްރޮންޓް ކުރިމަތީ ހުރި ބޮޑު ފިތުރޯނު ގަހެއް އެ ކޮޅިގަނޑުގެ ތެރޭގައި މުލުން ލުހިގެން ވަނީ ސައިކަލުތަކުގެ މައްޗަށް ވެއްޓިފަ އެވެ. އެ ތަނުގައި ހުރި ހަ ވަރަކަށް ސައިކަލަށް ގެއްލުން ވެފައިވާ ކަމަށް މައުލޫމާތު ލިބެ އެވެ.

އަދި އެ މަގުގެ، މޭރީ ބްރައުން ކައިރި ހުރި އިތުރު ގަހެއްގެ ބޮޑު އޮފިގަނޑެއް ވެސް ވަނީ މަގުމައްޗަށް ވެއްޓިފަ އެވެ.

އޭގެ އިތުރުން އެ ވަގުތު ޖެހުނު ގަދަ ވައިގައި ހުޅުމާލެ ފޭސް 2ގައި ހުރި ބަސް ޓާމިނަލަކަށް ބޮޑެތި ގެއްލުންތަކެއް ވެފައިވާ ކަމުގެ މައުލޫމާތު ވެސް ވަނީ ލިބިފަ އެވެ.

ކުރިއަށް އޮތް ތިން ދުވަހު ރާއްޖޭގެ އެކި ހިސާބުތަކަށް މޫސުން ގޯސް ވާނެކަމަށް މެޓުން ވަނީ ލަފާކޮށްފަ އެވެ. އެންމެ ބޮޑަށް މޫސުން ގޯސްވާނެކަމަށް ލަފާކޮށްފައި ވަނީ އުތުރާއި މެދުރާއްޖެ ތެރެއަށެވެ.

ހއ. އަތޮޅުން ފެށިގެން ފ. އަތޮޅަށް ޔެލޯ އެލާޓް ނެރެފައި ވާއިރު، އެ ހިސާބުތަކަށް ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 45 މޭލަށް ވައި ގަދަވެ ކަނޑުތައް ވަރަށް ގަދަވާނެ ކަމަށް މެޓުން ލަފާކޮށްފައިވެ އެވެ.

އަދި ލ. އަތޮޅުން ފެށިގެން އައްޑުއާ ހަމައަށް ވަނީ ވައިޓް އެލާޓް ނެރެފަ އެވެ.

ހަފްތާ ބަންދުގައި މޫސުން ގޯސްވާނެ ކަމަށް ލަފާކުރެވޭތީ މެޓުން ވަނީ ކަނޑު ދަތުރު ކުރުމުގައި ސަމާލުވުމަށް އިލްތިމާސް ކޮށްފަ އެވެ.