ބަޔޯމެޑިކަލް ރިސާޗް ސައިންޓިސްޓް ޑރ. އިބްރާހީމް މުސްތަފާ އަވަހާރަވެއްޖެ

ސިއްހީ ދާއިރާ އަށް ގިނަ ހިދުމަތްތަކެއް ކުރައްވާފައިވާ ބަޔޯމެޑިކަލް ރިސާޗް ސައިންޓިސްޓް ޑރ. އިބްރާހީމް މުސްތަފާ ރޭ އަވަހާރަވެއްޖެ އެވެ.

އެނގިފައިވާ ގޮތުގައި، އުމުރުން 57 އަހަރުގައި ޑރ. އިބްރާހީމް އަވަހާރަވީ އާލާސްކަންފުޅާ އުޅުއްވާތާ ގިނަ ދުވަސްތަކެއް ފަހުން، އިތުރު ފަރުވާއަށް އިންޑިއާގެ ކޮޗިންއަށް ގެންދިޔަ ތަނާ އެވެ.

އައްޑޫ ހުޅުދު އަށް އުފަން، ޑރ. އިބްރާހީމް ދިރިއުޅުއްވަނީ އާއިލާއާ އެކު ޔޫއޭއީގެ ދުބާއީގަ އެވެ. އިތުރު ފަރުވާއަށް އޭނާ ކޮޗިން އަށް ގެންދިޔައީ ރޭގެ ވަގުތެއްގަ އެވެ.

އޭނާ އެންމެ ފަހުން ހުންނެވީ ޔޫއޭއީގެ ހަޔާ ކޮލެޖް އޮފް ޓެކްނޮލޮޖީގެ އެސިސްޓެންޓް ޕްރޮފެސާ އޮފް ބަޔޯމެޑިކަލް ސައިންސްގެ މަގާމުގަ އެވެ.

ޑރ. އިބްރާހިމްގެ ޖަނާޒާގެ ކަންކަން މިއަދުގެ އަސަރުގެ ނަމާދަށް ފަހު ކޮޗިންގައި ބާއްވަން ވަނީ ނިންމައިފަ އެވެ.

ސިއްހީ ދާއިރާއިން ގިނަ ދިރާސާތަކެއް ކުރައްވާފައިވާ ޑރ. އިބްރާހީމް ޕީއެޗްޑީ ހެއްދެވީ ޕެތޮލޮޖީ އެންޑް ލެބޯޓްރީ މެޑިސިންގެ ދާއިރާއިން ކެނެޑާގެ ޔުނިވާސިޓީ އޮފް ބްރިޓިޝް ކޮލޮމްބިއާ އިންނެވެ. ހާއްސަކޮށް ތެލެސީމިއާގެ ދާއިރާއިން ގިނަ ދިރާސާތަކެއް ހައްދަވާފައިވެ އެވެ.

ޑރ. އިބްރާހިމް ވަނީ މޯލްޑިވްސް ބްލަޑް ސާވިސް އުފެއްދެވުމުގައި އިސްދައުރެއް އަދާކުރައްވައިފަ އެވެ. އަދި ކެންސާ ސޮސައިޓީ އޮފް މޯލްޑިވްސްގެ ނައިބު ރައީސްކަން ކުރެއްވި އެވެ.

ޝީގެ ބައެއް މަގާމުތައް އަދާކުރެއްވުމުގެ އިތުރުން އައިޖީއެމްއެޗުގައި ވެސް އޭނާ މަސައްކަތްކުރެއްވި އެވެ.