މެލޭޝިއާގައި ކިޔަވާ ކުދިންނަށް ޓެކްސް ފައިސާ ހަމަޖައްސަން އަންނަނީ މަސައްކަތް ކުރަމުން: މިނިސްޓްރީ

މެލޭޝިއާގައި ކިޔަވާ އެހެން ގައުމުތަކުގެ ކުދިންގެ އަތުން ނަގަން އެ ގައުމުން ނިންމި ޓެކްސް ފައިސާ އެ ގައުމުގައި ކިޔަވާ ދިވެހި ދަރިވަރުންނަށް ހަމަޖައްސައިދޭން މަސައްކަތް ކުރަމުން އަންނަ ކަމަށް ހަޔަ އެޑިޔުކޭޝަން މިނިސްޓްރީން ބުނެފި އެވެ.

މެލޭޝިއާގެ އަމިއްލަ ކޮލެޖުތަކާއި ޔުނިވާސިޓީތަކާއި ޕްރީ ސްކޫލް އަދި އެހެނިހެން ތައުލީމު އުގަންނައިދޭ ތަންތަނުގައި ކިޔަވާ އެހެން ގައުމުތަކުގެ ކުދިންގެ ތެރެއިން އަހަރަކު 60،000 މެލޭޝިއަން ރިންގިޓަށްވުރެ އަގުބޮޑު ބޮޑު ކޯސް ފީއެއް ދައްކަން ޖެހޭ ކުދިންގެ އަތުން ހަ ޕަސެންޓުގެ ޓެކްސްއެއް ނަގަން ވަނީ ނިންމައިފަ އެވެ.

ހަޔާަ އެޑިޔުކޭޝަން މިނިސްޓްރީން ބުނީ މެލޭޝިއާގައި ކިޔަވާ ކުދިންނާއި އެހެން ގައުމުތަކުގައި ކިޔަވަމުން އަންނަ ކުދިންނަށް ވެސް ހަމަޖެހިފައިވާ އުސޫލުން ފައިސާ ފޮނުވަމުން އަންނަ ކަމަށެވެ.

"އަހަރަކު 60،000 މެލޭޝިއަން ރިންގިޓަށްވުރެ ބޮޑު ކޯސް ފީ އެއް ދައްކަން ޖެހޭ ކުދިންގެ އަތުން އަލަށް ނަގަން ހަމަޖެއްސި ޓެކްސް ވެސް ސްކޮލާޝިޕްގައި ތިބި ދިވެހި ކުދިންގެ އިންވޮއިސްގައި ހިމެނިގެން ލިބުމުން އެ ފައިސާ ގެންދާނީ ދޫކުރަމުން،" މިނިސްޓްރީން އެކްސްގައި ކުރި ޕޯސްޓުގައިވެ އެވެ.

މެލޭޝިއާއިން 2015 ވަނަ އަހަރު އެކުލަވާލި އެޑިއުކޭޝަން ތަރައްގީ ކުރުމުގެ ގައުމީ ޕްލޭންގެ ދަށުން، މި އަހަރުގެ ނިޔަލަށް ބޭރުގެ 250،000 ދަރިވަރުންނަށް އެ ގައުމުގައި ކިޔެވުމުގެ ފުރުސަތު ދިނުމުގެ އަމާޒެއް ވަނީ ކަނޑައަޅައިފަ އެވެ. މި ޓެކްސްގެ ސަބަބުން އެ އަމާޒަށް ވާސިލްވާން ދަތިވާނެ ކަމަށް އެ ގައުމުގެ ތަޖުރިބާކާރުން ވިދާޅުވެ ކަންބޮޑުވުން ފާޅުކޮށްފައިވެ އެވެ.