މޮރޮކޯގައި ކިޔަވަން 20 ސްކޮލާޝިޕަށް ހުޅުވާލައިފި

ކޯހުގެ ހުރިހާ ހަރަދެއް ހިމެނޭހެން މޮރޮކޯގައި ކިޔަވަން 20 ސްކޮލާޝިޕްގެ ފުރުސަތު ހަޔާ އެޑިޔުކޭޝަން މިނިސްޓްރީން ހުޅުވާލައިފި އެވެ.

އެ ފުރުސަތު ހުޅުވާލީ ބޭނުން ދާއިރާއަކުން ބެޗްލާސް އާއި މާސްޓާސް އަދި ޕީއެޗްޑީއަށް ކިޔެވުމަށެވެ.

މިނިސްޓްރީން ބުނި ގޮތުގައި ކޯހުގެ ހުރިހާ ހަރަދެއް އެ ސްކޮލާޝިޕްގައި ލިބޭނެ އެވެ.

މޮރޮކޯގެ 20 ސްކޮލާޝިޕްގެ ތަފްސީލް

- ބެޗްލާސް ޑިގްރީގެ 7 ފުރުސަތު

- މާސްޓާސް ޑިގްރީގެ 8 ފުރުސަތު

- ޕީއެޗްޑީގެ 5 ފުރުސަތު

މި ސްކޮލާޝިޕްގައި ބެޗްލާސް ޑިގްރީއަށް ކިޔަވަން ދާން ބޭނުންވާ ދަރިވަރުންގެ ޝަރުތުތަކުގެ ތެރޭގައި އޯ ލެވެލްގެ ފަސް މާއްދާއިން ސީ އިން މަތިން ފާސްވުމާއި އޭ ލެވެލްގައި ތިން މާއްދާ އިން އީ އިން ފެށިގެން މަތިން ފާސްވެފައިވުމެވެ.

މާސްޓާސް ކޯހަށް އެދޭ ދަރިވަރުން، އެ ކޯހަކާ ގުޅޭ ދާއިރާއަކުން ބެޗްލާސް ޑިގްރީއެއް އޮންނަން ޖެހެ އެވެ. އަދި ސްކޮލަޝިޕަށް ހުށަހަޅާ ޔުނިވާސިޓީ އަކުން އިތުރު ޝަރުތެއް ހުށަހަޅާ ނަމަ ކުރިމަތިލެވޭނީ، އެ ޝަރުތު ހަމަވާ ދަރިވަރަކަށެވެ. ޕީއެޗްޑީގެ ފުރުސަތަށް ހުށަހެޅޭނީ، ކުރިމަތިލާ ކޯހަކާ ގުޅޭ ގޮތުން މާސްޓާސް ޑިގްރީއެއް އޮތް މީހުންނަށެވެ.

މިނިސްޓްރީން ބުނީ ސްކޮލާޝިފް ބޭނުންވާ ދަރިވަރުން އެޕްލިކޭޝަނާއި އެކުގައި ތައުލީމީ ސެޓިފިކެޓްގެ އިތުރުން ހަޔާ އެޑިއުކޭޝަން މިނިސްޓްރީން އެދޭ ލިޔެކިޔުންތައް ހުށަހަޅާނީ އެ މިނިސްޓްރީގެ ފޯޓަލް "މައި އެޑިޔުކޭޝަން" މެދިވެރިކޮށް ކަމަށެވެ.

ސްކޮލާޝިޕަށް އެދި މި މަހުގެ 13 ވަނަ ދުވަހާ ހަމައަށް ހުށަހެޅޭނެ އެވެ.