ރާއްޖެއިން ބޭރުގައި ކިޔަވާ ކުދިންގެ ދަފްތަރެއް ފުރަތަމަ ފަހަރަށް ހަދައިފި

ރާއްޖެއިން ބޭރުގައި ކިޔަވާ ދަރިވަރުންގެ މައުލޫމާތު ހިމެނޭ ދަފްތަރެއް ހަދައިފި އެވެ.

ހަޔާ އެޑިޔުކޭޝަން މިނިސްޓްރީން ބުނީ މިއީ ބޭރުގައި ކިޔަވާ ދިވެހި ދަރިވަރުންގެ ދަފްތަރެއް އެކުލަވާލި ފުރަތަމަ ފަހަރު ކަމަށެވެ.

އެ ދަފްތަރުގައި މިހާތަނަށް 2،116 ދަރިވަރަކު ރަޖިސްޓްރީ ވެފައިވެ އެވެ. އެއީ 915 ފިރިހެން ދަރިވަރުންނާއި 1،201 އަންހެން ދަރިވަރުންނެވެ.

މިނިސްޓްރީން ބުނި ގޮތުގައި ދަރިވަރުންގެ ދަފްތަރެއް ހެދުމުގެ މަގްސަދަކީ ބޭރުގެ އެކި ގައުމުތަކުގައި މަތީ ތައުލީމް ހާސިލުކުރަމުން އަންނަ ދަރިވަރުންނާއި ގުޅޭ މުހިއްމު ކަންކަން ބެލެހެއްޓުމުގައި ލުއި ފަސޭހަކަން ހޯދައިދިނުމެވެ.

އެ ދަފްތަރުގެ ސަބަބުން ދަރިވަރުންނަށް ބޭނުންވާ އެހީތެރިކަމާއި އެއްބާރުލުން ސަރުކާރުން ފޯރުކޮށްދިނުމަށް ފަސޭހަވެގެން ދާނެ ކަމަށް ވެސް މިނިސްޓްރީން ބުންޏެވެ.

އޭ ލެވެލްގެ ފަސް މާއްދާ އިން "އޭ ސްޓާ" ހޯދުމުން ރައީސްގެ ހާއްސަ ސްކޮލާޝިޕާއި ފަސް މާއްދާ އިން އޭ ފާސް ހޯދުމުން ހައި އެޗީވާސް ސްކޮލާޝިޕް ދިވެހި ސަރުކާރުން ދެނީ ކޮންމެ ގައުމެއްގެ ކޮންމެ ޔުނިވާސިޓީއެއްގައި ވެސް ކިޔެވޭ ގޮތަށެވެ.

އެގޮތުން މި އަހަރު ރައީސް ދެއްވާ ހާއްސަ ސްކޮލާޝިޕް 19 ދަރިވަރަކަށް އަދި ހައި އެޗީވާސް ސްކޮލާޝިޕް 119 ދަރިވަރުންނަށް ވަނީ ދީފަ އެވެ.

އޭގެ އިތުރުން ސްޓޫޑެންޓް ލޯނަށް އެދުނު 1،384 ދަރިވަރުންނަށް ލޯނު ދޫކޮށްފައި ވާއިރު، 582 ދަރިވަރުން ވަނީ ކިޔަވަން ފަށައިފަ އެވެ. އަދި ސްކޮލާޝިޕް ސްކީމް 345 ދަރިވަރަކަށް ދީފައިވާއިރު އޭގެ ތެރެއިން 137 ދަރިވަރުން މިހާރު ވަނީ ކިޔެވުން ފަށައިފަ އެވެ.