ސްމޯލީގެ ޑިމާންޑަކީ އެފްއޭއެމް އަތުން އެއް މިލިއަން ޑޮލަރު ހޯދަން

އެފްއޭއެމްގެ ކުރީގެ ޓެކްނިކަލް ޑައިރެކްޓަރު އިންގްލެންޑްގެ ޕޯލް ތޯމަސް ސްމޯލީ، އެ އެސޯސިއޭޝަނުން އެއް މިލިއަން ޑޮލަރު ހޯދަން ޑިމާންޑް ކޮށްފި އެވެ.

އެފްއޭއެމްގެ ކުރީގެ ލިޑާޝިޕުން އެ އިދާރާގެ ޓެކްނިކަލް މަސައްކަތުގެ އެންމެ އިސް މަގާމަށް ސްމޯލީ ހަމަޖެއްސީ ޖުލައި 2023 ގަ އެވެ.

އޭގެ ކުރިން ބަންގްލަދޭޝްގެ އެފްއޭގެ ޓެކްނިކަލް ޑައިރެކްޓަރުގެ މަގާމު އަދާކުރި ސްމޯލީއާ އެކު އެފްއޭއެމުން އެއްބަސްވުން ހެދީ ފަސް އަހަރުގެ މުއްދަތަކަށެވެ.

އެކަމަކު އެއްބަސްވުމަށް އަހަރެއް ފަހުން ރާއްޖޭގެ މަގާމުން އޭނާ އަތް ދޫކޮށްލި އެވެ. އެފްއޭއެމްގެ އޭރުގެ އެކްޓިން ޖެނަރަލް ސެކްރެޓަރީ މުހައްމަދު ޖައުޝަން ޝަރީފް އޭރު ވިދާޅުވީ ސްމޯލީ ރާއްޖެ ދޫކޮށް ދިޔައީ އޭނާއާ އެކު ހެދި އެއްބަސްވުން ހަމަވުމުން ކަމަށެވެ.

ޖައުޝަން އޭރު ވިދާޅުވި ގޮތުން ގަތަރު އެފްއޭއިން މުސާރަ ދޭ ގޮތަށް ސްމޯލީއާ އެކު ސޮއި ކުރީ އަހަރުން އަހަރަށް އެއްބަސްވުން އާ ކުރާ ގޮތަށެވެ.

އެކަމަކު އޭނާ މިހާރު ޑިމާންޑް ކުރަނީ އޭނާއާ އެކު އެއްބަސްވުން ހެދި ފަސް އަހަރުގެ މުއްދަތުގެ މުސާރައަށް ވާ އެއް މިލިއަން ޑޮލަރު ހޯދުމަށެވެ.

އޭނާއާ އެކު އެއްބަސްވުމުގައި ސޮއި ކުރުމަށް ބޭއްވި ޕްރެސް ކޮންފަރެންސްގައި އެފްއޭއެމްގެ އޭރު ރައީސް ބައްސާމް އަދީލް ޖަލީލް ވިދާޅުވީ ސްމޯލީގެ މުސާރަ ހާމަ ކުރެވެން ނެތް ކަމަށެވެ. އެއީ ގަތަރުގެ އެފްއޭއާ އެކު އޮގޮތަށް އެއްބަސްވެފައިވުމުން ކަމަށް ބައްސާމް ވިދާޅުވެފައިވެ އެވެ.

"މިހާރު" އަށް އެނގިފައިވާ ގޮތުގައި ސްމޯލީ އަށް މުސާރައިގެ ގޮތުގައި މަހަކު 20،000 ޑޮލަރު (308،400ރ.) ދިނުމަށް އެފްއޭއެމުން އެއްބަސްވި އެވެ.

އޭނާ ޑިމާންޑް ކުރަނީ އޭނާ އަށް ފަސް އަހަރުތެރޭ ދޭން ޖެހޭ މުސާރައަށް ވާ 1.2 މިލިއަން ޑޮލަރު (18.5 މިލިއަން ރުފިޔާ) ހޯދުމަށެވެ.

އެ ފައިސާ އެފްއޭއެމުން ހޯދަން އޭނާ ވަނީ އެފްއޭއެމަށް ހުށަހަޅާފަ އެވެ.

ރާއްޖޭގެ މަގާމާ އޭނާ 2023 ގައި ހަވާލުވީ ބަންގްލަދޭޝްގެ އެފްއޭއާ އެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާން ބާކީ އެއް އަހަރު އޮއްވަ އެވެ. ބަންގްލަދޭޝްގެ މީޑިއާތަކުން ތުހުމަތު ކުރަނީ ބަންގަލަދޭޝްގެ ކޮންޓްރެކްޓް އާ ކުރަން އޭނާ ބޭނުން ނުވީ މުސާރަ ބޮޑުކޮށް ދޭން އެ ފެޑެރޭޝަނުން ބޭނުން ނުވުމުންނެވެ. ނަމަވެސް އެ ތުހުމަތުތައް ސްމޯލީ ދޮގު ކުރި އެވެ.

ސްމޯލީގެ މަސައްކަތާ މެދު ބައެއް ފަރާތްތަކުން ސުވާލު އުފައްދަ އެވެ. އޭނާ ރާއްޖޭގައި ބޭއްވި އޭ ލައިސެންސް ކޯޗިން ކޯސް އޭއެފްސީން އެޕްރޫވް ނުކުރާތީ ކޯސް ފުރިހަމަ ކުރި ކޯޗުންނަށް އަދިވެސް ލައިސެންސެއް ނުލިބެ އެވެ.