ކާޑު ހަވާލުކުރަން ހުރި ދަތިތައް ހައްލުކުރުމަށް މެއިލިން އެޑްރެސް އަޕްޑޭޓްކުރަން ބީއެމްއެލް އިން އެދިއްޖެ

މާލެ ސަރަހައްދުގައި ދިރިއުޅޭ ކަސްޓަމަރުންނަށް މޯލްޑިވްސް ޕޯސްޓް މެދުވެރިކޮށް ކަސްޓަމަރުންގެ ގެއަށް ކާޑު ފޮނުވައިދިނުމުގައި ދިމާވާ ދަތިތައް ހައްލުކުރުމުގެ ގޮތުން ކަސްޓަމަރުންގެ މެއިލިން އެޑްރެސް އަޕްޑޭޓްކުރުމަށް ބެންކް އޮފް މޯލްޑިވްސްއިން އިލްތިމާސްކޮށްފި އެވެ.

ބީއެމްއެލްގެ ހެޑް އޮފް ބްރޭންޑް އެންޑް މާކެޓިން ސްޓެރެޓެޖީ މުހައްމަދު ސައީދު ވިދާޅުވީ ކަސްޓަމަރުންނަށް ރައްކާތެރިކަމާއި އެކު ވީހާވެސް އަވަހަކަށް ކާޑު ހަވާލު ކުރުމަކީ އެ ބެންކުން އިސްކަންދޭ ކަމެއް ކަމަށެވެ. އަދި ކަސްޓަމަރުންނަށް ކާޑު ހަވާލުކުރުމުގައި ދިމާވާ އެންމެ ބޮޑު ގޮންޖެހުމަކީ ކަސްޓަމަރުންނަށް ކާޑު ޑެލިވާކުރަން ޖަހާފައިވާ މެއިލިން އެޑްރެހުގައި ކަސްޓަމަރު ދިރިނޫޅުން ކަމަށާއި އެ މައްސަލަ ހައްލުކުރުމުގެ ގޮތުން މެއިލިން އެޑްރެސް އަޕްޑޭޓުކުރަން ޖެހޭ ކަމަށް ވިދާޅުވި އެވެ.

" އެންމެ ބޮޑަށް ފާހަގަކުރެވެނީ ކަސްޓަމަރުން ބޭންކަށް ދީފައި އޮންނަ އެޑްރެހުގައި ދިރިއުޅެމުން ނުދާކަން. ނުވަތަ މެއިލިން އެޑްރެހުގެ ގޮތުގައި ދާއިމީ އެޑްރެސްވެސް ދީފައި އޮންނަކަން ފާހަގަކުރެވޭ. އިންޓާނެޓް ބޭންކިން އަދި މޮބައިލް ބޭންކިން އެޕް މެދުވެރިކޮށް އެޑްރެސް އަޕްޑޭޓް ކުރެވޭނެ." އޭނާ ވިދާޅުވި އެވެ.

ކާޑުގެ ރައްކާތެރިކަން ކަށަވަރުކުރުމުގެ ގޮތުން ކާޑު ކަސްޓަމަރަށް ހަވާލުކުރުމާ ހަމައަށް، ކާޑު އެކްޓިވޭޓެއް ނުވާނެ ކަމަށް ސައީދު ވިދާޅުވި އެވެ.

"ކާޑު އެކްޓިވޭޓް ކުރެވޭނީ ހަމައެކަނި އެ ކަސްޓަމަރަކަށް. ބޭންކުން ކަސްޓަމަރުންގެ ކާޑު އެކްޓިވޭޓް ނުކޮށްދޭނެ. ކަސްޓަމަރަށް ކާޑު ލިބުމުން އިންޓަރނެޓް ބޭންކިން ނުވަތަ މޮބައިލް ބޭންކިން އެޕް މެދުވެރިކޮށް ވަގުތުން ކާޑު އެކްޓިވޭޓްކޮށްލެވޭނެ." ސައީދު ވިދާޅުވި އެވެ.

މާލޭ ސަރަހައްދުގައި މިބަދަލު ގެނައި ނަމަވެސް އަތޮޅު ތެރޭގައި ކަސްޓަމަރުންނަށް ކާޑު ހަވާލުކުރަމުން ދާނީ ބީއެމްއެލްގެ މުވައްޒަފުންނެވެ.