މަސްތުވެގެން ތިއްބާ ހާފްވޭ ހައުސް އިން ދެ މީހަކު ހައްޔަރުކޮށްފި

މަސްތުން ސަލާމަތްވާން ބޭނުންވާ މީހުންނަށް ހުޅުމާލޭގައި ހިންގާ ހާފްވޭ ހައުސްގައި ފަރުވާ ހޯދަމުން ދިޔަ ދެ މީހަކު މަސްތުގެ ހާލަތުގައި އެތަނުގެ ތެރެއިން ހައްޔަރުކޮށްފި އެވެ.

މި މައްސަލައިގައި ހައްޔަރުކޮށްފައިވަނީ އުމުރުން 42 އަހަރުގެ އިކުލީލް އިބްރާހިމް، ވިދާތަރި/ގއ. ކަނޑުހުޅުދޫ އަދި އުމުރުން 33 އަހަރުގެ އަބްދުﷲ ޝާފިއު، ރެޑްރޯސް/އދ. މަހިބަދޫ އެވެ.

މި ދެ މީހުން އިއްޔެ ކްރިމިނަލް ކޯޓަށް ހާޒިރުކޮށް ފުލުހުން ބުނެފައިވަނީ މި ދެ މީހުން ހައްޔަރުކުރީ ހާފްވޭ ހައުސް ބަލައި ފާސްކުރުމުގެ ތެރޭގައި މި މީހުން މަސްތުގެ ހާލަތުގައި ތިބި ކަމަށް ޝައްކުވެގެން ކަމަށެވެ. އެ މީހުން އޭރު ރަނގަޅަށް އިށީނދެގެން ވެސް ނުތިބެވޭ ކަމަށާއި އިށީނދެ އިންނައިރު ވެއްޓޭ ކަމަށް ފުލުހުން ބުނެފައިވެ އެވެ.

އެހެންވެ ދެ މީހުން ހައްޔަރުކޮށް ކުޑަކަމުދާ ތަކެތި ޓެސްޓުކުރި އިކުލީލް ވަނީ އޯޕީއައި، ބެންޒޯ އަށް ޕޮޒިޓިވް ވެފަ އެވެ. އަދި އަބްދުﷲ ވަނީ އޯޕީއައި އަށް ޕޮޒިޓިވް ވެފަ އެވެ.

މި ދެ މީހުން ވެސް ކޯޓުގައި ބުނީ އެ މީހުންނަކީ މަސްތުވާތަކެތި. ބޭނުންކުރާ މީހުން ކަމަށް އެއްބަސްވެފައި ވާނެ ކަމަށާއި އެ މީހުންނަކީ އެކަމުން ސަލާމަތްވާން ފަރުވާ ބޭނުންވާ ކަމަށް ވެސް ބުނެފައިވާނެ ކަމަށެވެ.

މިހާތަނަށް 27 ފަހަރަކު ހައްޔަރުކޮށްފައިވާ އިކުލީލް ކޯޓުގައި ބުނީ އޭނާ އަކީ "ސައިކޭޓްރިސްޓް ބޭސް ކާ މީހެއް" ކަމަށެވެ. އަދި ކާ ކަމަށް ބުނާ ބޭސްތަކެއް ވެސް އޭނާ ކިޔައިދީފައިވެ އެވެ. ހާފްވޭ ހައުސްގައި މަސްތުވާތަކެތި ބޭނުންކޮށްފައި ނުވާނެ ކަމަށާއި އެއީ ޑްރަގް އެންފޯސްމަންޓުގެ ބޭފުޅުން 24 ގަޑިއިރު ބަލަހައްޓާ އަދި ވަށައިގެން ކެމެރާ ހަރުކޮށްފައިވާ ތަނަކަށް ވާތީ އެކަހަކަ ކަމެއް ނުވެސް ކުރެވޭނެ ކަމަށް އިކުލީލް އޭނާގެ ދިފާއުގައި ބުނެފައިވެ އެވެ.

ހާފްވޭ ހައުސްގައި މިހާރު 30 ދުވަސް ވެއްޖެ ކަމަށާއި އޭނާގެ އަތުން ފުލުހުންނަށް މަސްތުވާއެއްޗެއް ނުވެސް ފެންނަ ކަމަށާއި އަދި އޭނާ އަކީ މިހާރު އެ ބޭނުންކުރާ މީހެއް ނޫން ކަމަށް ވެސް އިކުލީލް ބުންޏެވެ. އެކަމަކު ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވްވީ ކާ ބޭހުގެ ސަބަބުން ކަމަށް ވެދާނެ ކަމަށް ބުންޏެވެ.

މީގެ ކުރިން 42 ފަހަރު ހައްޔަރުކޮށްފައިވާ އަބްދުﷲ ވެސް ބުނީ އޭނާ އަކީ ކޮންޓްރޯލްޑް ޑްރަގްސް ބޭނުންކުރާ މީހެއް ކަމަށާއި އެކަމުގެ ލިޔުން ވެސް އޮންނާނެ ކަމަށެވެ. އަދި ޑްރަގަށް ޕޮޒިޓިވީ ބޭހުން ކަމަށް އަބްދުﷲ ވެސް ބުންޏެވެ.

މި ދެ މީހުން ހާފްވޭ ހައުސްގައި ޑްރަގްސް ބޭނުން ނުކުރާ ކަމަށާއި މަސްތުވެގެން ތިބި ކަމަށް ބެލެވުނީ ކާންދޭ ބޭހަކުން ކަމަށް ބުނި ނަމަވެސް ފުލުހުން ކޯޓުގައި ބުނީ މައްސަލަ ހުށަހެޅީ ވެސް ހާފްވޭ ހައުސް ބަލަހައްޓާ އެންޑީއޭ އިން ކަމަށާއި އެއީ މި ދެ މީހުން މަސްތުވާތަކެތި ބޭނުންކުރާ ކަމަށް ތުހުމަތުކުރެވިގެން ކަމަށެވެ.

އެހެންވެ ގާޒީ ހުސައިން ފާއިޒު ރަޝާދު ވަނީ މި ދެ މީހުން ވެސް 10 ދުވަހަށް ބަންދުކުރުމަށް އަމުރުކުރައްވައިފަ އެވެ.