ލަންކާ އެއާޕޯޓުން މިހާތަނަށް އަތުލައިގަތް އެންމެ ގިނަ ކޮކެއިންއާ އެކު ތައިލެންޑު މީހަކު ހައްޔަރުކޮށްފި

ސްރީ ލަންކާގެ މައި އެއާޕޯޓުން މިހާތަނަށް އަތުލައިގަތް އެންމެ ގިނަ ކޮކެއިންއާ އެކު ހުކުރު ދުވަހު ތައިލެންޑު އަންހެނަކު ހައްޔަރުކޮށްފި އެވެ.

ކަސްޓަމްސްގެ އެޑިޝަނަލް ޑިރެކްޓާ ޖެނެރަލް ސީވަލީ އަރުކްގޯޑާ ވިދާޅުވީ އުމުރުން 38 އަހަރުގެ މި މީހާ އަތުލައިގަތީ ތިން ސޮފްޓް ޓޯއީއެއްގެ ތެރޭގައި ގާތްގަނޑަކަށް 10 ކިލޯގެ ކޮކެއިން ފޮރުވައިގެން ލަންކާއަށް އެތެރެވާން އުޅެނިކޮށް ކަމަށެވެ.

"މިއީ ލަންކާއަށް ކޮކެއިން އެތެރެކުރަން އުޅެނިކޮށް އެއާޕޯޓުގައި ކަސްޓަމްސް އިން މިހާތަނަށް ހުއްޓުވި އެންމެ ބޮޑު އަދަދު،" އަރުކްގޯޑާ ވިދާޅުވި އެވެ.

ބަންޑާރަނައިކަ އިންޓަނޭޝަނަލް އެއާޕޯޓުގެ ކަސްޓަމްސްގެ އޮފިޝަލުން ވަނީ، 500 އަށް ވުރެ ގިނަ ޕްލާސްޓިކް ކެޕްސޫލްގައި ޕެކްކޮށްފައި ހުރި މި ކޮކެއިންއާ ނަގާފައިވާ ފޮޓޯ ވެސް އާންމުކޮށްފަ އެވެ. މީގެ މަގުމަތީ އަގު 1.72 މިލިއަން ޑޮލަރަށް އަރާނެ ކަމަށް ލަފާކޮށްފައިވެ އެވެ.

މި މަހު ތިން ފަހަރެއްގެ މަތިން ވަނީ ގާތްގަނޑަކަށް 60 ކިލޯގެ ސިންތެޓިކް ކެނަބިސް ވެސް އެއާޕޯޓުން އަތުލައިގެންފަ އެވެ. މި ތިން މައްސަލައިގައި އިނގިރޭސި ވިލާތުގެ މީހަކާއި ތައިލެންޑު މީހަކާއި އިންޑިއާ މީހަކު ވަނީ ހައްޔަރުކޮށްފަ އެވެ.

ސްރީ ލަންކާއަށް 111 ކިލޯއަށް ވުރެ ގިނަ ހެރޮއިން އެތެރެކުރި ކަމަށް އިއުތިރާފުވި އީރާނުގެ 10 ފިރިހެނަކު އުމުރަށް ޖަލަށް ލުމަށް ލަންކާގެ ކޯޓަކުން މިދިޔަ އޮކްޓޫބަރު މަހު ވަނީ ހުކުމްކޮށްފަ އެވެ. މިއީ 2016 ވަނަ އަހަރުގެ އޭޕްރީލް މަހުގެ ތެރޭގައި އީރާނުގެ މަސްބޯޓެއްގައި މަސްތުވާތަކެތި ހިފައިގެން ސްރީ ލަންކާގެ ކަނޑުގެ ސަރަހައްދަށް ވަދެ އުޅެނިކޮށް ހައްޔަރުކުރި 17 މީހުންގެ ތެރޭގައި ހިމެނޭ ބައެކެވެ.

މަސްތުވާތަކެތީގެ އެކި މައްސަލަތަކުގައި 2023 ވަނަ އަހަރު އީރާނުގެ ނުވަ މީހަކު އުމުރަށް ޖަލަށްލުމަށް ލަންކާގައި ހުކުމްކޮށްފައިވެ އެވެ. -- އޭއެފްޕީ