އެމްޑީޕީ ހަރުގެ ހިމެނޭ ބްލޮކަށް ކަރަންޓުދޭ ފޮށީގެ ނަރުތައް ބުރިކޮށްލައިފި

ޗާންދަނީ މަގުގައި ހުންނަ އެމްޑީޕީ ހަރުގެ އާއި ބައެއް ގެތަކަށް ކަރަންޓު ދޭން ބޭނުންކުރާ ފޮއްޓެއްގެ ހުރިހާ ކޭބަލެއް ބަޔަކު ބުރިކޮށްލާފައިވާ ކަމަށާއި އެ މައްސަލަ ބަލަމުން އަންނަ ކަމަށް ސްޓެލްކޯ އިން ބުނެފި އެވެ.

ކަރަންޓު ކޭބަލްތައް ބުރިކޮށްލާފައި ވަނީ އެމްޑީޕީން މިރޭ ކުއްލި އެއްވުމެއް ހަރުގެއިން ފަށަން ތައްޔާރުވަމުން ދަނިކޮށެވެ.

ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ "މިހާރު" އަށް ވިދާޅުވީ އެމްޑީޕީ ހަރުގެ އާއި ގެތަކަށް މިހާރު ކަރަންޓު ކެނޑިފައި ވާތީ އެކަން ހައްލުކުރުމުގެ މަސައްކަތް ކުރަމުން އަންނަ ކަމަށެވެ.

"އިރާދަކުރެއްވިއްޔާ ވީއެންމެ އަވަހަކަށް ހަރުގެއަށް ކަރަންޓު ދިނުމުގެ ކަންތައް އަޅުގަނޑުމެން ކޮށްދޭނަން،" ފަހުމީ ވިދާޅުވި އެވެ.

އޭނާ ވިދާޅުވި ގޮތުގައި ކަރަންޓު ފޮއްޓަށް ގެއްލުން ދިން މައްސަލަ ފުލުހުންނަށް ވަނީ ރިޕޯޓުކޮށްފަ އެވެ. އަދި އެކަން ފުލުހުން ވެސް ބަލަމުން އަންނަ ކަމަށް ވިދާޅުވި އެވެ.

ސްޓެލްކޯގެ ކަރަންޓު ފޮށިތަކާއި ޓްރާންސްފޯމަރުތަކުގެ ކަރަންޓު ނަރުތައް ބުރިކޮށްގެން ވަގަށް ގެންދާ މައްސަލަ ބޮޑެވެ. މިއީ ވަރަށް ނުރައްކާތެރި ކަމަކަށް ވާތީ އެކަން ނުކުރަން އިލްތިމާސްކުރަމުން ދަނިކޮށް ޓްރާންސްފޯމަރަކުން ކަރަންޓުގައި ޖެހި މީހަކު މަރު ވެސް ވެފައިވެ އެވެ.