ޑިންގީ އެކްސިޑެންޓުގައި ސީރިއަސްވި މީހާ މާލެ ގެންނަނީ

ޅ. އަތޮޅު ގާއެރިފަޅު ކައިރީގައި ރޭ މެންދަމު ހިނގި އެކްސިޑެންޓުގައި ސީރިއަސް އަނިޔާ ލިބުނު މީހާ، އިތުރު ފަރުވާ އަށް މާލެ ގެންނަން ނިންމައިފި އެވެ.

ފީނަން ގޮސް އުޅުނު ބަޔަކު ތިބި ޑިންގީއެއްގައި ލޯންޗަކުން ޖެހިގެން ހިނގި އެކްސިޑެންޓެއްގައި ފަސް މީހަކު ޒަހަމްވި އެވެ. އެ މީހުންނަށް ފަރުވާ ދިނުމަށް ޅ. ނައިފަރުގައި ހުންނަ އަތޮޅު ހޮސްޕިޓަލަށް މިހާރު ވަނީ ގެންގޮސްފަ އެވެ.

އެ ހޮސްޕިޓަލުގެ އޮފިޝަލަކު ވިދާޅުވީ އަނިޔާވި މީހުންގެ ތެރެއިން އެކެއްގެ ހާލު ސީރިއަސް ކަމަށެވެ. އެހެންވެ، މިއަދުގެ ހެނދުނު 11:00 ހާއިރު އެއާ އެމްބިއުލާންސްގައި އެ ފިރިހެން މީހާ މާލެ ފޮނުވާލަން ވަނީ ނިންމާފައި ކަމަށް އޮފިޝަލް ވިދާޅުވި އެވެ.

ދެން ތިބި ހަތަރު މީހުންނަށް ވެސް އެކި ވަރުގެ އަނިޔާ ލިބިފައި ވިޔަސް އެ އެންމެންގެ ހާލު ސްޓޭބަލް އެވެ.

އެކްސިޑެންޓުގައި ޑިންގީ ވަނީ ބޭނުން ނުކުރެވޭ ވަރަށް ހަލާކުވެފައި ކަމަށް ފުލުހުން ބުންޏެވެ.