ހައްޖުވެރިންނަށް ޑެބިޓް ކާޑުގެ ލިމިޓު ބޮޑުކޮށްދީފި

މި އަހަރު ހައްޖަށް ދާ މީހުންގެ ޑެބިޓް ކާޑަށް 1،750 ޔޫއެސް ޑޮލަރުގެ ލިމިޓް ބީއެމްއެލް އިން އިތުރު ކޮށްދީފި އެވެ.

ޑެބިޓް ކާޑަށް ދޫކުރުމަށް ހަމަޖެހިފައިވާ 1،750 ޑޮލަރުގެ ލިމިޓްގެ އިތުރުން، ޑެބިޓް ކާޑުތަކަށް މިހާރު ވެސް މަހަކަށް ހަމަޖައްސާފައިވާ 250 ޔޫއެސް ޑޮލަރުގެ ލިމިޓް ލިބޭނެ އެވެ. އެއާ އެކު، ޑެބިޓް ކާޑުތަކުގެ ކާޑު ލިމިޓުގެ އަދަދު 2،000 ޑޮލަރަށް އިތުރުވާނެ އެވެ.

އެ ބަދަލު ބީއެމްއެލް އިން ގެނެސްފައިވަނީ ރައީސް ޑރ މުހައްމަދު މުއިއްޒު އެކަމަށް އެދިވަޑައިގަތުމުންނެވެ.

ބީއެމްއެލް އިން މިއަދު ބުނީ ކާޑުތަކުގެ ލިމިޓްގެ އިތުރުން، ހުރިހާ ހައްޖުވެރިންނަށް ވެސް މިހާރެކޭ އެއްގޮތަށް 500 ޑޮލަރު ބޭންކުން ވިއްކާނެ ކަމަށެވެ.

ހައްޖުވެރިންނަށް މިކަން ފަހިކޮށްދިނުމުގެ ގޮތުން ހައްޖު ކޯޕަރޭޝަން އިން ހައްޖުވެރިންގެ ލިސްޓު ބޭންކަށް ހުށަހެޅުމުން ބޭންކުން ކާޑު ލިމިޓް އިތުރު ކޮށްދޭނެ އެވެ. ކާޑު ލިމިޓް ހަމަޖެހުމުން ބޭންކުން އެސްއެމްއެސް ފޮނުވާނެ އެވެ.

މިދިޔަ ރޯދަމަހުގެ އުމްރާވެރިންގެ ޑެބިޓް ކާޑަށް ބޭންކުން 1،500 ޑޮލަރު ހަމަޖެއްސުމާ އެކު، 1،300 އުމްރާވެރިން ކާޑު މެދުވެރިކޮށް ގާތްގަނޑަކަށް 9،000 މުއާމަލާތް ކޮށްފައި ވެ އެވެ، އެ މުއާމަލާތްތަކަށް ބޭންކުން ވަނީ އެއް މިލިއަން ޑޮލަރަށް ވުރެ އިތުރު އަދަދެއް ވިއްކައިފަ އެވެ.