ކަންބޮޑުވުންތަކަށް ނުބަލައި، ފަނޑިޔާރުންނާ މެދު ފިޔަވަޅު ނާޅަން ލޯއޭޝިއާ އާއި އިންޑިއާގެ ބާ އެސޯސިއޭޝަނުން ގޮވާލައިފި

ސުޕްރީމް ކޯޓުގެ ދެ ފަނޑިޔާރުން ކަމަށްވާ ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު މަހާޒް އަލީ ޒާހިރުއާ ގުޅޭ ސުލޫކީ މައްސަލަ ބެލި ގޮތާ މެދު އޮތް ކަންބޮޑުވުންތަކަށް ހައްލެއް ނުލިބެނީސް، އެ ފަނޑިޔާރުންނާ މެދު ފިޔަވަޅު ނާޅަން ލޯއޭޝިއާ އާއި އިންޑިއާގެ ބާ އެސޯސިއޭޝަނުން ގޮވާލައިފި އެވެ.

ލޯއޭޝިއާއިން ނެރުނު ބަޔާނެއްގައި ފަނޑިޔާރުންނާ ގުޅޭ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލާފައިވަނީ ދެފުށް ފެންނަ ގޮތަކަށް ނޫން ކަމަށާއި އެކަމުގައި ހާމަކަމެއް ނެތް ކަމަށެވެ. އަދި ތަހުގީގު ކުރިއަށް ގެންދަނީ ޑިއު ޕްރޮސެސް އާއި އިޖުރާއީ އަދުލުވެރިކަން ނެތި ކަމަށް ބުނެ ފާޅުކުރާ ކަންބޮޑުވުމަކީ ރަނގަޅު ކަންބޮޑުވުމެއް ކަމަށް ވެސް ބަޔާނުގައިވެ އެވެ.

އިންޑިއާގެ ބާ އެސޯސިއޭޝަނުން ނެރުނު ބަޔާނެއްގައި ބުނީ ފަނޑިޔާރުންނާ ގުޅޭގޮތުން ހިންގި ތަހުގީގުގައި ހާމަކަން ނެތުމާއި ޑިއު ޕްރޮސެސް ފުރިހަމަ ނުކުރާ ކަންބޮޑުވުމަކީ ތެދަކަށްވާ ނަމަ، ރާއްޖޭގެ ޖުޑިޝަރީގެ މިނިވަންކަމާއި ގާނޫނުގެ ވެރިކަމާ މެދު ވަރަށް ބޮޑަށް ސުވާލު އުފެދިގެންދާނެ ކަމަށެވެ.

އެހެންވެ، ލޯއޭޝިއާ އާއި ރާއްޖޭގެ ބާ އެސޯސިއޭޝަނުން ފާޅުކޮށްފައިވާ ކަންބޮޑުވުންތައް ބަލައިގަނެ، އެ ކަންކަމާ މެދު ހައްލެއް ހޯދުމަށްފަހު ނޫނީ ފަނޑިޔާރުންނާ މެދު ފިޔަވަޅު ނާޅަން އިންޑިއާގެ ބާ އެސޯސިއޭޝަނުން ގޮވާލި އެވެ.

ޝަރުއީ ދާއިރާގެ މިނިވަންކަން ނުގެއްލޭނެ ގޮތަށް އަދި އެކަށީގެންވާ ހެކި ނެތް ނުވަތަ ހަމަނުޖެހޭ ސަބަބުތަކުގެ މައްޗަށް ބިނާކޮށް ފަނޑިޔާރުންނާ މެދު އެއްވެސް ފިޔަވަޅު ނާޅަން ކޮމަންވެލްތު ލޯޔާސް އެސޯސިއޭޝަން (ސީއެލްއޭ) އިން ވެސް އިއްޔެ ވަނީ ގޮވާލައިފަ އެވެ.

ފަނޑިޔާރު މަހާޒު އަދި ފަނޑިޔާރު ޑރ. އަޒްމިރަލްދާގެ މައްޗަށް ސުލޫކީ މައްސަލައެެއް ސާބިތުވާ ކަމަށް ކަނޑައަޅައި، އެ ދެ ފަނޑިޔާރުން މަގާމުން ވަކިކުރަން ރައްޔިތުންގެ މަޖިލީހަށް ޖޭއެސްސީން ފޮނުވީ ފަނޑިޔާރު އަޒްމިރަލްދާގެ ފިރިކަލުން ޑރ. އިސްމާއިލް ލަތީފް ބަންދުން ދޫކޮށްލަން ދަށު ކޯޓުގެ ގާޒީންނަށް އެ ދެ ފަނޑިޔާރުން ނުފޫޒު ފޯރުވި ކަމަށް ބުނާ މައްސަލައިގަ އެވެ.

އެ މައްސަލަ ދިރާސާ ކުރަން އިއްޔެ ބޭއްވި މަޖިލީހުގެ ޖުޑިޝަރީ ކޮމިޓީގެ ބައްދަލުވުމުގައި ދެ ފަނޑިޔާރުން ވަކިކުރަން ނިންމައި، މައްސަލަ ވަނީ ތަޅުމަށް ފޮނުވައިފަ އެވެ. އެގޮތަށް ކޮމިޓީން ފާސްކުރީ ސިއްރުކޮށްގެން ގެންދިޔަ ބައްދަލުވުމެއްގަ އެވެ.

ޖޭއެސްސީން ސުލޫކީ މައްސަލަ ބަލާފައިވަނީ އުސޫލުތަކާ ހިލާފަށް ކަމަށް ވިދާޅުވެ، އެކަމާ ގުޅޭ ކަންބޮޑުވުންތައް ހިއްސާ ކުރުމަށް ރައްޔިތުންގެ މަޖިލީހަށް ހާޒިރުވުމުގެ ފުރުސަތެއް ދެއްވުމަށް ދެ ފަނޑިޔާރުން ވެސް އެދިވަޑައިގެންނެވި އެވެ. އަދި ކަންބޮޑުވުންތައް ހިއްސާކުރަން ބާ ކައުންސިލުން ވެސް ވަނީ ކޮމިޓީ އަށް ހާޒިރުވުމުގެ ފުރުސަތަކަށް އެދުނެވެ.

ނަމަވެސް، ޖުޑިޝަރީ ކޮމިޓީން ނިންމީ އެއްވެސް ފަނޑިޔާރަކު ހާޒިރު ނުކުރުމަށެވެ.

ޖޭއެސްސީގެ ރިޕޯޓުގައި ކޮމިޓީން ކަނޑައަޅާފައި ވަނީ ފަނޑިޔާރު މަހާޒުއާ ބައިވެރިވެވަޑައިގެން އަަޒްމިރަލްދާގެ ފިރިކަލުން ޑރ. އިސްމާއިލް ބަންދުން ދޫކޮށްލުމަށްޓަކައި ކްރިމިނަލް ކޯޓުގެ ގާޒީ ސޮފްއަތު ހަބީބް މެދުވެރިކޮށް، ބަންދު މަޖިލިސް ބެލެހެއްޓެވި ގާޒީ އިބްރާހިމް ޒިހުނީ އަށް ނުފޫޒު ފޯރުވިކަން ސާބިތުވާ ކަމަށެވެ. އެހެންވެ، އެއީ ފަނޑިޔާރުންގެ ސުލޫކީ މިންގަނޑާ ހިލާފު އަމަލެއް ކަމަށް ނިންމައި، ފަނޑިޔާރު އަޒްމިރަލްދާ އަދި މަހާޒު މަގާމުން ވަކިކުރަން މަޖިލީހަށް ހުށަހަޅަން ޖޭއެސްސީން މައްސަލަ ބެލި ކޮމިޓީން ނިންމި އެވެ.

ފަނޑިޔާރަކު މަގާމުން ވަކި ކުރެވޭނީ އެކަމަށް އެދި ޖޭއެސްސީން ރައްޔިތުންގެ މަޖިލީހަށް ފޮނުވުމުން މަޖިލިހުގެ ތަޅުމުގައި ނަގާ ވޯޓަކުންނެވެ. މީގެ ކުރިން ވެސް ސުޕްރީމް ކޯޓުގެ ބައެއް ފަނޑިޔާރުން މިގޮތަށް މަޖިލީހުން ވަކިކޮށްފައި ވެ އެވެ.