އެމްއައިއެފްސީއަކީ ދުނިޔޭގެ މާލީ މުސްތަގުބަލު ބައްޓަންކުރަން ރާއްޖޭން އިސް ނެގިކަމުގެ ރަމްޒެއް: ރައީސް

ގަތަރުގެ ޝާހީ އާއިލާގެ ކުންފުންޏެއް ކަމަށްވާ، އެމްބީއެސް ގްލޯބަލް އިންވެސްޓްމަންޓްސް އާއި ދިވެހި ސަރުކާރު ގުޅިގެން އުފެއްދި މޯލްޑިވްސް އިންޓަނޭޝަނަލް ފައިނޭންޝަލް ސެންޓާ (އެމްއައިއެފްސީ) އަކީ ދުނިޔޭގެ މާލީ މުސްތަގުބަލު ބައްޓަން ކުރުމަށް ރާއްޖޭން އިސް ނެގުމުގެ ރަމްޒެއްގެ ގޮތުގައި ރައީސް ޑރ. މުހައްމަދު މުއިއްޒު ސިފަކުރައްވައިފި އެވެ.

ރައީސް މުއިއްޒު އާއި އެމްބީއެސްގެ ޝެއިހް ނާއިފް ބިން އީދު އަލް ސާނީގެ ހާޒިރުގައި މިރޭ ކުރުނބާ މޯލްޑިވްސްގައި ބޭއްވި ރަސްމިއްޔާތެއްގައި، 8.8 ބިލިއަން ޑޮލަރުގެ މި ސެންޓަރު ގާއިމުކުރުމުގެ ޖޮއިންޓް ވެންޗާ އެއްބަސްވުމުގައި ވަނީ ސޮއިކޮށްފަ އެވެ.

މި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، މި ސެންޓަރަކީ ހަމައެކަނި ކޮންކްރީޓު ބިނާއެއް ނޫން ކަމަށާއި އެތަނަކީ ޒަމާނުއްސުރެ ރާއްޖޭގެ އިގުތިސާދި ބަރޯސާވެފައި އޮތް ސިނާއަތްތަކުގެ ބޭރަށް ނެރެ، ސިންދަފާތު ކުރުމުގެ ގައުމީ ވައުދެއް ކަމަށެވެ.

އެމަނިކުފާނު ވިދާޅުވި ގޮތުގައި 2040 ވަނަ އަހަރާ ހަމައަށް ރާއްޖެއަކީ ތަރައްގީވެފައިވާ ގައުމަކަށް ހެދުމުގެ ތަސައްވުރު ހާސިލުކުރުމުގެ ބިންގަލަކަށް މި ސެންޓަރު ވެގެންދާނެ އެވެ.

"އެމްއައިއެފްސީ އާއެކު އަޅުގަނޑުމެން މި އެކުލަވާލަނީ މާދަމާގެ ދިވެހިރާއްޖެ. އެއީ އާ އީޖާދުތަކުގެ ނަމޫނާއަކަށްވެ، ގައުމީ ފަހުރުވެރިކަމުގެ ނިޝާނަކަށްވެ، ގުދުރަތާ އެއްހަމައެއްގައި ކުރިއަރައިގެންދާނެ ތަނެއް،" ރައީސް ވިދާޅުވި އެވެ.

”މި ފައިނޭންޝަލް ސެންޓަރަކީ އިގުތިސާދީ ގޮތުން ވަރުގަދަކަމުގެ ނިޝާނަކަށްވެ، އަންނަން އޮތް އެތައް ޖީލުތަކަކަށް ބޮޑެތި ފައިދާތަކެއް ކުރާނެ، އާ މިންގަނޑެއް ކަނޑައަޅައިދޭނެ ތަނަކަށް ވެގެންދާނެ."

މާލޭގައި ގާއިމުކުރާ ޖުމްލަ 780,000 އަކަމީޓަރުގެ މި ސަރަހައްދުގައި 6,500 އަށްވުރެ ގިނަ މީހުންނަށް ދިރިއުޅެވޭނެ ކަމަށް ބަލާފައިވާއިރު، ދުވާލެއްގެ މައްޗަށް 35,000 މީހުން މި ސަރަޙައްދަށް ޒިޔާރަތްކުރާނެ ކަމަށް ވަނީ ލަފާކޮށްފަ އެވެ.

މާލީ ފްރީޒޯނެއްގެ ގޮތުގައި ގާއިމުކުރާ އެމްއައިއެފްސީގައި ކުންފުނިތަކުން ޓެކްސް ދައްކަންނުޖެހޭ ގޮތަށް، ގާނޫނުއަސާސީއާ އެއްގޮތްވާ ގޮތުގެ މަތިން ވިޔަފާރީގެ މިލްކުވެރިކަން ލިބިގެންދާއިރު، ރެސިޑެންސީ ޝަރުތުތަކެއް ނުހިމެނެ އެވެ. އެ ސަރަހައްދުގައި ދިރިއުޅޭ ފަރާތްތަކަށް ފައިސާގެ އެކި ގޮތްގޮތުން މުއާމަލާތްކުރެވޭ ބޭންކިން ހިދުމަތާއި އޮފްޝޯ ޕްރައިވެޓް ބޭންކިން ހިދުމަތް ލިބޭނެ އެވެ. މީގެ އިތުރުން، މުސްތަގުބަލަށް އެކަށައަޅާފައިވާ ގަވާއިދުތަކުން ޑިޖިޓަލް އެސެޓްތަކާއި ގްރީން ފައިނޭންސްއަށް އެހީތެރިވެދޭނެ އެވެ.

ރައީސް ވިދާޅުވީ މި ސެންޓަރަކީ ދުނިޔޭގެ މާލީ މުސްތަގުބަލު ބައްޓަންކުރަން ރާއްޖޭން އިސް ނެގުމުގެ ރަމްޒަކަށް ވެގެންދާނެ ކަމަށެވެ. އަދި ހަމައެކަނި ކޮންކްރީޓު ބިނާއެއްގައި ބަދަލުގައި، މި ސެންޓަރު ވެގެންދާނީ މުޅި ދުނިޔެއަށް ކަނޑައަޅައިދޭ ރާއްޖޭގެ ލެގަސީ ނުވަތަ މީރާސް ކަމަށް އެ މަނިކުފާނު ވިދާޅުވި އެވެ.

"ހަމައެކަނި ގަލާއި ދަގަނޑުގެ މީރާސެއްގެ ބަދަލުގައި، މި ކަން ވެގެންދާނީ އީޖާދީ ނިންމުންތަކާއި ހިތްވަރުގަދަ ގުޅުންތަކާއި ގައުމީ އަޒުމުގެ މައްޗަށް ބިނާވެފައިވާ ރާއްޖޭގެ މީރާސްއަށް،" ރައީސް ވިދާޅުވި އެވެ.

މި ސެންޓަރު، 2030 ވަނަ އަހަރާ ހަމައަށް ނިންމުމަށް ރޭވިފައިވާއިރު، މި މަޝްރޫއުގެ މަގްސަދަކީ ހަތަރު އަހަރުގެ ތެރޭގައި ރާއްޖޭގެ ގައުމީ އުފެއްދުންތެރިކަމުގެ ނިސްބަތް ފާހަގަ ކުރެވޭ މިންވަރަކަށް އިތުރުކުރުމާ އެކު، ފަސް ވަނަ އަހަރު އެއް ބިލިއަން އެމެރިކާ ޑޮލަރަށް ވުރެ މަތީ އާމްދަނީއެއް ހޯދުމެވެ.