ޖޭއެސްސީގެ ވަކީލުންގެ މެންބަރު ވަކިކުރަން ޕެޓިޝަނެއްގައި ސޮއިކުރަނީ

ޖުޑީޝަލް ސާވިސް ކޮމިޝަން (ޖޭއެސްސީ)ގައި އިންނަވާ ގާނޫނީ ވަކީލުން ތަމްސީލްކުރާ މެންބަރު އަލީ އަބްދުއްލަތީފް ވަކިކުރުމަށް ޕެޓިޝަނެއްގައި ސޮއިކުރަން ވަކީލުން ފަށައިފި އެވެ.

ގާނޫނީ ވަކީލުން ތިއްބަވާ ޓެލެގްރާމް ގުރޫޕެއްގައި ޕެޓިޝަންގައި ސޮއިކުރުމުގެ މަސައްކަތް ފެއްޓެވީ ސުޕްރީމް ކޯޓުގެ ފަނޑިޔާރުކަމުން އިސްތިއުފާ ދެއްވި ހުސްނުއްސުއޫދެވެ. އެނގިފައިވާ ގޮތުގައި އެ ޕެޓިޝަނުގައި މިހާރު ވެސް ގިނަ ވަކީލުންތަކެއް ވަނީ ސޮއިކުރައްވައިފަ އެވެ.

ވަކީލުންގެ ކަންބޮޑުވުމަކީ އިޖުރާއަތްތަކާ ހިލާފަށް، އަސާސީ ހައްގުތައް ކަށަވަރު ނުވާ ގޮތަށް ސުޕްރީމް ކޯޓުގެ ދެ ފަނޑިޔާރުންގެ މައްޗަށް ސުލޫކީ މައްސަލަ ބަލައި ފިޔަވަޅު އަޅަން ނިންމާފައިވާއިރު، އެކަމުގައި އަލީ އަބްދުއްލަތީފް ބައިވެރިވެފައިވުމެވެ. އެ މައްސަލަ ބަލާ ކޮމިޓީގެ ތިން މެންބަރުންގެ ތެރޭގައި އޭނާ ހިމެނެ އެވެ.

އަލީ އަބްދުއްލަތީފް ވަކިކުރުމަށް ގޮވާލައި، ސޮއިކުރަމުންދާ ޕެޓިޝަން ހުށަހަޅަން ނިންމާފައިވަނީ ބާ ކައުންސިލަށެވެ.

ގާނޫނުއަސާސީގެ 165 ވަނަ މާއްދާގައި ބުނާ ގޮތުން ޖޭއެސްސީއަށް އައްޔަންކުރެވޭ މީހުން އެ މަގާމުން ވަކިކުރާނީ އެ މީހަކު އެ ކޮމިޝަނަށް އައްޔަންކުރި ފަރާތަކުންނެވެ. ވަކީލުންގެ ފަރާތުން ކޮމިޝަނުގައި އިންނަވާ މެންބަރަކު ކަނޑައަޅަނީ ވަކީލުންގެ މެދުގައި ބާއްވާ އިންތިހާބަކުން ބާ ކައުންސިލުންނެވެ.

ގާނޫނީ ފަންނުގެ ގާނޫނުގައިވާ ގޮތުން ވަކީލުންގެ ދަފުތަރުގައި ހިމެނޭ މީހުންގެ ތެރެއިން 20 ޕަސެންޓް މީހުން ސޮއިކޮށް ޖޭއެސްސީގައި އިންނަވާ މެންބަރު ވަކި ކުރަން ހުށަހަޅައިފި ނަމަ، 14 ދުވަސް ތެރޭގައި ބާ ކައުންސިލުން، ފެންނަ ނުފެންނަ ވޯޓެއް ނަގަން ޖެހޭނެ އެވެ.

ސުޕްރީމް ކޯޓުގެ ދެ ފަނޑިޔާރުން ކަމަށްވާ ޑރ. އަޒްމިރަލްދާ ޒާހިރާއި މަހާޒު އަލީ ޒާހިރުގެ ސުލޫކީ މައްސަލައެއް ބަލައި، އެ މައްސަލައާ ގުޅިގެން އެ ދެ ފަނޑިޔާރުން ވަކި ކުރަން ފެންނަ ކަމަށް ކޮމިޓީން ވަނީ ނިންމައިފަ އެވެ. ނަމަވެސް، މިހާތަނަށް ޖޭއެސްސީން ކޮމިޓީގެ ނިންމުމާ މެދު ގޮތެއް ނުނިންމަ ނުވެ އެވެ.

އެ މައްސަލަ ކޮމިޓީން ކުރިއަށް ގެންގޮސްފައިވަނީ އިޖުރާއަތްތައް ފުރިހަމަނުކޮށް، ހައްގުތައް ވެސް ކަށަވަރު ނުވާ ގޮތަށް ކަމަށް ފަނޑިޔާރުން ވަނީ ވިދާޅުވެފަ އެވެ. އެ މައްސަލާގައި ބައިނަލްއަގްވާމީ ބައެއް ފަރާތްތަކުން ވެސް ވަނީ ކަންބޮޑުވުން ފާޅުކޮށް، ފަނޑިޔާރުންގެ ސަސްޕެންޝަން އުވާލައި، މައްސަލަތައް އަނބުރާ ގެންދަން ގޮވާލައިފަ އެވެ.