ނުކުޅެދުންތެރިކަން ހުންނަ ކުދިންގެ ތެރަޕީ ފީ ލަސްވާތީ ހުށަހެޅި މައްސަލަ ބަލައިނުގަތް

ނުކުޅެދުންތެރިކަން ހުންނަ ކުދިންގެ ރައްކާތެރިކަމާއި އެ ކުދިންނަށް ދޭން ޖެހޭ ބޭސްފަރުވާ އާއި ބޭނުންވާ މާލީ އެހީ ފޯރުކޮށްދިނުމުގައި ސަރުކާރުން އިހުމާލުވަމުންދާ ކަމަށް ރައްޔިތުންގެ މަޖިލީހަށް ހުށަހެޅި މައްސަލަ ބަލައިނުގަނެ ބޭރުކޮށްލައިފި އެވެ.

މި މައްސަލަ މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ.

އޭނާ ހުށަހެޅުއްވި މައްސަލާގައި ވިދާޅުވީ، މިފަދަ ކުދިންނަކީ ގާނޫނުން ހާއްސަ ރައްކާތެރިކަމެއް ލިބެން ޖެހޭ ބަޔަކަށް ވެފައި، އެ ފަރާތްތަކަށް ބޭނުންވާ ހާއްސަ ރައްކާތެރިކަމާއި އިނާޔަތްތައް ލިބޭނެ ގާނޫނީ ނިޒާމެއް އެކުލަވާލާފައިވީ ނަމަވެސް، އެ ގޮތަށް ކަންކަން ހިނގަމުން ނުދާ ކަމަށެވެ.

އެ މައްސަލާގައި ބުނެފައިވާ ގޮތުގައި އެފަދަ ކުދިންނަށް ދައުލަތުން ފޯރުކޮށްދޭން ލާޒިމްކޮށްފައިވާ ރައްކާތެރިކަމާއި މާލީ އެހީގެ އިތުރުން ބޭސް ފަރުވާ ފޯރުކޮށްދިނުމުގައި އެންސްޕާ އިން ވަނީ އިހުމާލުވެފަ އެވެ.

މިގޮތުން، ނުކުޅެދުންތެރިކަން ހުންނަ ފަރާތްތަކަށް ދޭން ޖެހޭ ތެރަޕީ ހިދުމަތްތައް ހިލޭ ލިބޭނެ ގޮތް 2019 ވަނަ އަހަރު ހަދާފައިވީ ނަމަވެސް، ވޭތުވެދިޔަ އެއް އަހަރު ތެރޭގައި ތެރަޕީއަށް ފައިސާ ދައްކަން ޖެހިފައިވަނީ އެ ކުދިންގެ އަމިއްލަ ޖީބުން ކަން ފާހަގަކޮށްފައިވެ އެވެ.

އެއާއެކު ތެރަޕީ ސެންޓަރުތަކުގެ ފީތައް ބޮޑުވުމާއި ކިއު ދިގުވުން ފަދަ ސަބަބުތަކާ އެކު، ގިނަ ކުދިންތަކެއް ތެރަޕީ ހިދުމަތުން މަހުރޫމުވަމުން ދާ ކަމަށް ވެސް މައްސަލާގައި ބުނެފައިވެ އެވެ.

މި މައްސަލަ ސަރުކާރުގެ ސަމާލުކަމަށް ގެނެސް، އެކަމަށް ފިޔަވަޅު އެޅުމަށް ގޮވާލައި ހުށަހެޅި މައްސަލަ ބޭރުކޮށްލާފައިވަނީ ސަރުކާރު ހިންގާ ޕީއެންސީއަށް ނިސްބަތްވާ 44 މެންބަރުންގެ ވޯޓުންނެވެ. މައްސަލަ ބަލައިގަންނަން ފެންނަ ކަމަށް ވޯޓު ދެއްވީ 12 މެންބަރުންނެވެ.