ރޯހަން ހުރީ ރީތި ފަރު ރިސޯޓުގައި

އިންޑިއާގެ ޓީވީ އެކްޓަރު ރޯހަން މެހްރާ ޗުއްޓީއަށް ރާއްޖެ އަތުވެއްޖެ އެވެ.

ސްޓާ ޕްލަސްގެ "ޔޭ ރިޝްތާ ކިޔާ ކެހެލާތާ ހޭ" އާއި ކަލާސް ޓީވީގެ "ސަސުރާލް ސިމަރް ކާ" ކަހަލަ މަޝްހޫރު ޑްރާމާތަކުގައި މަސައްކަތްކޮށްފައިވާ ރޯހަން ޗުއްޓީ ހޭދަކުރަމުން އަންނަނީ ރ. އަތޮޅުގައި އޮންނަ ރީތި ފަރު ރިސޯޓުގަ އެވެ.

ރޯހަންގެ އިންސްޓަގްރާމް ޕޯސްޓުތަކުން އެނގޭ ގޮތުގައި އޭނާ ރާއްޖެ އައިސްފައި ވަނީ މީގެ ފަސް ވަރަކަށް ދުވަސް ކުރިންނެވެ.

އޭނާ ވަނީ މިހާތަނަށް މި ދަތުރުގެ ތިން ޕޯސްޓެއް އިންސްޓަގްރާމް ހިއްސާކޮށްފަ އެވެ.

ފުރަތަމަ ޕޯސްޓުގައި އޭނާ ހިއްސާކޮށްފައި ވަނީ ސީޕްލޭނުން ފައިބަމުން ނަގާފައިވާ ފޮޓޯއެކެވެ. ޖެޓްސްކީ ދުއްވަމުން ނަގާފައިވާ ފޮޓޯތަކެއް ދެވަނަ ފޯސްޓުގައި ހިއްސާކޮށްފައިވާއިރު، އިއްޔެ ކުރި ޕޯސްޓުގައި ހުރީ އެ ރިސޯޓުގެ ބީޗުގައި ނަގާފައިވާ ފޮޓޯތަކެކެވެ.

ރޯހަން ވަނީ 2018 ވަނަ އަހަރު ވެސް ޗުއްޓީއަށް ރާއްޖެ އައިސްފަ އެވެ. އެ ފަހަރު އޭނާ ޗުއްޓީއަށް އައީ އޭރުގެ ލޯބިވެރިޔާ ކަންޗީ ސިންގްއާ އެކުގަ އެވެ. އޭނާ މިހާރު ރަށްޓެހިވެގެން އުޅޭ ކަމަށް އަޑުފެތުރިފައި ވަނީ ފިލްމު އެކްޓްރެސް ޕޫޖާ ހެޖްއާ އެވެ.