ވެންޓިލޭޓަރު މައްސަލާގައި ދުބާއީ ކުންފުނީގެ ވެރިޔާ ހޯދަން އިންޓަޕޯލް ރެޑް ނޯޓިސް ނެރެން އެދެފި

ކޮވިޑް-19 އާ ގުޅިގެން ހޯދަން އުޅުނު ވެންޓިލޭޓަރުތައް ނުލިބުނު މައްސަލާގައި، ވެންޓިލޭޓަރު ގެންނަން ހަވާލުކުރި ދުބާއީ ކުންފުނީގެ ވެރިޔާ ހޯދުމަށް އިންޓަޕޯލް ރެޑް ނޯޓިސް ނެރުމަށް ފުލުހުންގެ ކިބައިން އެދިއްޖެ އެވެ.

ކޮވިޑުގެ ދުވަސްވަރު، 2020 ވަނަ އަހަރު ހެލްތު މިނިސްޓްރީން ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ ހަވާލުކޮށްގެން 75 ވެންޓިލޭޓަރު ގެންނަން މަސައްކަތް ކުރި ނަމަވެސް، އޭގެ ތެރެއިން ގިނަ އެއްޗެހި ލިބިފައެއް ނުވެ އެވެ. އެ މައްސަލަ ދިވެހި ސަރުކާރުން ބޭރުގެ އާބިޓްރޭޝަނަށް ހުށަހެޅުމުން އެ ކުންފުނިން ދިވެހި ދައުލަތަށް 1.8 މިލިއަން ޑޮލަރު (28 މިލިއަން ރުފިޔާ) އާއި ލިކުއިޑޭޓް ޑެމޭޖުގެ ގޮތުގައި 223،750 ޑޮލަރު (3.4 މިލިއަން ރުފިޔާ) ދޭން ޖެހޭނެ ކަމަށް ވަނީ ކަނޑައަޅައިފަ އެވެ. ނަމަވެސް އެ ފައިސާ ވެސް މިހާތަނަށް ލިބިފައެއް ނުވެ އެވެ.

އެކަމާ ގުޅިގެން ރައްޔިތުންގެ މަޖިލީހުގެ މާލިއްޔަތު ކޮމިޓީގައި މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވީ އެ ކުންފުނި ގޮވައިގެން އާބިޓްރޭޝަނަށް ދިޔަ ނަމަވެސް، އެ ފައިސާ ހޯދޭނެ ގޮތެއް ވެސް ނުވި ކަމަށާއި އެ ކުންފުނީގެ ވެރިމީހާ ވެސް އައިޑެންޓިފައިނުވި ކަމަށް އޭނާ ވިދާޅުވި އެވެ.

"އެމީހާ ވީތަނެއް ވެސް ނޭންގޭ. ރެސްޕޮންޑެއް ވެސް ނުކުރޭ. އެހެންވީމަ، ހަމަގައިމު ވެސް ޖިނާއީ މައްސަލައެއްގެ ގޮތުގައި ނެރެފައި އޭގެ އޯނަރު ހޯދާފައި ރެޑް ނޯޓިސް ނެރޭ ހިސާބުން އަޅުގަނޑުމެންނަށް އަތުވާނެ،" އޭނާ ވިދާޅުވި އެވެ.

އޭނާ ވިދާޅުވީ އެ މީހާ ހޯދިއްޖެނަމަ، އެ ފައިސާއިން ކުރި ކަންކަން ވެސް އޮޅުން ފިލުވޭނެ ކަމަށެވެ. އަދި ރިޝްވަތުގެ ގޮތުގައި އިތުރު ބަޔަކަށް ފައިސާ ދިންކަން ނުވަތަ ނޫންކަން ވެސް ސާފުވާނެ ކަމަށް އޭނާ ވިދާޅުވި އެވެ.

އެ މައްސަލައާ ގުޅިގެން ފުލުހުން ބުނީ ދުބާއީގެ އެގްޒެކިއުޓާސް ޖެނެރަލް ޓްރޭޑިން ކުންފުނީގެ ވެރިޔާ ހޯދުމަށް އިންޓަޕޯލް ރެޑް ނޯޓިސް ނެރުމާ ގުޅޭގޮތުން ގޮތެއް ނިންމުމަށް ޕްރޮސެކިއުޓާ ޖެނެރަލް އާ އެކު މަޝްވަރާތައް ކުރަމުންދާ ކަމަށެވެ.

ވެންޓިލޭޓަރުތައް ނުލިބުނު މައްސަލާގައި ދިވެހި ސަރުކާރަށް ދުބާއީ ކުންފުނިން ދައްކަންޖެހޭ 32 މިލިއަން ރުފިޔާ ދައްކާފައި ނުވާތީ އެ ކުންފުންޏާ ދެކޮޅަށް ޖިނާއީ ތަހުގީގެއް ކޮށްދިނުމަށް މާލިއްޔަތު ކޮމިޓީން މިދިޔަ މާޗް މަހު އޮތީ ފުލުހަށް ވެސް ހުށަހަޅައިފަ އެވެ.